CONTACTO

  • Maios
  • PdoP
  • Prem poesía
  • MMOu
  • EdC
  • Volver

    Ourense, 29 de xaneiro de 2019
     
    O Auditorio Municipal vivirá unha intensa fin de semana con actividades dirixidas ao público máis novo da cidade e coa celebración do X Concerto Solidario que organiza a ONG Manos Unidas, este venres 1 ás 20:00 horas. A venda de entradas, a 5€, será destinada integramente a equipar un laboratorio médico nun centro de saúde da India, e contará coa participación da Real Banda da Deputación de Ourense, Emilio Rúa, e diferentes músicos e asociacións de danza da cidade. A organización dispón, tamén, unha fila cero para todos os interesados en colaborar coa causa.
     
    Arrerrú, de Rilo & Penadique
    Ata 4 anos. Venres 1, ás 18:00 e 19:00 horas. 35 min. 3 €.Gratuíto para bebés.
    Arrerru é unha palabra que vive na boca, non quere dicir nada, pero o A abre o asombro, o RRE a repetición, e o RU a delicadeza. As palabras acompáñanse da musicalidade da voz, dos ollos, dos xestos, do tacto…os bebés tempéranse mellor con estes apoios, nós ao pé da voz poñemos a voz dun acordeón diatónico, a voz multiplicada e asombrosa. Somos bebés, somos adultos, somos persoas da man doutras persoas. A linguaxe en singular non existe: primeiro apréndese en familia. A narración oral é a flor da vida en compañía para afrontar a onda.
     
    PI, de Otradanza
    Danza. Todos os públicos. Domingo 3, ás 12 horas. Entradas 3 €.
    Se observásemos cada elemento que nos rodea a través dun microscopio visualizariamos a simetría das súas formas, as cores nas súas ás, a repetición nas súas follas e descubririamos a perfecta arquitectura que produce a natureza.
    Se todo o que vemos ante os nosos ollos puidésemos descifralo en códigos e diseccionalo chegando ao máis minúsculo detalle das cousas que nos rodean, chegariamos ao puro infinito e avistariamos PI, un espectáculo de danza para público infantil e familiar onde entramos nun mundo cheo de curiosos insectos que ao se relacionar desvelan agochados segredos.
    PI é un espectáculo visual, onde o corpo e a súa expresividade nos transporta a un universo microscópico, fragmentado, onde o xeral se torna detalle.
     
    Ourense, xaneiro de 2019.
     
    O Concello de Ourense convoca o concurso para elixir o cartel anunciador das Festas do Entroido de Ourense 2019. O prazo de entrega de orixinais permanecerá aberto até o luns, 18 de febreiro, que este ano se celebrará na segunda semana de marzo (sendo o martes de Entroido o día 5). A persoa autora do cartel elixido recibirá un premio de 800 euros.
     
    Poderá concursar toda persoa física ou xurídica. Os traballos serán entregados a través do Rexistro Xeral do Concello nun sobre, onde figurará Concurso carteis Entroido 2019 e debaixo un pseudónimo ou lema. Os carteis levarán o lema Ourense, capital do entroido, e deberán ser obras inéditas e orixinais. Neste sentido, e para evitar circunstancias ocorridas en anteriores convocatorias de concursos, as propostas irán acompañadas dunha declaración individual na que os aspirantes se responsabilizan totalmente de que non existen dereitos de terceiros nas obras presentadas, así como dunha renuncia aos dereitos de imaxe.
     
    O cartel elixido será utilizado tamén como imaxe gráfica integrante dos anuncios na prensa escrita, carteis, mobiliario urbano publicitario, e outros elementos divulgativos que editará o Concello para promocionar o programa de actividades desta festa. 
     
    O xurado valorará o conxunto de creatividades tendo en conta a adecuación á temática, a orixinalidade e a calidade artística. O fallo farase público por comunicado oficial aos medios de comunicación e nas páxinas web do Concello e da Concellería de Cultura.
     
     
    Ourense, xaneiro de 2019.
     
    O Auditorio de Ourense amosa o talento de dous autores da nosa cidade, o do músico Luís Cepeda e o do dramaturgo Tito Asorey. En ambos casos, por partida dobre, xa que haberá dous pases dos respectivos espectáculos. As entradas están á venda en www.ataquilla.com ou no despacho de billetes do Auditorio dúas horas antes de cada función.
     
    Cepeda: xira Principios
    Con todas as localidades esgotadas para o primeiro concerto (o do venres 25 ás 21:30 horas), Luís Cepeda repite o sábado 26 ás 21:30 horas co recital da xira Principios. Entradas á venda a 32,40 euros no anfiteatro e 37,80 euros no patio de butacas.
    En 2016 recibira a proposta de concursar no programa de televisión ‘La Voz’. Pero meses despois presentouse ao cásting de Operación Triunfo, entrou na Academia e alí asimilou os valores, as técnicas e a gozar sobre o escenario.  Logo de lanzar alcanzar o número 1 nas listas de vendas de España co seu primeiro single, ‘Esta Vez’, co que tamén foi número 1 en iTunes e co que acadou 4,5 M de reproducións en YouTube, Cepeda publica o seu primeiro álbum: Principios. 
    Poderemos atopar cancións propias elaboradas coa complicidade do produtor e compositor David Sansebastián, coñecido polo seu traballo xunto a India Martínez, Antonio José ou María Parrado, entre outros moitos. En Principios tamén hai composicións antigas que nos van permitir coñecer como era ese artista anónimo e tímido que escribía por puro pracer. 
     
    O empapelado amarelo. A quinta do cuadrante.
    A nova dramaturxia de Tito Asorey e de Melania Cruz. Teatro en galego recomendado para + 15 anos. Sala Principal. Capacidade máxima 100 persoas. Dúas funcións: ás 18:00 e ás 20:00 horas. Entradas:5 euros.
    O empapelado amarelo é un espectáculo teatral unipersoal baseado no relato autobiográfico homónimo publicado no século XIX pola autora norteamericana Charlotte Perkins Gilman, un referente feminista de gran importancia na historia da literatura universal. A proposta escénica busca dialogar coas palabras da escritora desde a nosa contemporaneidade a través da palabra, o ritmo e as atmosferas visuais e sonoras nunha viaxe sensorial liberadora cara aos territorios da loucura e da lucidez.

     
     
    Ourense, 10 de xaneiro de 2019.
     
    Monicreques, monólogos e música de piano. É a oferta do Auditorio Municipal de Ourense para esta fin de semana. 
     
    'Musicreques, contacontos musical' é un espectáculo de monicreques con música en directo. A narración oral acompáñase de rimas, cantos e soportes visuais para que os nenos e nenas participen da maxia dos contos. Estes son orixinas, escritos por Loreto Pérez e ilustrados por Alma Cendán. Entre outras cantigas non faltarán Cada cousa no seu lugar, O caracol viaxeiro, Xoguemos a adiviñar, Pío e Pía ou A galiña Carmiña. 
     
    Recomendado para crianzas de 0 a 4 anos no marco do programa Apego. Haberá dúas funcións, ás 18:00 e ás 19:00 horas, e as entradas teñen un custe de 3€ anticipada (ataquilla.com) e na billeteira desde dúas horas antes da función. Crianzas, gratis.
     
    Monólogos. Mañá venres, desde as 21:00 horas, a sala principal acolle o 20º aniversario dos Monólogos-R e celebra a efeméride cun espectáculo a cargo de David Amor e Oswaldo Digón. Os monólogos contan co traballo de Touriñán. As entradas están reservadas para clientes da operadora de telecomunicacións R. As entradas resérvanse na web por orde de petición.
     
    Concerto de piano. Emilio Álvarez Cid, formado no Conservatorio Profesional de Ourense e no Superior de Música de Madrid, traballa actualmente como docente do CMUS Profesional de Vigo. Ten actuado en diferentes ciclos de concertos en Madrid, Illas Baleares, ou Londres. 
     
    O seu concerto, con entrada de balde até completar aforo, percorrerá os grandes mestres, caso de Schubert e Liszt, Beethoven ou Mendelssohn. 
     
    Ourense, xaneiro de 2019.- 

    A obra romántica de Schumann e o tango de Piazzolla interpretado a catro cordas con bandoneón, a proposta musical do Enclave de Cámara para este mes de xaneiro.
     
    Resonans nace pola conxunción de cinco músicos que pretenden difundir repertorio novo e descoñecido de cuarteto de cordas e bandoneón á vez que renden unha homenaxe ao repertorio dos grandes mestres compositores de quinteto con piano.
     
    As interpretacións destes cinco virtuosos dan nova vida a obras coñecidas do repertorio clásico. No seu recital en Ourense adicarán unha primeira parte ao piano e a catro movementos dunha obra de Schumann na que destaca a intensidade temática romántica e unha segunda parte –xa sen o piano- na que o bandoneón e o tango de Astor Piazzolla toman a palabra. De feito, a historia e obra de Piazzolla está fortemente vencellada a este instrumento de orixe popular alemá pero que se desenvolveu musicalmente no mundo do tango en Bos Aires e Montevideo.
     
    Os membros de Resonans son músicos que contan cunha variada traxectoria, tanto nos ámbitos da música de cámara e orquestra, coma no solístico, cunha carreira consolidada a nivel internacional. Vencellados con distintas orquestras como L'Orchestre de l’Opere nacional de París, Orquestra Nacional de Francia, Pelleas Orchestre de Chambre, Bandar, Cadaquès, Orquestra Sinfónica de Galicia, de San Sebastián, Nacional de Arxentina, Verbier Chamber Orchestra, etc. actualmente son titulares da Orquestra Nacional de España e da Orquestra Sinfónica de Madrid.
     
    Integrantes Quinteto Resonans
    Ane Matxaín Galdós, violín | Virginia G. Leonhardt, violín | Laure Gaudron, viola
    Gregor Lacour, violonchelo | Claudio Constantini, piano e bandoneón

    PROGRAMA DO CONCERTO
    I PARTE _ Piano e cuarteto de cordas
    Robert Schumann (1818-1856)
    Quinteto para piano e cuarteto de cordas
    op. 44 en Mi b maior
     I. Allegro brillante
     II. In modo d'una marcia. Un poco
    largamente
     III. Scherzo: Molto vivace
     IV. Allegro ma non troppo
    II PARTE _ Bandoneón e cuarteto de cordas
    Astor Piazzolla (1921-1992)
    Adiós Nonino (10’)
    Las cuatro estaciones porteñas (arranxo
    para bandoneón e cordas) (22’)
     Otoño porteño
     Invierno porteño
     Primavera porteña
     Verano porteña
     
    LIGAZÓNS DE INTERESE
    WEB | https://www.facebook.com/resonans.ensamble/
    VIDEO | https://www.facebook.com/resonans.ensamble/videos/914737158721956/
    VIDEO | https://www.facebook.com/resonans.ensamble/videos/380823709409735/
     
    MÁIS INFORMACIÓN
    Máis información con todas as novidades do ciclo en www.enclavedecamara.com, facebook, twitter
    e instagram.
     
    Entradas online á venda en www.ataquilla.com e na billeteira do teatro dende dúas horas antes do
    espectáculo.
     
    O Enclave de Cámara está organizado polo Concello de Ourense e conta coa colaboración da
    Deputación Provincial de Ourense, do Teatro Principal e da Corporación Radio e Televisión de
    Galicia.
     
    CONTACTO
    Roberto Conde | Comunicación Enclave de Cámara
    610 98 78 09 | info@enclavedecamara.com
     
    Ourense, 03 de xaneiro de 2019.
     
    A Concellería de Cultura dispón 400 entradas -gratuítas- para a Gala de Reis, este domingo 6 de xaneiro ás 19:30 horas no Auditorio Municipal. Logo de esgotarse as primeiras 400 entradas dispoñibles a través do portal ataquilla.com, o despacho de billetes do Auditorio repartirá, o propio día desde dúas horas antes do comezo do espectáculo -é dicir, desde as 17:30 horas- o resto das entradas dispoñibles.
     
    O espectáculo será unha Gala de Ópera italiana e francesa, con máis de 140 artistas no escenario interpretando pezas de Rossini, Verdi, Donizetti Mozart, Ponchieli, Bizet, Delibes, Saint-Saëns e Offenbach. Dirixida por Diego Fortes, o elenco musical estará formado, entre outros, pola soprano Anabel Real, a mezzosoprano Nuria Lorenzo, o Coro I Bimbi Appassionati, o Coro Gli Appassionati e a Orquestra Sinfónica Talenta. 

    Primeira parte: A Ópera Italiana
    G. ROSSINI - La Gazza Ladra
    Obertura
     
    W. A. MOZART - La Clemenza di Tito
    Dúo de Annio e Servilia: “Ah! perdona al primo affetto”
    ANABEL REAL, soprano
    NURIA LORENZO, mezzosoprano
     
    G. VERDI - Rigoletto
    Aria de Gilda: “Gualtier malde…Caro Nome”
    ANABEL REAL, soprano
     
    G. VERDI - Il Trovatore 
    Coro de xitanos e aria de Azucena:
    “Vedi! Le fosche notturne spoglie… Stride la vampa!”
    NURIA LORENZO, mezzosoprano
     
    G. DONIZETTI - Linda di Chamounix:
    Aria de Linda: “Oh luce di quest´anima ”
    ANABEL REAL, soprano
     
    A. PONCHIELI - La Gioconda
    Aria de La Cieca: “Voce di donna”
    NURIA LORENZO, mezzosoprano
     
    G. VERDI - Nabucco
    Coro de escravos hebreos: Va pensiero sull´ali dorate
     
    Segunda parte: A Ópera Francesa
    G. BIZET - Carmen
    Obertura
    Coro e Habaneira:
    “La cloche a sonné…L´amour est un oiseau rebelle”
    NURIA LORENZO, mezzosoprano
     
    L. DELIBES
    Lakmé - Aria des clochettes:
    “Ah! …Où va la Jeune indoue”
    ANABEL REAL, soprano
     
    C. SAINT-SAËNS
    Samson et Dalila - Aria de Dalila
    “Mon coeur s´ouvre a ta voix”
    NURIA LORENZO, mezzosoprano
     
    J. OFFENBACH - Les Contes d´Hoffmann
    Barcarolle
    “Belle Nuit, o nuit d´amour”
    ANABEL REAL, soprano
    NURIA LORENZO, mezzosoprano
     
    J. OFFENBACH - Orphée aux enfers
    Obertura
    ANABEL REAL, soprano
    NURIA LORENZO, mezzosoprano



     
     
    Ourense, xaneiro de 2019.
     
    Máis de 300 persoas acompañarán as Súas Maxestades Os Reis Magos de Oriente polas rúas de Ourense, este sábado cinco de xaneiro, na tradicional Cabalgata que este ano aposta por que a cativada poida interactuar e xogar cos integrantes da comitiva real. Está previsto que os Reis Magos cheguen a Estación Empalme sobre as 17,30 horas. Tras saudar as persoas congregadas na estación, a Cabalgata sairá ás 18:00 horas cara ao Concello percorrendo a Avenida das Caldas, a Ponte Romana, a rúa Progreso e a rúa Doutor Marañón, até chegar a Praza Maior.
     
    A temática da Cabalgata de Reis de Ourense 2019, realizada polo Concello de Ourense en colaboración coa Asociación de Belenistas de Ourense e baixo a dirección artística da produtora ourensá Boneca Lareta, ten como título "Un soño de Nadal". 
     
    As Súas Maxestades Melchor, Gaspar e Baltasar, estarán acompañadas por cinco carrozas e o desfile contará cun total de 29 agrupacións que contarán unha historia a través dos soños das nenas e dos nenos, representados con imaxes oníricas de gran beleza e potencia visual. En total serán 300 persoas, entre persoal de organización, figuración, produción, etc.
     
    Este ano, os elementos que compoñen a Cabalgata están deseñados para a favorecer a interacción entre os membros da comitiva e o público, co obxectivo de que as nenas e os nenos toquen, palpen e xoguen coas propostas que se lles ofrecerán durante o desfile.
     
    As rúas ofrecerán unha chea de sorpresas aos asistentes, como grupos de baile, cisnes inchables que xogarán coa cativada, bolas xigantes con globos e iluminación interior ou aviadores que levan nos seus aparatos agasallos e cartas para os Reis. 
     
    Tamén percorrerán as nosas rúas monicreques xigantes de peluches, ataviados cos seus pixamas, que irán de camiño as súas camas á espera de que os Reis Magos lles leven os seus regalos.
     
    A comitiva  estará encabezada pola banda da Deputación de Ourense e tamén contará coa presenza dos Bombeiros do Concello. Este ano se contará coa presenza dos Bolechas, que participarán no desfile nun bus da Televisión de Galicia.
     
    Haberá cinco carrozas: a do carteiro real, as dos tres Reis Magos e unha que porta os agasallos do Concello de Ourense. Tamén participarán no desfile antigo camión dos anos 40 con agasallos do Concello e pechará a Cabalgata un autobús eléctrico, tamén repleto de agasallos.
     
    Fogos artificiais
    Tras a chegada dos Reis a Praza Maior e o seu encontro coa cativada está previsto un espectáculo de fogos de artificio na ribeira do río Miño. A tirada de fogos artificiais será ás 20:00 horas.
     
    Ourense, decembro de 2018.
     
    O XXIII Concurso de Beléns Públicos do Concello de Ourense xa coñece os gañadores dos mellores nacementos expostos ao público na cidade durante as datas de Nadal en tres modalidades: entidades, familiares e escolares. O xurado valorou os materiais empregados e os efectos de luz, auga e outras creacións, tendo en conta o seu valor artístico, histórico e relixioso, e repartiu os 2.000 euros en premios da seguinte maneira:
     
    Na categoría de Entidades, aberta a asociacións sen ánimo de lucro e establecementos comerciais debidamente acreditados, os premios foron: primeiro premio de 400 euros, para a Residencia Nosa Señora da Esperanza; e un segundo de 300 euros para a parroquia dos Padres Franciscanos. 
     
    Na categoría Familiares, para os mellores beléns instalados en domicilios particulares: primeiro premio para a familia Vázquez Barreiro, 300 euros, e segundo para a familia Torres Santiesteban, 200 euros.
     
    Na categoría Escolar, para alumnos e alumnas de ensino non universitario: primeiro premio para Colexio Franciscanas, 300 euros, o segundo para o Colexio Cisneros, 200 euros. 
     
    O premio especial de 300 euros á creatividade e singularidade nos materiais e no deseño xeral da montaxe do Belén, foi para a Residencia Santa Cruz, grazas á montaxe de María Cristina Fernández.
     
    Os beléns deben estar á vista ou abertos ao público en escaparates, vitrinas, mostradores, recunchos, etc. En lugares como en centros de ensino, residencias ou casas particulares, a apertura ao público foi de dúas horas ao día, como mínimo, dentro do horario comercial, e sinalizados cun cartel no exterior do edificio. 

    Enlace ao listado completo.
     
    Páxinas: 1 2 3 4 5 ... Último 

    Concellería de Cultura
    Concello de Ourense
    2017

     

    Rúa da Canle, 1
           32005 Ourense

     

       988 391 290

    Contacto

     

    Accesibilidade

     

    Permisos

    Cultura nas redes:

     

      Facebook

     

      Twitter

     

      Youtube

    Diseñado y programado por ACV Galaica