CONTACTO

  • prem risco
  • Verán cultural
  • Premio poesía
  • Auditorio
  • EdC
  • Volver

    Ourense, xuño de 2018.
     
    O Concello de Ourense ven de presentar a programación das Festas de Ourense 2018, que “contarán con máis de máis de 90 actividades pensadas para todas as idades e sensibilidades” e que ofrecerá unha especial atención “a música feita made in Galicia”.
     
    Así o confirmou hoxe o alcalde de Ourense, Jesús Vázquez, durante a presentación, xunto a concelleira de Cultura Belén Iglesias, do programa festivo que “dará o seu pistoletazo de saída o sábado 23 de xuño, ás 22:00 horas, co pregón da artista ourensá Cristina Pato”.
     
    “Concertos, atraccións, actividades infantís, teatro de rúa, propostas gastronómicas e un intenso calendario de citas deportivas farán que cada día teñamos unha chea de opcións para escoller, abundou o rexedor.
     
    Este ano están programados un total de 39 concertos en diversos escenarios da cidade como a Praza Maior, as prazas de San Martiño e do Ferro, a Alameda do Bispo Cesáreo e o Xardín do Posío. 
     
    Na programación haberá “nomes de primeira liña” como Sidonie ou Rosendo Mercado, pero “a nosa aposta máis importante vai ser pola música “made in Galicia”, dixo Jesús Vázquez. 
     
    O alcalde  explicou que este ano se porá especial énfase “en reivindicar e dar a coñecer ós artistas galegos” a través de varios concertos na Praza Maior, coma o espectáculo Sons da Auria a cargo dos ourensáns Silvia Alonso, Daniel Minimalia e Emilio Rúa (o 27 de xuño); e as actuacións de Xestreu e Treixadura (o 28 de xuño) e de Guadi Galego, o sábado 30 de xuño.
     
    A cativada volverá a ser protagonista do teatro programado na Praza do Bispo Cesáreo. Entre o 25 e o 29 de xuño haberá actuacións en horario de mañá e de tarde.
     
    O alcalde insistiu na aposta do Concello “pola rúa coma o mellor escenario”, a través da celebración de verbenas “coas mellores orquestras de Galicia”; a celebración da Feira Histórica (dende o 28 de xuño) e cunha nova edición da tradicional Batalla de Flores, recuperada polo actual Grupo de Goberno.
     
    Como novidade, este ano terá lugar, o sábado 30 de xuño,  o  espectáculo Midnight Paint Party, un evento que aposta por unha mestura da música de recoñecidos DJ’s con actividades de pintura.
     
    Pola súa banda, a concelleira de Cultura, Belén Iglesias, resaltou o traballo do seu departamento para “dar resposta aos gustos de todo tipo de persoas e idades”. 
     
    Iglesias destacou que este ano a celebración da XXI Edición do  “Ourense Dance”, o venres 29 de xuño ás 23:00 horas no Xardín do Posío “este ano ten como eslogan Non ao acoso escolar, non ao bullyng”.

    Enlace ao programa.
     
    Ourense, 18 de xuño de 2018.
     
    A compañía internacional de Danza SóLODOS e a Concellaría de Cultura presentaron esta mañá, no Museo Municipal, a programación da 6º edición de Danza no Claustro que se desenvolverá no Claustro de San Francisco os días 20, 21 e 22 de xuño -de mércores a venres- desde as 20.30h. 
     
    “Danza no Claustro é unha proposta escénica exclusiva, na que os artistas investigarán o propio espazo para facer unha proposta exclusiva no espazo co gallo de enxalzar a beleza do conxunto a través dos corpos dos bailaríns”, afirmaba Erick Jiménez, a metade de SóLODOS xunto a Maruxa Salas. En definitiva, un matrimonio perfecto de danza, cultura e arte”, afirmaba a concelleira de Cultura, Belén Iglesias, durante a presentación.
     
    A asistencia ás actividades é libre e gratuíta, e o público desenvolve un papel fundamental nas coreografías:
    Os artistas desenvolven unha proposta escénica en conxunto, compartindo os seus coñecementos e experiencia nun espazo histórico e importante para a cidade de Ourense. Na súa 6º edición, a danza contemporánea traerá 16 artistas de Costa Rica, México e España coa seguinte programación:

    20 de xuño 20.30h
    Bocaracá. 60 min. Compañía de Cámara Danza UNA / Costa Rica. 60'.

    21 de xuño 20.30h
    ON. Cía Exire / A Coruña. 10'. 
    Coreografía Ganadora de SóLODOS en Danza 2017 e Premio do Público.
    Paloma. Compañía de Cámara Danza UNA / Costa Rica. 15'.
    One hit wonder. Carla Segovia e Guillermo Aguilar / México. 10'
    Vacío. Otradanza / Elche. 20'
     
    22 de xuño 20.30h
    Geometría orgánica. Tejido Conectivo / Madrid. 10'.
    Quiso hablar pero no pudo. Cía. de Cámara Danza UNA / Costa Rica.  10'.
    Touché. Victoria P. Miranda / Bilbao. 12'.
    Vacío. Otradanza / Elche.20'.
     
    + Info: 
    Erick Jiménez + Maruxa Salas 
    info[arroba]solodos.es 
    630 742 946
     
    Ourense, 14 dexuño de 2018.
     
    O artista ourensán Pablo Otero presenta, esta tarde ás 20:00 horas no Museo Municipal, a segunda parte da súa exposición Colpo di Fulmine, a continuación da obra exposta na sala Valente desde o mes de maio. Nesta segunda parte, o artista expón pezas de menor formato, pero atravesadas por un denominador común: a procura da verdade a través da luz. 
     
    Así, o artista plástico concibe a súa obra coma un proceso de tránsito, de metamorfose, partindo da inocencia ata chegar á abstracción. Un camiño no que transita a través da historia da Arte, como fonte de inspiración, pero que só se albisca a través da luz da revelación, pero sen caer na tentación das certezas. 
    En total, máis dun cento de obras montadas sobre 40 soportes artísticos diferentes (pintura sobre tea, instalacións con ladrillos, mesas, collages, etc.) que se unen, tal e como fixera na fachada do edificio do Banco de España, á intervención artística sobre a fachada do Museo Municipal.
     
    O acto de inauguración será ás 20:00 horas coa presenza da concelleira de Cultura, Belén Iglesias.
     
    Ourense, 09 dexuño de 2018.
     
    O Concello de Ourense vén de completar o programa das Festas de Ourense 2018 coa incorporación das bandas musicais que actuarán durante a semana na Praza Maior. Así, Seguridad Social estará o luns 25; o mércores 27 haberá un espectáculo, Sons da Auria, coa participación de Silvia Alonso, Daniel Minimalia e Emilio Rúa. O venres 29 tocará Sidonie, que contará cos ourensáns Best Life como teloneiros. Todas estas actuacións serán gratuítas e a entrada terá aforo limitado. 
     
    A maiores, xa están á venda as entradas para os concertos de Rosendo Mercado, ao que teloneará o grupo ourensán Mitocondrias, e de DVICIO, a través da plataforma de venda online ataquilla.com.
     
    Festa Paint Party
    Por outra banda, a Concellería de Cultura vén de confirmar a celebración do Festa Paint Party, un festival de DJ´s e pintura para todos os públicos, especialmente público familiar, dirixido por Chito DJ e un recoñecido animador. O espectáculo celebrarase en dúas sesións: de 12.00 a 14.00 horas, e con carácter gratuíto, o Midgnigth Paint Party Kids. Desde as 15.00 horas até as 23.00 horas, o Midgnigth Paint Party: Unha festa que percorreu medio mundo e agora chega a Ourense con artistas como Luka Caro, Groove Amigos, The Prieto brothers, ou BLVCDR.
     
    O prezo das entradas será de 5 € para as 1.000 primeiras que se vendan, 8 € para as 500 seguintes, e 12 € as restantes, máis gastos de xestión. Poderanse adquirir a través do espazo web www.woutick.es.
     
     
    Ourense, xuño de 2018
     
    Gastronomía e música daranse a man o vindeiro día 30 de xuño nas Burgas, no marco do Enofestival 2018, dentro da programación das Festas de Ourense. Esta mañá tivo lugar a presentación do certame, que contará coa participación dos grupos Cooper, Anaut e Mad Mission, cuxa música combinarase coa degustación dos viños de Adegas Celme, Grupo Reboreda Morgadío, Cunqueiro, Vilerma, Eduardo Bravo e Pablo Vidal, e 2 postos de comida con propostas “gourmet”. Enfoestvial 2018 é un evento “no que apostamos pola cultura próxima e viva, e poñemos en valor o noso patrimonio, nun lugar emblemático da cidade como son as Burgas”, sinalou a concelleira de Cultura, Belén Iglesias.
     
    O promotor do proxecto, Rubén Amorín salientou a calidade dos grupos participantes, e a subliñou a boa acollida que está a ter o festival entre o público e as adegas e colleiteiros, xa que unha vintena se interesaron en participar, seleccionándose entre elas as 6 que finalmente estarán presentes. Os viños que se degustarán son “unha mostra absolutamente representativa do que se está a facer hoxe no Ribeiro”, asegurou o presidente da Denominación de Orixe Juan Manuel Casares, quen valorou a implicación do Concello en “espallar cultura en manifestacións como a música e o viño”, e apostou por este tipo de maridaxes: “Ourense ten que vender viño e o viño ten que vender Ourense”. 
     
    As persoas interesadas poden obter máis información na web www.enofestivalourense.com. As entradas xa están á venda na páxina web Ticketea, no bar Trampitán e na tenda Peggy Records (10 euros na billeteira e 8 en anticipada)
     
    En canto aos grupos, Cooper, cabeza de cartel, suma xa máis de 15 anos de prestixiosa traxectoria musical, con Álex Díez á cabeza, probablemente a personaxe máis representativa da escena mod nacional, líder de Los Flechazos, e autor de cancións que forman parte da historia do pop español. Presentarán novo disco: "Tiempo, Temperatura, Agitación".
     
     
    ANAUT é unha banda madrileña ten editado xa tres álbumes (o último en 2018, "Hello there"), cun cóctel de influencias de soul, r&b, folk e rock, que o converten nun grupo de referencia a nivel nacional.
     
     
    Completa o cartel os ourensáns MAD MISSION, cuarteto nacido a finais de 2014 cunha proposta de funk rock elegante con enérxicas voces soul, listos para ofrecer un vibrante espectáculo con ritmos impetuosos.
     
     
     
    Enviamos tamén o cartel, obra do deseñador ourensán Miguel Chaler.
     
    Ourense, 3 de xuño de 2018.

    O Enclave de Cámara pecha a súa quinta edición co agardado concerto de Nikolai Lugansky, un dos pianistas máis distinguidos a nivel internacional. Un intérprete excepcional, intenso, sensible, versátil e cun repertorio que en Ourense incluirá obras de Debussy, Chopin e Rachmaninov.

    Os seus traballos regulares con directores de alto nivel como Osmo Vänskä ou Yuri Temirkanov, os seus recitais de cámara en festivais coma o de Edimburgo ou La Roque d’Anthéron e as súas actuacións coa Orquestra Nacional de Rusia, a Filharmónica de Hong Kong ou as sinfónicas de Londres e Baltimore, concedéronlle o aplauso de público e crítica nos últimos anos.

    Nado en Moscova en 1972 e formado no Conservatorio Superior P. I. Tchaikovsky baixo a dirección de T. Nikolaeva e S. Dorensky iniciou a súa carreira a unha idade moi temperá. Con 16 anos comezou a destacar en concursos internacionais de piano coma o VII Concurso Internacional J. S. Bach de Leipzig ou o Concurso S. Rajmáninov.

    Coa súa extensa discografía, Nikolai Lugansky gañou varios premios: o seu recital CD coas Sonatas para piano de Rajmáninov gañou o  Diapason d’Or e un premio ECHO Klassik, mentres que a súa gravación dos concertos de Grieg e Prokofiev con Kent Nagano e a Orquestra Sinfónica de Berlín, foi un Gramophone Editor’s Choice.

    Lugansky foi galardoado coa honra de Artista Popular de Rusia, en abril de 2013.
     
    Programa do concerto:
    • I Parte (38′)
    Claude Debussy (1862 – 1918) | Suite Bergamasque (17′)
    Prélude | Menuet | Clair de lune | Passepied
    Fréderic Chopin (1810 – 1849) | Barcarolle en FA sostido maior Op. 60 (9′)
    Fréderic Chopin (1810 – 1849) | Ballade no. 4 en FA menor Op. 52 (11′)
    • II Parte (45′)
    Serguéi Rajmáninov (1873 – 1943) | Preludes Op. 23 1, 3, 4, 5, 6, 7
    Serguéi Rajmáninov (1873 – 1943) | Preludes Op. 32 1, 2, 3, 4, 5, 12, 13
     
    Entradas online á venda en www.ataquilla.com e na billeteira do teatro dende dúas horas antes do concerto.

    O Enclave de Cámara está organizado polo Concello de Ourense e conta coa colaboración da Deputación Provincial de Ourense, do Teatro Principal e da Corporación Radio e Televisión de Galicia. 
    Ourense, maio de 2018.
     
    A Xunta de Goberno Local aprobou este xoves as bases e a convocatoria do Concurso para o deseño do cartel das Festas de Ourense 2018, que está dotado cun premio de 1.000 euros. Na imaxe, captura do cartel gañadora do ano pasado.
     
    Os traballos deberán ser presentados no Rexistro Xeral do Concello, nun  sobre no que figure “Concurso de carteis Festas 2018”, acompañados por unha declaración responsable na que o autor certifique que a obra presentada é orixinal (que non copia nin adapta unha terceira), inédita (non foi difundida por ningún medio nin Internet), que non infrinxe o dereito de terceiros e que non foi presentada a outro premio. 
     
    O Prazo límite para a presentación de traballos será de 10 días naturais dende a publicación das bases na páxina web do Concello (www.ourense.gal) e a da Concellería de Cultura (www.ourensecultura.com).
     
    O concurso poderá ser declarado deserto se o xurado así o considera oportuno, tal e como ocorreu recentemente no caso do cartel da festividade dos Maios que se declarou deserto despois de ter coñecemento de que a obra elixida Maia Bona Dea incumpría o requisito de orixinalidade. Esta decisión fora o resultado dunha reunión que tivo lugar o pasado 3 de maio, pero que agardaba polo aval xurídico para presentarse.
     
    As propias bases do concurso para o cartel de Maios establecían, no art.9, a posibilidade de que ficase deserto. Ditas bases explicitaban, igualmente, que as obras presentadas a concurso fosen “orixinais e inéditas”. 
     
    Logo de coñecer que a obra gañadora podería ser unha adaptación doutro orixinal do artista estadounidense “Tuesdaymourning”, o xurado reuniuse novamente o 3 de maio e resolveu declarar deserto o concurso ao entender que a obra inicialmente gañadora non respectou a esixencia de orixinalidade que establecían as bases, e que establecían un único premio de 800 €.
     
    Da comparación das imaxes resultaba manifesto que se trataba dunha adaptación ou reinterpretación doutra obra, polo que, con independencia da maior ou menor creatividade amosada pola autora da obra presentada ao concurso, se trataba “dunha obra derivada, e, por conseguinte, a devandita obra incumpre o requisito de orixinalidade que esixen as bases do concurso,  como resolveu o xurado”, e tal e como avala un informe xurídico emitido desde a Concellería de Cultura que engade, ademais, que de ter sido unha interpretación creativa precisaría o permiso do artista norteamericano.
     
    Declaración xurada: Dende o pasado concurso do cartel dos Maios o Concello de Ourense incorporou nas bases unha declaración xurada que deberá ser asinada polos autores das propostas que se presenten aos concursos.

    Bases do Concurso.

    Declaración responsable (galego).

    Declaración responsable (castelán).
     
    Ourense, maio de 2018.
     
    A Concellería de Cultura do Concello de Ourense vén de abrir o proceso de selección de provedores para a edición e distribución de materiais informativos das Festas de Ourense 2018. Esta chamada realízase coa fin de cumprir os requisitos de publicidade, concorrencia, transparencia, igualdade e non discriminación para a recepción de ofertas. O departamento de Cultura resolverá en atención á oferta que considere máis vantaxosa para a difusión pública das actividades das Festas, admitíndose as melloras que a oferta establece. O prazo límite de recepción será o mércores 6 de xuño.
     
    A empresa ofertante deberá encargarse do deseño, impresión e distribución e/ou colocación de 700 carteis de 68 x 48 cm; 15.000 programas de man; 15 carteis formato mupi; 400 tarxetas para acreditacións, plastificadas e perforadas; outras 400 cintas para colgar ditas acreditacións; 2 lonas para substituír en rollers; así como 4 lonas grandes e 3 pequenas para colgar nos escenarios.
     
    A empresa que resulte adxudicataria, terá que realizar estes traballos sen custe algún para o Concello de Ourense. Ademais terá que depositar na conta do Concello a cantidade de 1.000 €, a modo de fianza, no suposto de que resulte adxudicataria, cantidade que será reintegrada unha vez recibidos os materiais. 
     
    A retribución para a empresa adxudicataria do contrato virá mediante a inserción de publicidade na revista, incluíndo o programa das festas, que a empresa poderá editar empregando o logo do Concello de Ourense, e cuxo contido deberá recibir o visto e prace da Concellería de Cultura. Tamén poderá inserir publicidade na contraportada do programa de man.
     
    As propostas poderán ser remitidas nas dependencias da Concellería de Cultura, na Rúa da Canle, 2, 32004 de Ourense dentro do prazo máximo indicado. Neste último caso, remitirase á empresa acuse de recibo no día seguinte hábil á recepción. 
     
    Páxinas: 1 2 3 4 5 ... Último 

    Concellería de Cultura
    Concello de Ourense
    2017

     

    Rúa da Canle, 1
           32005 Ourense

     

       988 391 290

    Contacto

     

    Accesibilidade

     

    Permisos

    Cultura nas redes:

     

      Facebook

     

      Twitter

     

      Youtube

    Diseñado y programado por ACV Galaica