CONTACTO

  • Xornadas Folclore
  • Prem Risc
  • youtubeiras
  • MMOu
  • EdC
  • Volver

    Ourense, maio de 2019.
     
    Maio Artístico: 
    Finalistas. “A Foliada no Torreiro”, “Homenaxe a Xaime Quesada” e “Pozo Artesán con péndulo”.
    Gañador: “Homenaxe a Xaime Quesada” (número 5)
     
    Maio Enxebre: 
    Finalistas: “Pía da Casca” e “A Galleira”.
    Gañador: “A Galleira” (12)
     
    Maio Creativo: “Doce Primaveira” (32)
     
    Maio Infantil: Escola Waldorf Meniñeiros (27)
     
    Concurso de Coplas.
     
    Infantil: “O xardín da alegría e da Poesía” (26)
     
    Adultos: 
    Finalistas: “Homenaxe a Xaime Quesada” (5), “A Galleira” (12) e “Maio ínfimo” (13)
    Gañador: “Maio ínfimo” (13)
     
    O Xurado estivo composto por: Susana Valiño Rozas, profesora do CIFP Portovello; Avelino Rodríguez González, historiador e xestor cultural; e Xico Paradelo, gañador das Coplas 2018.
     
    Ourense, abril de 2019
     
    Ourense converterase esta fin de semana no epicentro dunha grande festa da Cultura. Venres, sábado e domingo, cidadanía e visitantes poderán gozar dunha ampla serie de actividades organizadas polo Concello, en colaboración coa Xunta de Galicia. Jazz, música galega e tradicións únicas coma os Maios, (festa declarada de Interese Turístico) e os entroidos ofrecerán un paquete único e transformarán as rúas no mellor escenario para descubrir a nosa cidade. 
    “Esta fin de semana Ourense será o mellor lugar para as persoas que desexen ‘deXconectar’ das súas rutinas”, explicou o alcalde de Ourense, Jesús Vázquez, durante a presentación do programa de actividades, nun acto que contou coa presenza do secretario xeral de Política Lingüística, Valentín García; a delegada territorial da Xunta, Marisol Díaz Mouteira; e a concelleira de Cultura, Belén Iglesias. 
     
    “Hoxe presentamos esta gran oferta cultural. Pero non fan falla escusas para ‘Sentir Ourense’ e experimentar a maxia desta cidade. Porque ao longo do ano ofrecémoslles aos nosos visitantes unha forma de vivir especial, unha experiencia, unha sensación. Iso que coñecemos desde fai vinte séculos”, dixo o rexedor Jesús Vázquez.
     
    Na súa intervención, o rexedor destacou que grazas á colaboración coa Xunta de Galicia, a través da Axencia Galega de Turismo e a Consellería de Cultura, a vindeira fin de semana Ourense vivirá unha efervescencia cultural que “converterá as nosas rúas nun destino atractivo para os amantes da música; das artes; da gastronomía; e de Festas que nos fan únicos no mundo, coma os Maios e o Entroido”, dixo o rexedor.
     
    “É unha proposta pioneira, que se desenvolve por vez primeira na nosa cidade e que nos converterá nun punto de referencia para atraer turistas e visitantes doutras zonas limítrofes e para dinamizar o noso Comercio e o sector hostaleiro”, incidiu o rexedor. 
     
    Concerto de Jazz
    Así, o venres 3 de maio, a Praza de Santa Eufemia acollerá o tradicional concerto de balde do XXIII Festival de Jazz de Primaveira. Este ano, estará protagonizado pola banda  The Blues Giants, un grupo que leva décadas enchendo os principais templos do jazz e do blues.
     
    Ourense, capital dos Entroidos de Galicia
    O sábado pola mañá, Ourense será a capital do Entroido, coa celebración do Desfile dos Entroidos de Galicia, unha actividade que chega a nosa cidade grazas á colaboración coa Xunta de Galicia. 
     
    Trátase dunha oportunidade excelente para gozar de Entroidos de Interese Turístico coma os de Cobres (Vilaboa), Manzaneda, Verín, Xenerais da Ulla e Xinzo de Limia. Ademais, tamén participarán figuras únicas doutros Entroidos coma os Volantes de Chantada, as Bonitas de Sande (Cartelle), os Vergalleiros de Sarreaus, os Vellaróns de Riós, os Galos de A Mezquita (A Merca) e unha representación do Entroido de Samede (Paderne).
     
    O desfile sairá ás 12:30 horas desde a Praza Maior e percorrerá as rúas da zona centro da cidade (Lamas Carvajal, praza de Santa Eufemia, rúa Lepanto, praza do Ferro, Santo Domingo, Parque de San Lázaro, Paseo, Lamas Carvajal e remate, de novo, na Praza Maior).
     
    Pola tarde, a Festa trasladarase aos Xardíns do Padre Feijóo, que acollerán a actuación, de balde, dunha das agrupacións musicais con máis historia da nosa comunidade: O grupo A Roda. Será a partir das 20:00 horas.  
     
    O broche de ouro destas fin de semana será o domingo, coincidindo coa tradicional celebración da Festa dos Maios. A partir das 11:00 horas, a rúa do Paseo acollerá a colocación das esculturas de musgo, mentres que a animación musical a cargo do grupo de gaiteiros Os Furafoles e dos cabezudos comezará ás 11:30 horas.
     
    O paseo do xurado será ás 12:00 horas. Ao longo da xornada haberá xogos populares e  animación de rúa. A entrega de premios e canto de coplas será ás 18:30 horas. A festa rematará coa actuación do grupo Os d’Abaixo.
     
    Exposición Antonio Fraguas
    Pero ademais destas actividades, o hall do Auditorio de Ourense acolle entre os días 1 e 15 de maio a exposición “Antonio Fraguas, memoria dun soño”, organizada con motivo das Letras Galegas 2019.  A nosa cidade é a segunda etapa que visita esta mostra itinerante que presenta a Xunta de Galicia.
     
     
    Ourense, abril de 2018.
     
    Josep Colom, un dos grandes pianistas do noso tempo, e a prestixiosa clarinetista Ona Cardona serán os protagonistas da vindeira cita do ciclo de música Enclave de Cámara, este xoves 2 de maio no Teatro Principal desde as 20:00 horas, con entradas entre 5 e 8 euros. Entradas online á venda en www.ataquilla.com e na billeteira do teatro dende dúas horas antes do espectáculo.
     
    Interpretarán as sonatas da Op. 120 de Johannes Brahms, obras mestras coas que o compositor alemán culminou a súa traxectoria. Inspiradas polo clarinetista Richard Mühlfield e cun arrecendo a romanticismo sereno, contrastan co tormento das fantasías de Robert Schumann e co lirismo das romanzas orixinais para violín de Clara Schumann, que tamén interpretarán no Teatro Principal de Ourense.
     
    Josep Colom_ Naceu en Barcelona en 1947 e, dende que ten lembranzas, a música sempre foi algo moi importante e cotián no seu ambiente familiar. Gañar na súa mocidade os concursos internacionais de Xaén e Santander axudárono a comezar a ser coñecido no estado español. Moito máis tarde, o Ministerio de Cultura de España outorgoulle o Premio Nacional de Música e, recentemente, o selo RTVE editou un DVD co terceiro concerto de Prokofiev e un CD con obras de Chopin, Debussy e Ravel.
     
    Moitos músicos influíron e inflúen na súa evolución musical. É de salientar a influencia do compositor Joan Guinjoán que, ao seus 19 anos, o axudou a desenvolver unha maneira de abordar a música e a execución pianística moito máis racional e estruturada.
     
    Hoxe en día actúa regularmente con practicamente todas as orquestras españolas e os mellores directores ademais de ofrecer recitais nos principais auditorios e festivais de música de cámara.
     
    A pedagoxía converteuse pouco a pouco en algo moi valioso e ademais de impartir regularmente clases maxistrais, ensina desde a súa fundación en 1990 na Aula de Música da Universidade de Alcalá de Henares e en 2012 comezou unha nova etapa pedagóxica no Conservatori Superior del Liceu de Barcelona.
     
    Ona Cardona_ Natural de Maó (Illes Balears), esta magnífica clarinetista formouse no Conservatori de Menorca, na Escola Superior de Música de Catalunya, na Guildhall School of Music and Drama e na Royal College of Music de Londres.
     
    Apaixonada da música de cámara, compartiu escenario con artistas da categoría de Madzar, Huber, Pascal, Bagaría, Banse, Erdmann, Hornung, Ortega, The Soloists of London ou Cuarteto Casals. Clarinete solista da Orquestra de Cambra Illa de Menorca dende 2006, colabora con prestixiosas orquestras e traballa con recoñecidos directores como Ashkenazi, Pehlivanian, Köhler ou Petrenko.
     
    Intérprete de gran versatilidade e gañadora de numerosos premios, Ona foi convidada a festivais internacionais por todo o mundo actuando en salas de relevancia como o Palau de la Música e L’Auditori de Barcelona, Auditorio Nacional de Madrid, Wigmore Hall, St-Martin-in-the-Fields, Barbican Hall, Glyndebourne Opera, Berlin Konzerthaus, Nanjing Music Hall ou Carnegie Hall de New York.
     
    Cunha ampla experiencia docente, é convidada regularmente a impartir cursos e clases maxistrais nas que integra os principios do Método Trager. En 2012 incorpórase ao Conservatorio Superior de Música de Aragón, centro no que actualmente é profesora de clarinete e repertorio musical.
     
    O Enclave de Cámara está organizado polo Concello de Ourense e conta coa colaboración da Deputación Provincial de Ourense, do Teatro Principal e da Corporación Radio e Televisión de Galicia.
     
    Programa do concerto
     
    I PARTE
    Robert Schumann (1810-1856) | Fantasiestücke Op.73 (1849) (13’)
    I Zart und mit Ausdruck
    II Lebhaft, leicht
    III Rasch und mit Feuer
     
    Johannes Brahms (1833-1897) | Sonata en Mib M, Op. 120 Nº 2 (22’)
    I Allegro amabile
    II Allegro, molto appassionato
    III Andante con moto; Allegro
    II PARTE
    Clara Schumann (1819-1896) | Drei Romanzen op. 22 (12’)
    I Andante molto
    II Allegretto: Mit zartem Vortrage
    III Leidenschaftlich schnell
     
    Johannes Brahms (1833-1897) | Sonata en Fa m, Op. 120 Nº 1 -ano 1894-  (23’)
    I Allegro appassionato
    II Andante un poco Adagio
    III Allegretto grazioso
    IV  Vivace
     
     
    Máis información: 
    Enclave de Cámara | http://www.enclavedecamara.com
     
     
    Ourense, 21 de abril de 2019.
     
    O Auditorio de Ourense programa esta semana tres actividades tan dispares como atraentes: danza, música coral a cargo das futuras xeracións de músicos, e un que leva décadas no máis alto, Pablo Milanés. As entradas para o espectáculo de danza de Daniel Abreu e para o concerto do cantautor cubano pódense adquirir en ataquilla.com ou dúas horas antes da función na billeteira do Auditorio; a gala final de Ourencanto é gratuíta até completar aforo.
     
    Xoves 25 de abril, 20:30 horas. LA DESNUDEZ, de Daniel Abreu 
     
    Danza, público adulto. Duración: 60 min. Entradas 5€.
    Unha proposta poética sobre o saber quererse. Dúas figuras en escena, apuntando unha idea de polaridade e de viaxe desde a morte ao amor. A nudez responde a ese lugar de intimidade, onde xa non existen as preguntas. A beleza na nudez, ás veces o sublime dunha man que toca e intercambia calor e suor, e ás veces o mal querer. Podería lerse a obra de atrás cara adiante, onde aparece a viaxe e o sentido dunha unión sentimental. A obra vai do negro ao branco, dun espazo cuberto a un espazo aberto.
     
    Sábado 26 de abril, 21:00 horas. PABLO MILANÉS – Esencia 2019
     
    Todos os públicos. Entradas a partir de 45€
    Pablo Milanés, un dos principais expoñentes da canción de autor en español, recala en Ourense coa xira “Esencia”, coa que percorre escenarios de América e Europa. Nesta xira Pablo retomará temas esenciais na súa obra, clásicos reclamados sempre polo seu público –Para vivir, Ya ves, Yolanda, Si ella me falta alguna vez ou El breve espacio en que no está, e outros...– xunto con temas máis recentes que revelan a constante capacidade de crear deste artista en máis de cinco décadas de carreira.
     
    A súa versatilidade musical e a influencia da tradición cubana e americana convertérono nun artista capaz de expresarse en diversos xéneros: o bolero, o jazz, a rumba, o son, e a súa trova. Coa súa esencial condición de cantor segue cantando ao amor como sentimento primordial e temas de contido social, asuntos sempre presentes nos seus textos e que Pablo Milanés presentará nun formato máis íntimo pero non menos sorprendente.
     
    Domingo 28 de abril, 19:00 horas- Clausura III Festival Ourencanto 
     
    Todos os públicos. Acceso de balde até completar aforo. +Info.
    Ourencanto é un proxecto pioneiro en Galicia. Naceu fai xa tres anos, grazas ao apoio do Concello, da Deputación de Ourense e da Consellería de Educación da Xunta de Galicia, co obxecto de fomentar e difundir o canto coral entre os nenos e os mozos de 8 a 18 anos de Ourense e da súa provincia. A primeira edición tivo lugar en febreiro de 2017 e superou todas as 
     
     
    Ourense, 8 de abril de 2019
     
    O Auditorio Municipal de Ourense acollerá este venres, día 12 de abril, ás 20.30 horas o concerto “De Ruada entre amigos”, no que a coral ourensá celebrará o centenario do seu nacemento. As persoas interesadas en desfrutar do espectáculo poderán recoller as entradas desde mañá ate o propio venres, de 9 a 14 horas, na recepción do Auditorio. Son gratuítas, cun máximo de 2 localidades por persoa. En caso de que quedaran entradas dispoñibles, poderíanse retirar tamén o propio venres pola tarde no despacho de billetes. 
     
    O concerto, organizado polo Concello, a través da Concellería de Cultura e a Coral de Ruada, contará coa participación de agrupacións de música tradicional tan senlleiras como Rebulir, Gomez Mouro, Os Melidaos, Treixadura e Luar na Lubre, que quixeron sumarse a esta celebración, na que colaboran tamén a Deputación de Ourense, o Consello da Cultura Galega, a Consellería de Cultura e Turismo da Xunta de Galicia, a Obra Social “la Caixa”, Anpian, Cabú, Bodegas Arnoya e Estrella Galicia.
     

    Ourense, abril de 2019.

    O pasado martes se confirmaban os primeiros grupos para o cartel das festas de Ourense: Marea, o xoves 27 de xuño na explanada de Expourense, e Siniestro Total, o venres 28 na Praza Maior.

    A expectación de Marea confírmase coa boa marcha da venda de entradas, xa que tras 5 días do anuncio, xa se venderon as primeiras 1.000 entradas que estaban a un prezo de 12 euros máis gastos de xestión. A partir de agora, as seguintes 1.000 entradas terán un prezo de 18 euros (máis gastos de xestión).

    Os puntos de venda son: en www.ticketmaster.es, en www.ataquilla.com, no teléfono 902 504 500 e nos puntos de venda físicos habituais -en Ourense, na sede de Afundación, na Praza Maior-.

    Os navarros, prensentan o seu novo álbum “El azogue”, co que volven aos escenarios tras 7 anos de ausencia.

    (Información relacionada)

    As bandas de rock Marea e Siniestro Total, as primeiras confirmacións para o cartel das Festas de Ourense 2019

     

     
     
    Todas as entradas poden adquirirse en www.ataquilla.com ou unha hora (no Teatro Principal) ou dúas horas (no Auditorio) antes da función nos respectivos despachos de billetes.
     
    Durante o sábado 6 e domingo 7 de abril estarán instalados arredor do Parque de San Lázaro os tradicionais postos de rosquillas, lambetadas, abelás e produtos típicos das festas. A tradicional Queima das Madamitas será o domingo ás 13:00 horas.
     
    Ourense, 02 de abril de 2019.
    Música, teatro e actividades infantís son os eixos sobre os que pivota a oferta cultural do Concello de Ourense para esta semana. As actividades comezan este mesmo xoves con tripla convocatoria: Enclave de Cámara, Festival de Jazz e teatro para adultos. O venres, dobre ración de música (Música do Camiño e Bustamante) e teatro para bebés. E o domingo, día da Romaría do San Lázaro, haberá teatro infantil no Auditorio pola mañá, e actuación de Luis Piedrahita pola tarde.
     
    Trío Arriaga – Enclave de Cámara
    Xoves 4 de abril. 20:00 horas. Teatro Principal. Entradas: de 5 € a 8 €.
    Volve o ciclo Enclave de Cámara coa música do Trío Arriaga (Juan Luis Gallego, violín, David Apellániz, violonchelo, e Daniel Ligorio, piano), o lugar de encontro de tres músicos de recoñecido prestixio e alí onde converxen as súas traxectorias solísticas. Con concertos nos mellores festivais europeos, os seus proxectos discográficos en solitario (máis de 25 álbums), e os múltiples galardóns conseguidos en concursos nacionais e internacionais de interpretación aválannos como un trío de referencia da súa xeración. Poderemos escoitar por ver primeira en Galicia a obra dun compositor galego vivo, Eduardo Soutullo (Le sourire de Isabelle H), cuxa presenza está confirmada. [Máis info]
     
    “Invisibles”, de Redrum
    Xoves 4 de abril. 20:30 horas. Auditorio Municipal. Entradas: desde 5€.
    Un espectáculo de creación colectiva a partir da novela homónima de Monste Fajardo, que presenta ante o público diversas historias cun fío común entre elas: a violencia de xénero. O seu interese reside na exposición de historias reais protagonizadas por mulleres galegas, historias sobre malos tratos, algunhas delas xa coñecidas polo público pola súa repercusión mediática. Dirixida por Marián Bañobre e protagonizada polas recoñecidas actrices Mela Casal, Sheyla Fariña e Nieves Rodríguez, foi a gran trunfadora dos Premios de Teatro María Casares deste ano logrando as estatuíñas de Mellor Dirección, Mellor Adaptación e Mellor Iluminación. [Máis info]
     
    Diego Amador Trio - Festival de Jazz Primavera 2019
    Xoves 4 de abril. 23:00 horas. Café Latino. Entrada sen consumición: 15 euros.
    Diego Amador (piano), Rafa Díaz (baixo), Diego Amador Jr (batería e percusión). Free jazz en estado puro. En 1994 publica o seu primeiro disco, Patita Negra. En 2009 compartiu escenario con Pat Metheny, durante o Festival de Jazz de Vitoria. Ao ano seguinte xirou por Andalucía co contrabaixista Charlie Haden. Soy de las 3000, editado en 2016 coa participación de Alejandro Sanz e Óscar de León é o seu disco máis biográfico. 
     
    “Nube, nube, sol”. Teatro ao Cubo - Apego
    Venres 5 de abril. 18:00 + 19:00 horas. Auditorio. Entrada: 3€ (crianzas gratis)
    As nubes chegan. Chove. Sae o sol. A natureza esperta para encherse de cores. Ao amparo dos paraugas atoparemos agocho, bailaremos, cantaremos, e acompañados de pintorescos animais seremos parte da mesma paisaxe. A través do corpo, a xestualidade, o canto e a música, Teatro ao cubo achega á primeira infancia a maxia dos ciclos da natureza e a importancia da choiva para que todo medre. Recomendada de 0 a 4 anos
     
    Senhora del Mundo, de Camerata Piú Bassa - Música do Camiño
    Venres 5 de abril. 20:30 horas. Igrexa de Santa Eufemia. De balde.
    Música profana e relixiosa do Renacemento. Francisco Luengo e Patricia Rivero (violas de gamba), Esperanza Mara (voz) e Eneas Freire (guitarra) son Camerata Più Bassa, un grupo de xente nova cunhas ideas claras e respectuosas coa interpretación con criterios historicistas. De balde até completar aforo, no marco do ciclo Música do Camiño.
     
    David Bustamante
    Venres 5 de abril. 21:30 horas. Auditorio Municipal. Entradas: desde 25'50 €
    Co Tour Héroes está a percorrer toda España interpretando todos os éxitos da súa carreira e presentando “Héroes en tiempos de guerra”, cuxo primeiro single “Héroes” entrou directamente ao nº 1 en Itunes e roza co videoclip o millón de visitas no Youtube. Supón o regreso do Bustamante máis melódico e carismático, cun álbum no que se confirma unha vez máis como un dos artistas máis mediáticos do noso país. 
     
    Romaría do San Lázaro
    Domingo 7 de abril, horario de mañá.
    Durante o sábado 6 e domingo 7 de abril estarán instalados arredor do Parque de San Lázaro os tradicionais postos de rosquillas, lambetadas, abelás e produtos típicos destas festas. O domingo ás 11:45 horas haberá alborada cos gaiteiros Gomes Mouro e cabezudos polas rúas do Paseo, Santo Domingo e parque San Lázaro. Ás 13.00 horas será a Queima de Madamitas a cargo da Pirotecnia Josman.
     
    “Ummm!”, de Avento Teratro. Teatro infantil.
    Domingo 7 de abril. 12:00 horas. Auditorio Municipal (Sala Azul). Entradas: 3€
    Unha comedia musical para chuchar os dedos. A pastelaría de dona Remedios ten cada vez menos clientes porque a súa dependenta, Ana, só sabe facer boliños de crema. Para facer fronte a este problema, dona Remedios decide contratar un novo axudante con novas ideas para os doces que a xente está a demandar nestes días. Recomendado: de 3 a 8 anos.
     
    “Las amígdalas de mis amígdalas...” Luis Piedrahita
    Domingo 7 de abril. 19:00 horas. Auditorio Municipal. Entradas: desde 15€
    Un show de Luís Piedrahita pensado para xente esixente, aseada e con sentido do humor. Deste espectáculo díxose que é unha das obras máis enxeñosas, brillantes e poéticas do século XXI. Per se cadra foi o propio Piedrahita quen o dixo...
     
     
    Ourense, 02 de abril de 2019.
     
    O cartel das festas de Ourense 2019 comeza a despexar incógnitas coa confirmación das primeiras bandas: Marea e Siniestro Total, dous dos nomes  máis senlleiros do panorama rock, que estarán na nosa cidade o xoves 27 e o venres 28 de xuño respectivamente. 
     
    Os navarros, logo de 7 anos de ausencia, volven “coa xira máis grande endexamais contada” para presentar 'El azogue', o seu novo álbum (Adianto: En las encías). O concerto será ás 22:30 horas na Explanada de Expourense, e serán teloneados por Lülu (web oficial). Porén, as entradas poranse á venda desde as 17:00 horas desta tarde (en www.ticketmaster.es, en www.ataquilla.com, no teléfono 902 504 500 e nos puntos de venda físicos habituais -en Ourense, na sede de Afundación, na Praza Maior) a un prezo de 12 euros máis gastos de xestión as 1.000 primeiras.
     
    O segundo dos concertos confirmados é o dos vigueses Siniestro Total, que celebran 35 anos desde a súa formación “con planeamentos iconoclastas e neodadaístas”, como afirman na súa folla de promoción. Actualmente, a banda está formada por Julián Hernández (voz principal, harmónica, guitarras), único supervivente da formación orixinal, Javier Soto (voz, guitarra e coros), Ángel González (batería e percusións), Jorge Beltrán (saxo e teclado) e Óscar G. Avendaño (baixo e coros).
     
    O seu directo, potente e moi divertido, promete ser “un repaso mordaz sobre o ser humano nos últimos 35 anos”, afirman. A súa actuación será na Praza Maior desde as 0:30 horas, de balde pero con aforo reducido.
     
    Antes de Siniestro Total, ás 22:30, subirán ao mesmo escenario os N.E.O., a nova formación de Alberto Cereijo e Tino Mojón, integrantes de Los Suaves.
     
     
    Páxinas: 1 2 3 4 5 ... Último 

    Concellería de Cultura
    Concello de Ourense
    2017

     

    Rúa da Canle, 1
           32005 Ourense

     

       988 391 290

    Contacto

     

    Accesibilidade

     

    Permisos

    Cultura nas redes:

     

      Facebook

     

      Twitter

     

      Youtube

    Diseñado y programado por ACV Galaica