CONTACTO

  • Samain e magostos
  • Apego
  • Prem Risc
  • youtubeiras
  • MMOu
  • EdC
  • Volver

    Ourense, 9 de setembro de 2019.-
    A programación de teatro para bebés volve esta semana ao Auditorio Municipal, co inicio dunha nova edición do Programa Apego. Catro espectáculos para cativos e cativas de até 3 anos sucederanse para achegar a infancia ás artes escénicas, coma a música ou o teatro. Será unha cita cada mes, sempre con dobre sesión na sala Apego do Auditorio, ás 18.00 e 19.30 horas, gratuíto para bebés e a un prezo de 3 euros para persoas adultas. As entradas pódense adquirir en www.ataquilla.com, na sala de Exposicións Afundación e na billeteira do Auditorio dúas horas antes da función.
     
    O primeiro espectáculo será o día 13 de setembro, co Pequeno gran show infantil - As nosas música d'aquí de Nelson Quinteiro. Esta é unha divertida proposta de contos, cantigas e escenografía da man do pintor Leandro Lamas. Un concerto didáctico moi colorido e participativo e unha viaxe polas historias, contos e cantigas da Illa de Con, alegoría de nós mesmos. O espectáculo conta coa participación do clown Señor Patajullo (Nelson Quinteiro) e o acompañamento do acordeonista Señor Cachelo (David Álvarez Caneda).
     
    A cita do mes de outubro será o día 4, con Que animaliño é?, de Trécola teatro. Conta a historia de Paula, que co seu xilófono e a través de diferentes elementos sensoriais fará que os máis pequenos poidan coñecer os distintos animais. Representación para bebés que fará que gocen, coñezan e recoñezan as cousas que ven ao seu redor. 
     
    O 15 de novembro volverá a música con Son no berce, da Cova das letras. Espectáculo que esperta as emocións das crianzas a través de estímulos sensoriais: imaxe, palabras, tactos diversos, cheiros e músicas en directo, deleitarán os bebés e adultos que os acompañen. Unha experiencia única.
    O ano escénico rematará o 13 de decembro, con teatro: Lixo, d¨O baúl da tía Lola. Espectáculo para goce familiar, especialmente pensado para bebés, que nos mergulle nun mundo de plásticos, luces, sonoridade e movemento. As dúas protagonistas, unhas bailadeiras moi peculiares, vivirán unha aventura na que teñan que "crear cultura a partir da varredura". Comunícanse con pareados, móvense con pasos de ballet inventados por elas mesmas e axúdanse de luces para crear diferentes atmosferas ao longo do espectáculo, dándolle ritmo e rima á obra. 
     
    APEGO vai dirixido ás familias que se preparan para a chegada dun novo membro e tamén para as que teñen nenos e nenas de até 6 anos. O programa quere axudar á socialización en galego e propón o uso da lingua galega “para crear vínculos coa familia, para asentar o arraigo a esta terra, porque a lingua que mamamos, na que aprendemos a falar, vai ser a base da identidade futura do nosos fillos e das nosas fillas”. Máis información, en apego.gal
     
    Ourense, agosto de 2019.-
     
    O Proxecto Youtubeir@s, no que participa o Concello de Ourense xunto cos da Baña, Ames, Carballo, Cedeira, A Coruña, O Grove, Moaña, Ribadeo, Pontevedra, Rianxo, Santiago e Teo, as universidades da Coruña, Santiago e Vigo e a Deputación da Coruña, vén de recibir o 'Premio Mil Primaveras' na categoría de proxecto máis innovador. Recoñeceuno así o xurado -que fixo público no día de onte a súa decisión- ao ver en Youtubeir@s unha iniciativa  que aborda “un medio prioritario para o futuro do idioma”, xa que a creación de contidos na nosa lingua a través da plataforma Youtube xera “unha grande atracción na xente nova”. O xurado, ademais, sinalou que o proxecto “favorece que as persoas que transmiten a través de Youtube o fagan en galego e que as que comunican en galego o fagan en Youtube”. 
     
    Os 'Premio Mil Primaveras', creados neste 2019 pola Coordinadora de Traballadoras e Traballadores de Normalización da Lingua (CTNL) coa colaboración da Deputación de Pontevedra, teñen como obxectivo valorar, recoñecer e difundir accións, campañas e programas que serven para fomentar a lingua e para incrementar tanto o seu  uso coma o seu prestixio. A organización de Youtubeir@s, que neste 2019 acada a súa terceira edición, amosa a súa gratitude por este galardón, que significa un “auténtico pulo para continuar a medrar” no futuro. “É un recoñecemento a todo o esforzo desenvolvido dun xeito colectivo entre os servizos de normalización lingüística de trece concellos, das tres universidades e da Deputación da Coruña”, sinálase dende a organización ao tempo que se destaca este elemento “fortemente colaborativo dende as institucións” como “unha característica fundamental” da iniciativa. 
     
    Tal e como apunta o xurado, Proxecto Youtubeir@s representa unha iniciativa innovadora  que, dende o punto de vista da organización, “conecta coa mocidade e capta a súa atención empregando os seus mesmos códigos comunicativos”, o cal significa “unha clara adaptación aos novos tempos”. Por último, a coordinación do proxecto admite que un recoñecemento como o  que a CTNL lle outorga a Youtubeir@s, garante  “unha gran visibilidade” á hora de achegarse a máis público. 
     
    Premios Youtubeir@s
    Os Premios Youtubeir@s, unhas das grandes liñas de acción do proxecto Youtubeir@s, mantén até o vindeiro 27 de setembro o prazo de inscrición para todas as persoas creadoras de contidos en Youtube na nosa lingua. Cómpre que os vídeos estean publicados con data posterior ao 15 de marzo de 2018, sen restricións de privacidade e cos cancelos #youtubeiras #youtubeiros na descrición. Establécense un total de catro categorías: vídeo-facermos (vídeos que mostran saberes e procesos de elaboración a través de titoriais), vídeo-opinarmos (exposición de opinións e valoracións sobre un tema de interese), vídeo-cantarmos (vídeos musicais con versións, composicións orixinais, adaptacións ou coreografías) e canles.
     
    Ademais destas catro categorías, recoñeceranse premios á creatividade, á eficiencia comunicativa, á calidade técnica e á calidade lingüística, decididos todos por un xurado de recoñecido prestixio que outorgará o premio durante a gala dos Premios Youtubeir@s, no mes de novembro. Por último, o certame conta cun premio do público que se entrega baixo o nome de #propostayoutubeira. En conxunto, Youtubeir@s repartirá un total de 6500 euros en galardóns. As bases completas pódense consultar na web www.youtubeiras.gal.
     
     
    Ourense, xullo de 2019.-

    (Enlace ás bases)
     
    O Concello de Ourense e a Fundación Risco convocan a vixésima edición do Premio Risco de Creación Literaria. Un certame dotado cun premio de 6.000 euros máis a publicación da obra gañadora, que lle rende homenaxe a Vicente  Martínez Risco e ao seu fillo Antón Martínez-Risco Fernández. 
     
    A Xunta de goberno local do Concello aprobou na súa sesión desta semana as bases e a convocatoria do premio, centrado no xénero narrativo. Poderán presentarse novelas, conxuntos de relatos, ensaios, etc, e se exclúen teses académicas ou traballos especificamente científicos, que teñen o seu ámbito propio no Premio Vicente Risco das Ciencias Sociais. 
     
    Poderá concorrer a este premio calquera persoa que presente escritos inéditos da súa autoría redactados en lingua galega, cunha extensión mínima de 150 folios e máxima de 300. 
     
    O prazo de entrega rematará o venres día 20 de setembro no Rexistro Xeral do Concello de Ourense, na Praza Maior.  
     
    Ourense, xullo de 2019
     
    María del Rosario López Sanchez é a gañadora do XXXV Premio de Poesía Cidade de Ourense. O xurado, reunido esta mañá no Auditorio, seleccionou o seu poemario entre os presentados por un total de 49 participantes provintes de Galicia e de Portugal. Baixo o título "Álbum", Charo López Sánchez presentou un poemario do cal o xurado destacou a súa claridade nítida. A obra -subliñou-  ofrece unha estética clara e coherente onde na súa lectura, un vaise imaxinando as imaxes que recrea. En canto os temas tratados, salientan o autocuestionamento moi sincero da propia vida e da ética.
     
    O xurado elixiu esta obra por unanimidade e valorou moi positivamente a calidade de todas as persoas participantes.
     
    Na elección deste XXXV Premio de Poesía Cidade de Ourense participaron:
    - Carlos da Aira (gañador da pasada edición).
    - Celia Pereira (activista cultural).
    - Rochi Nóvoa (poeta ourensá).
    - Mónica F. Valencia (Técnica de Normalización do Concello de Ourense).
     
    O premio ten unha dotación económica de 6.000 euros e a publicación do publicación do libro.
     
    Ourense, xuño de 2019 
     
    O Proxecto Youtubeir@s afronta a súa terceira edición co reto de consolidar a comunidade de creación de vídeos en galego que medrou ao abeiro desta iniciativa durante os últimos anos. O proxecto, que desenvolven os servizos de normalización lingüística de Ourense e outros doce concellos galegos, as tres universidades e a Deputación da Coruña, eleva a 6.500 euros a súa dotación en premios para seguir promovendo e dándolle visibilidade ao uso do galego a través de Youtube. O lema este ano é 'Conéctate á comunidade e multiplícate!. O prazo de inscrición estará aberto ate o 27 de setembro.
     
    Os premios Youtubeir@s teñen como finalidade ser acicate da creación e difusión de vídeos de opinión e vídeotitoriais en galego. Poden optar aos premios todas as persoas maiores de 14 anos que queiran transmitir algún coñecemento e/ou opinar sobre algún tema de interese a través de vídeos autoproducidos subidos a Youtube de xeito independente ou nunha canle.
     
    Na súa edición anterior, máis de 380 persoas, de 18 a 80 anos, acudiron aos cursos de formación e que ao abeiro do proxecto se produciron máis de 2.000 minutos de contido en galego en Youtube. Máis de 400 persoas participaron xa nas dúas edicións dos Premios Youtubeir@s.
     
    O certame aumenta este ano de 5.500 a 6.500 euros a dotación dos seus premios, repartidos nas categorías: vídeo-facermos, vídeo-opinarmos, canle e vídeo-cantarmos (novidade desta edición), e os que recoñecerán as pezas de maior creatividade, eficiencia comunicativa, calidade técnica e lingüística.

    Tamén haberá premio do público
     
    Xunto co concurso, Youtubeir@s inclúe tamén cursos e obradoiros formativos para alumnado de secundaria e “Youtubeir@s en conexión”, que persegue consolidar a comunidade existente e fomentar o intercambio con dous eventos en Coruña en xuño: Lista de Reprodución e Xornada para Youtubeir@s. 
    Youtubeir@s é unha iniciativa organizada polos servizos de normalización lingüística dos concellos da Baña, Ames, Carballo, Cedeira, A Coruña, Moaña, O Grove, Ourense, Ribadeo, Pontevedra, Rianxo, Santiago e Teo, das universidades da Coruña, Santiago e Vigo e da Deputación da Coruña.
     
    Toda a info e inscricións en youtubeir@s.gal.
     
    Ourense, abril de 2019
     
    O prazo para presentarse a 35 edición do Premio de Poesía Cidade de Ourense, que distinguirá o mellor traballo inédito e orixinal escrito en lingua galega ou portuguesa, rematará o vindeiro 12 de abril. O Concello recorda a todos os interesados que quedan dúas semanas para que os interesados en participar entreguen as súas propostas para optar a este galardón dotado cun premio de 6.000 euros e a publicación da obra gañadora. O ano pasado tivo como gañador o poeta allaricense Carlos da Aira, coa obra “Prender os fachos, compoñer os ósos'.
     
    O Cidade de Ourense está aberto a todas as persoas que desexen participar, de calquera nacionalidade, agás os que gañaron o premio nas 5 edicións anteriores. O prazo de presentación de orixinais estará aberto ata as 14 horas do 12 de abril. 
     
    As bases completas pódense consultar nos espazos web do Concello de Ourense (www.ourense.gal) e da Concellería de Cultura (www.ourensecultura.com)  Os traballos terán que ser orixinais e inéditos, cun mínimo de 600 versos. Presentaranse preferentemente en soporte dixital ou en papel por quintuplicado, baixo lema, indicando “PARA O XXXV PREMIO DE POESÍA CIDADE DE OURENSE” nun sobre pechado, no Rexistro Xeral do Concello (Praza Maior, s/n), directamente ou por correo certificado. As persoas que concorran de Portugal poderán entregar os  seus traballos na Cámara de Vila Real (Portugal) dentro dos mesmos prazos. Unha persoa pode presentar máis dunha obra ao certame, sempre e cando cada unha se presente de forma independente e cumprindo todos os requisitos. 
     
    O xurado estará integrado por personalidades das letras galegas e portuguesas, o gañador da edición anterior e unha persoa representante da Corporación que exercerá a presidencia. A súa decisión producirase no mes de xuño e será inapelable. Quen gañe tamén recibirá gratuitamente 25 exemplares da obra publicada e formará parte do xurado na seguinte edición.
     
    Carlos da Aira
     
    O certame tivo  como gañador na pasada edición o poeta allaricense Carlos da Aira, cuxa obra “Prender os fachos, compoñer os ósos' foi elixida por unanimidade por un xurado composto por Luís Tosar, poeta e presidente do Pen club Galicia, Soedade do Muíño, profesora de lingua e literatura galegas, Edelmiro Vázquez Naval, poeta, e Fernando Fitas, xornalista e poeta gañador da edición anterior.
     
    O xurado valorou a obra do seguinte xeito: “Alicerzado nun discurso literario despoxado de artificialismos, mais presentando un conxunto de belas metáforas e un interesante vocabulario, esta obra constitúe un exemplo de como é posíbel transmitir a mensaxe, denunciar, insinuar, dar o recado, usando para o efecto, a poderosa suxestión da palabra, ao final, unha das trabes-mestras da poesía, desempeñando así, unha das súas funcións primordiais, cuxo significado se reviste de particular significado nos días que corren”.
     
    Santiago, febreiro. 
     
    O Proxecto Youtubeir@s, organizado polos servizos de normalización lingüística de trece concellos, polas tres universidades e pola Deputación da Coruña, lanza a súa terceira edición coa meta de consolidar a comunidade de youtubeir@s que naceu, participou e medrou ao abeiro desta iniciativa nos últimos anos. “Este obxectivo únese así á esencia última do Proxecto Youtubeir@s, que non é outra que promover e darlle visibilidade ao uso do galego a través de Youtube”, sinalou a coordinadora do proxecto, Mónica Fernández Valencia, quen xunto a Martiño Noriega, alcalde de Santiago; José Antonio Cacabelos, alcalde do Grove; Goretti San Martín Rei, vicepresidenta da Deputación da Coruña, e Gumersindo Feijóo, vicereitor de Planificación e Proxección Estratétixca da USC, presentou en representación das institucións organizadoras esta mañá, na Facultade de Ciencias da Comunicación da Universidade de Santiago, o groso de actividades que se desenvolverán neste 2019.
     
    Na presentación, lembráronse diferentes cifras ao respecto das dúas edicións anteriores. En concreto, destacouse que máis de 380 persoas, con idades comprendidas entre os 18 e os 80 anos, acudiron aos cursos de formación e que ao abeiro do proxecto se produciron máis de 2.000 minutos de contido en galego en Youtube. Ademais, máis  400 persoas participaron xa nas dúas edicións dos Premios Youtubeir@s, unha das liñas de acción deste proxecto que, para esta edición, aumenta o número de categorías e incrementa a súa dotación económica ao pasar dos 5.500 euros de 2018 aos 6.500 euros desta terceira convocatoria. A cifra repartirase nos galardóns das categorías nas que se divide o certame: vídeo-facermos, vídeo-opinarmos, canle e vídeo-cantarmos. Precisamente, esta última categoría é a gran novidade deste 2019 e con ela recoñecerase e incentivarase o gran talento musical que está presente en Youtube. A estas catro categorías súmanselle outras catro que, un ano máis, premiarán os vídeos que destaquen en creatividade, eficiencia comunicativa, calidade técnica e calidade lingüística. A estes oito galardóns, hai que sumarlles o premio do público, chamado #propostayoutubeira, coa que se impulsará por segundo ano consecutivo a interacción entre as persoas usuarias na rede social Facebook, que poderán propoñer a través do correo electrónico, proposta@youtubeiras.gal, un vídeo do que sexan seareiros/as. Este ano, amplíase o prazo de inscrición, que principia hoxe mesmo, 13 de febreiro, e remata o vindeiro 27 de setembro.
     
    Formación
    Outro dos piares do Proxecto Youtubeir@s dedícase á formación, que este ano centrará parte dos seus esforzos en cursos e obradoiros destinados principalmente á comunidade educativa. Aínda que Youtubeir@s é un proxecto interxeracional, son precisamente as xeracións máis novas -as que naceron xa como nativas dixitais- as que converteron Youtube nunha plataforma de encontro na que intercambiar opinións, inquedanzas ou amosar os seus coñecementos, impulsando así o concepto de youtubeir@s como novos axentes de comunicación. Por ese motivo, o proxecto achegarase ao alumnado de secundaria mediante cursos e obradoiros de formación impartidos un ano máis pola produtora Illa Bufarda e coa incorporación ao corpo docente da actriz Laura Villaverde, coñecida por ser a youtubeira Chola, It Girl; ou Marga Rodríguez Tilve, comunicadora audiovisual e youtubeira en As Cousas do Choio.
     
    Youtubeir@s en conexión
    Outra vía de traballo do programa para esta nova edición titúlase Youtubeir@s en conexión e o seu obxectivo é consolidar a comunidade de youtubeiros e youtubeiras xa existente, ampliar a súa base social, dar visibilidade ao seu traballo de creación na rede en galego e fomentar o intercambio e o debate. Con esas metas, desenvolveranse no mes de xuño na Coruña dous grandes eventos. O primeiro deles, baixo o nome de Lista de reprodución ao vivo, no que diferentes youtubeir@s compartirán a súa experiencia coas persoas asistentes que irán cambiando dun a outro como quen cambia de vídeo na Rede.  
     
    O segundo deles será a Xornada para Youtubeir@s, na cal se convoca a comunidade youtubeira galega para reflexionar sobre o panorama creativo a varios niveis (lingüístico, temático, creación de públicos), de xeito que se propicie un lugar de reflexión e conexión para tecer redes e, ao tempo, fortalecer a comunidade entre as persoas creadoras.  
     
    A estas tres liñas de acción: as actividades, os premios e a formación, cómpre engadirlles outras iniciativas de visibilización, como a acción nas redes sociais, a presenza en festivais e eventos culturais, ou programas de accións de difusión da lingua que se darán a coñecer e se desenvolverán ao longo deste novo ano youtubeiro.
     
    Organización
    Youtubeir@s é unha iniciativa organizada polos servizos de normalización lingüística dos concellos da Baña, Ames, Carballo, Cedeira, A Coruña, Moaña, O Grove, Ourense, Ribadeo, Pontevedra, Rianxo, Santiago e Teo, das universidades da Coruña, Santiago e Vigo e da Deputación da Coruña.
     

    Logo do descanso estival, este venres, día 14 de setembro comezamos as actividades do Apego, teatro, música, danza para bebés en galego.
    Será o grupo A run run que presenta o seu espectáculo Calcetíns, en dúas sesións, ás 18.00 e ás 19.00horas. As crianzas de 0 a 6 anos entran gratis,e para poder chegarmos a máis público recomendamos unha persoa adulta por bebé.
    Continuamos tamén coa programación dos domingos, ás 12.00 horas, será Culturactiva coa representación de Saaabor!  espectáculo cómico que mestura música, maxia, humor, ritmo e participación do público, co mundo da gastronomía de fondo.
    Podes consultar toda a programación na Axenda.
    DESDE O PROXECTO APEGO
    Queremos axudar á socialización en galego e propoñervos o uso da lingua galega para crear vínculos coa familia, para asentar o arraigo a esta terra, porque a lingua que mamamos, na que aprendemos a falar, vai ser a base da identidade futura do voso fillo ou da vosa filla. A lingua de cada pobo é un tesouro irrepetible e tamén é a cerna que lle permite existir e descubrir o mundo.
    E lembrade: Se queredes formar parte da comunidade Apego e o voso fillo ou filla naceu no ano 2018 ou se aínda estades agardando a súa chegada, temos unha caixa de material diverso que pode resultarvos interesante e que nos gustaría entregarvos. Se xa é/son máis grande(s), temos tamén outro agasallo que pode ser moi animado e divertido. Podedes pasar polo Servizo de normalización lingüística do Concello de Ourense no Auditorio municipal ou chamar ao teléfono 988 391290
    Pódese ver toda a información que xera este programa no conxunto dos concellos que participamos e coñecer moitos outros recursos visitando de cando en vez a páxina xeral do proxecto www.apego.gal ou a que mantemos nunha rede social www.facebook.com/apego.gal
    Páxinas: 1 2 3 

    Concellería de Cultura
    Concello de Ourense
    2017

     

    Rúa da Canle, 1
           32005 Ourense

     

       988 391 290

    Contacto

     

    Accesibilidade

     

    Permisos

    Cultura nas redes:

     

      Facebook

     

      Twitter

     

      Youtube

    Diseñado y programado por ACV Galaica