CONTACTO

  • Xornadas Folclore
  • Prem Risc
  • youtubeiras
  • MMOu
  • EdC
  • Volver

    Ourense, marzo de 2019
     
    O Festival de Jazz de Primavera de Ourense chega á súa edición número 23 cunha sensacional escolma de formacións musicais, e con 11 concertos que se desenvolverán desde o día 4 de abril ate o 4 de xuño. Esta mañá tivo lugar no salón de plenos do Concello a presentación do certame, na que participaron o alcalde de Ourense, Jesús Vázquez, e a concelleira de Cultura, Belén Iglesias, xunto con Eduardo Rodríguez, responsable de Café Latino e Marco Vázquez, da Fundación Florencio Álvarez.
     
    Será unha edición con ampla presenza de jazz flamenco, da man de Diego Amador, ou dos tríos formados por Antonio Serrano, Josemi Carmona e Javier Colina, así como por este último acompañado por El Bola e Bandolero: un ano máis actuarán en Ourense recoñecidas figuras do jazz internacional, coma os saxofonistas Benny Golson e Charles McPherson, o trío que forma Dean Brown con Dennins Chambers e Hadrien Feraud, ou pianista Benny Green, unha figura emerxente como é a pianista e vocalista Sarah McKenzie, e músicos galegos da talla de Pablo Castaño, Víctor Prieto e Abe Rábade. Todos eles actuarán no Café Latino e as entradas se poderán adquirir desta tarde no propio local.
     
    O certame terá unha das súas citas estelares o venres 3 de maio, cun concerto ao aire libre que ofrecerán The Blues Giants na praza de Santa Eufemia. Unha formación integrada por un elenco de estrelas dentro do mundo do blues; Jimi Bott, Willie Campbell, Sugaray Rayford, Albert Castiglia e Nick Schnebelen, que de seguro fará as delicias dos aficionados a este estilo e amantes da música en xeral.
     
    O alcalde de Ourense, Jesús Vázquez, salientou a importancia do Festival de jazz de Primavera de Ourense: “unha cita ineludible do panorama musical español” que -dixo- “lle achega á cidade un valor engadido. É evidente que temos un festival de jazz que para si quixeran en moitas cidades. E o que é máis importante: temos un certame consolidado e sólido que cada ano enche de talento a nosa cidade e proxecta a Ourense cara ao exterior”, subliñou. 
     
    Neste sendo, manifestou: “Ourense ten un potencial cultural inmenso que debemos apoiar de xeito firme e decidido. Facémolo aunando a iniciativa privada, xerme deste festival, coa colaboración institucional, e así apostamos pola música como motor cultural, turístico... en definitiva, a música como motor económico”, asegurou Jesús Vázquez, quen felicitou o excelente traballo da organización deste festival por parte de Café Latino e Fundación Florencio Álvarez, xunto co Concello.
     
    Ourense, 27 de marzo de 2018.
     
    A Concellería de Cultura presenta, para as vindeiras tres fines de semana, o ciclo Música do Camiño, “unha actividade que quere dinamizar a vida cultural e social da nosa cidade”, en palabras do alcalde de Ourense, Jesús Vázquez, “que pretende unir o noso patrimonio físico e monumental coas músicas que chegan á cidade grazas á nosa incomparable posición dentro das rutas a Santiago de Compostela”, dixo.

    Acceso ao programa.
     
    “O Concello de Ourense ten a obriga de promover unha oferta variada no musical, e de calidade”, adiantaba Anxo F. Saborido, técnico de Cultura, na rolda de prensa. “Unha oferta que non é de masas, por iso se celebra nun lugar axeitado como é a Igrexa de Santa Eufemia”, matizaba. O primeiro concerto, este venres 29 de marzo, será 'Stabat Mater', a cargo do trío Orsini, Alicerce e Dapena, con música de Haydn ou Boccherini. O venres 5 de abril será a quenda do 'Senhora del Mundo', música relixiosa e profana do Renacemento a cargo de Camerata Piú Bassa. O último concerto será o sábado 13 de abril, 'Salve Regina', a mans de The New Barroque Times, un conxunto que explora e reinventa o universo sonoro dos séculos XVII e XVIII empregando instrumentos e prácticas da época.
     
    O rexedor quixo agradecer o esforzo da Concellería de Cultura por manter viva “esa chama que fai de Ourense unha cidade viva e dinámica”, dixo, “unha cidade cun extraordinario patrimonio, continuamente alimentado pola influencia de visitantes a través da Vía da Prata – Camiño Mozárabe”. Cómpre salientar que Música do camiño se une a outras propostas de calidade contrastada coma o Enclave de Cámara, que por certo volve o 4 de abril co Trío Arriaga, o xa mencionado Pórtico do Paraíso ou o Ciclo Lírico.
     
    Concertos:
     
    Venres 29 de marzo: 'Stabat Mater'
    Orsini, Alicerce e Dapena, 20:30 horas. Igrexa de Santa Eufemia.
     
    Venres 5 de abril: 'Senhora del Mundo'
     Camerata Piú Bassa, 20:30 horas. Igrexa de Santa Eufemia.
     
    Sábado 13 de abril: 'Salve Regina'
    The New Barroque Times, 20:30 horas. Igrexa de Santa Eufemia.
     
    Ourense, marzo de 2019.-

    O Museo Municipal de Ourense acolle, até o 28 de abril, a nova obra da pintora e creadora ourensá Ana Ferreiro, '20 mujeres'. Trátase dunha colección de óleos sobre lenzo que achega unha mensaxe comprometida, pero sen afastarse un ápice da realidade. 
     
    Así o podemos ver na perfección das formas, no exacto emprego dos pigmentos que converten as imaxes reais en obras de grande solidez, pero abertas a esa historia que percebe quen se asoma á súa arte. Unha arte inmensamente necesaria para poder percibir máis aló dos retratos do Instagram, ler sobre o que nos é alleo, interpretar o que os outros, os que moitas veces están ao noso lado, senten e plasman a través da arte.
     
    En '20 mujeres' poderemos pasear por retratos que van acompañados de cadansúa historia, unha historia de loita e de traballo polas súas ideas, polos seus dereitos. 
     
    Ana Ferreiro, que forma parte da familia do Museo Municipal desde 2010, sente a chamada da pintura como medio de expresión: a súa pintura é unha forma de interpretar a realidade. E pinta mulleres porque “é muller, e feminista”. 
     
     
    Ourense, 20 de marzo de 2019.
     
    Velaquí a programación de actividades do Auditorio Municipal para os vindeiros días. A maiores, a axenda cultural inclúe os concertos do Festival Internacional de Música Pórtico do Paraíso: o venres 22 ás 20:30 horas na Igrexa das Caldas, Apollo5 (Reino Unido); o sábado 23 ás 19:30 horas na igrexa de Santa Mariña de Augas Santas de Allariz, LaReverdie (Italia), e o domingo 24 ás 19:00 horas no Teatro Principal de Ourense, peche desta duodécima edición con Vienna Clarinet Connection (Austria).
     
     
    •TANATORIUM, de Félix Albo.
     
    Xoves 21, 20:30 horas. Público adulto. Entradas 5 €.
     
     
    Un home entra no portal dun velorio xusto no momento no que marcha a luz. A escuridade, o forzado silencio e a incómoda humidade que se respira na entrada evócalle un soliloquio co que percorre trazos de distintas vidas ata chegar á súa propia. Espectáculo cheo de risos, emoción e tamén preguntas ás que ninguén ten obriga de contestar. Sobre o escenario bailan a vida e a morte ao ritmo das gargalladas do público.
     
     
    •Encontro orquestral e coral dos CSM de Galicia 
     
    Venres 22, 20:30 horas. Entrada de balde. 
     
     
    O Encontro reunirá 150 intérpretes con idades comprendidas entre os 18 e os 23 anos que conformarán unha grande Banda Sinfónica con Coro, conducidos polo profesor Juan Carlos Díaz.
     
     
    •STEPS, de Silvia Alonso
     
    Sábado 23, 20:30 horas. Entradas 8 €. 
     
     
    “Steps” é o terceiro espectáculo da artista ourensá e representa o resultado dunha evolución , e o seu propio nome responde ao dobre significado de “ pasos” ou “escaleira”, como reflexo dun labor de procura de novos campos vocais. Revisión de temas dos anos 70 e 80, que coinciden coa etapa final brillo do funk, o nacemento da música disco, e o rock sinfónico. Exitos de autores e intérpretes como Steve Wonder, Police, Queen ou Michael Jackson, serán revisados cunha óptica nova e matices propios, fuxindo da réplica dos orixinais, arranxos musicais, orixinais e exclusivos. 
     
    Durante o concerto presentarase o vídeoclip autobiográfico que presenta a transformación vital de Silvia Alonso, a partir do seu encontro coa música.
     
     
    •COUSAS DE NENOS, de Ian & Elisa
     
    Domingo 24, 12:00 horas. Sala Azul. Familiar. 45 minutos. Entradas 3 €
     
     
    Espectáculo indicado para toda a familia. Tanto nenos como non tan nenos desfrutarán deste espectáculo cheo de colorido e ilusión. Cunha mestura de maxia e sombras chinesas Ian e Elisa farán que o público se somerxa nun mundo imaxinario onde nada é imposible.
     
     
    •CYRANO DE BERGERAC
     
    Domingo 24, 20:00 horas. Todos os públicos. Entradas 16 €.
     
     
    Premio á Mellor Interpretación Masculina (José Luis Gil) e á Mellor Dirección Escénica (Alberto Castrillo-Ferrer) nos XXVI Premios Teatro Rojas. O Cyrano de Bergerac teno todo: aventura, paixón, tensión, humor, beleza, amor e desamor. É un clásico entre os clásicos e un moderno entre os modernos. Cyrano é moito máis que unha obra ou unha personaxe. É o emblema nacional galo. O home valente ata o infinito pero acovardado ante a muller que ama, o "negro" do guapo da historia, Christian, ao que escribe versos en segredo para a súa amada Roxanne. É unha oda ao enxeño e ao amor, é a forza do seu verso, o seu descaro e sutileza, un verso bisbeado ou lanzado como un dardo, un verso áxil e profundo, popular e erudito, descarado e vital, teno todo.
     
    Esta obra converterase nun símbolo do teatro francés e universal, nun novo Quíxote dramatúrxico representado polo mundo enteiro, unha mostra do poder da palabra tanto na vida como na escena. A obra, escrita polo novo e ousado poeta Edmond Rostand coñeceu un éxito sen precedentes que se estende ata os nosos días.
     
    Nesta ocasión o televisivo actor José Luis Gil ponse na pel de Cyrano, acompañado de Ana Ruiz, Álex Gadea, Nacho Rubio, Ricardo Joven, Rocío Calvo e Joaquín Murillo. Dirección: Alberto Castrillo-Ferrer. Máis info sobre a obra.
     
     
    Ourense, 20 de marzo de 2019.
     
    Un total de 150 intérpretes de entre 18 e 23 anos subirán, este venres ás 20:30 horas, ao escenario do Auditorio Municipal. Todos estudantes dos Conservatorios Superiores de Música de Vigo e da Coruña, que se reúnen desde hoxe en Ourense para preparar un encontro orquestral e coral que se plasmará na realización de tres concertos, o primeiro deles na nosa cidade, antes de partir cara á Coruña, onde actuarán o sábado 23, e a Vigo, o domingo 24. “Será unha oportunidade para aprender e para gozar da música”, declarou o alcalde de Ourense, Jesús Vázquez Abad na presentación. “Dúas caras da mesma moeda, a cultura, que sempre nos ofrece un valor engadido”, dixo.
     
    O encontro, baixo o amparo da Consellería de Educación, Universidade e Formación Profesional a través das súas direccións xerais, ofreceralles aos ourensáns a posibilidade de gozar “dunha espectacular montaxe, instrumental e coral”, en palabras de Esteban Valverde Corrales, director do Conservatorio Superior de Música de Vigo, pero tamén servirá para que os futuros músicos intercambien experiencias a través dunha intensa convivencia e o encontro fronte á fronte co público, que pasa por ser “unha das maiores motivacións dos estudantes”, dixo Valverde Corrales.
     
    O Encontro reunirá a aproximadamente a 150 intérpretes que conformarán unha grande Banda Sinfónica con Coro, conducidos polo profesor Juan Carlos Díaz. A entrada é de balde -o despacho de billetes do Auditorio estará aberto desde dúas horas antes do concerto- até completar aforo.
     
    Programa: 
    Sinfonía No. 3 - Circus Maximus, de John Corigliano (n.1938) 35'
    I. Introitus 
    II. Screen/Siren 
    III. Channel Surfing 
    IV. Night Music I 
    V. Night Music II 
    VI. Circus Maximus 
    VII. Prayer 
    VIII. Coda: Veritas 
     
    Five Hebrew Love Songs, de Eric Whitacre (n.1970) 10:30'
    I. Temuna (A Picture)
    II. Kala Kalla (Light Bride)
    III. Larov (Mostly) "Mostly,"
    IV. Eyze Shelleg! (What Snow!) 
    V. Rakut (Tenderness)
     
    Sinfonía No. 4 en Mim Op. 16 (IV. Movemento) de Joly Braga Santos (1924-1988) 20:00' 
     
    Orixinal para Orquestra e Coro. Transcrición para Banda de Fernando De Sousa Alves.
     
     
    Ourense, 15 de marzo de 2019.
     
    O Concello de Ourense abre unha nova convocatoria do concurso para elixir o cartel anunciador da Festa dos Maios 2019, que se celebrará o vindeiro 5 de maio na cidade. A Xunta de Goberno Local do pasado xoves aprobou as bases e a convocatoria do certame, que está dotado cun premio de 800 euros para o autor ou a autora da obra gañadora. O prazo de presentación de propostas estará aberto ate o día 3 de abril. Do mesmo xeito, a xunta de goberno local celebrada hoxe aprobou as bases para os concursos de coplas e maios, cuxo prazo de presentación permanecerá aberto até o 30 de abril.
     
    O concurso do cartel está convocado co obxectivo de fomentar a participación nas actividades que forman o ciclo festivo da cidade. Está aberto á participación de toda persoa física ou xurídica, que deberá presentar traballos inéditos e orixinais -acompañados dunha declaración responsabilizándose de que non existen dereitos de terceiras persoas-, e representativos da festividade na cidade de Ourense. 
     
    Coplas e maios
    As tradicionais coplas e maios convócanse de forma aberta para todas as asociacións culturais, colexios, grupos, colectivos veciñais, entidades e calquera persoa que o desexe, sempre que sexa maior de idade. 
     
    En canto aos maios, haberá as seguintes modalidades: o enxebre, tradicional e figurativo que representa pirámides, conos ou cruceiros (300 euros de premio); o artístico, que recrea, cos elementos tradicionais, escenas cotiás, monumentos ou obras de arte do pobo ou da cidade, personaxes, etc (500 euros); o creativo, que é a representación dos maios enxebres podendo utilizar calquera técnica ou material (200 euros); e o infantil, realizado por nenos e nenas, menores de 18 anos (200 euros).
     
    En canto ás coplas, haberá dúas modalidades, as infantís (200 euros de premio) e as de adultos (200 euros). Valorarase a retranca, a composición, o ritmo e a linguaxe utilizados, así coma o emprego da melodía tradicional e que as estrofas vaian enlazadas.

    (Inscrición e bases completas)
     
    Ourense, 14 de marzo de 2019.
     
    O Museo Municipal de Ourense inaugura, esta tarde, dúas novas exposicións de Mónica Figueira. Baixo o seudónimo de Môf la sinvergüenza, a artista ourensá presenta 'Or@perucita' e 'Taras', dúas propostas diferentes entre si pero igualmente comprometidas nas que afloran os sentidos, a paixón, os medos, o sexo e a vida. Permanecerán na sala III (segundo andar) deste espazo expositivo até o 28 de abril.
     
    'Or@perucita' é unha transgresión dos canons, unha volta de folla a ese personaxe feminino da nosa literatura infantil. Unha instalación para un non-conto feito a golpe de óleos e de madeira. Un percorrido polos cinco sentidos “que todos deixamos un pouco de lado no día a día”, advirte a autora, e unha chamada a volver usalos en plenitude. Cinco sentidos que “nos levan ao sexto sentido, que é o sexo sentido”, di.
     
    'Taras', pola súa banda, é unha viaxe a través das follas en branco dun libro, unha sorte de xogo das agachadas. Ao ir enchendo as follas do libro, a artista vai escapando do irremediable peso da vida e acaba por cantar vitoria, unha vitoria que é "por min e por todas as miñas compañeiras”.
     
    A exposición inaugúrase este xoves 14 ás 19:00 horas e poderá visitarse en horario de 11:00 a 13:30 horas e de 18:30 a 21:30 horas, de martes a sábados, e de 11:00 a 13:30 horas os domingos. Os luns, o Museo Municipal (rúa Lepanto 8) permanece pechado.
     
    Ourense, marzo de 2019.
     
    O espectáculo de danza Entresoños, da compañía de Fran Sieira, iniciará pasado mañá, xoves, unha fin de semana cargada de cultura que inclúe o inicio da edición número 12 do Festival Internacional de Música de Ourense Pórtico do Paraíso, a estrea de Mariana, de Palmyra Teatro, no marco das actividades co gallo do Día Internacional das Mulleres, e unha nova cita co teatro infantil con E-book: As idades do libro.
     
    EntreSoños (14 de marzo, 20.30h, Auditorio) é unha obra de baile e música tradicional galega de 70 min de duración, cun elenco artístico de 3 bailadores/cantadores: Fran Sieira, Aida Tarrío e Xisco Feijoó, ao son da música do compositor e músico multidisciplinar Anxo Pintos, e dende unha visión contemporánea a través dos ollos do director artístico David Vilariño, bailarín contemporáneo e coreógrafo.
     
    Ao día seguinte estrearase a obra de teatro Mariana, orixinal de José Ramón Fernández e dirixida por David Ojeda, a cargo da Compañía Teatral Palmyra. Na obra, dentro da programación de actividades que organiza o Concello para celebrar o Día Internacional das Mulleres 2019, a actriz ourensá Lucía Álvarez meterase na pel de Mariana Pineda, a muller que se enfrontou ao rei Fernando VII. Será o venres, 15, ás 20:30 horas con entrada é libre até completar o aforo.
     
    Ese mesmo día, o grupo vocal italiano Odhecaton abrirá a XII edición do Festival Internacional de Música de Ourense Pórtico do Paraíso cun concerto na Catedral de Ourense, ás 21:00 horas. Será o primeiro dos sete concertos que nos levarán ao Mosteiro de San Clodio, de Leiro, á igrexa de Santa Mariña de Augas Santas, en Allariz, á de Santiago das Caldas, na propia cidade, e que finalizarán coa actuación do cuarteto austríaco Vienna Clarinet Connection, o día 24 no Teatro Principal.
     
    Completará a semana a nova cita coa programación familiar do Auditorio dos domingos ás 12:00 horas, con E-book. As idades do libro, de Spasmo Teatro. A obra ofrece a máis fascinante e disparatada historia do libro e os seus protagonistas. Un espectáculo con vocación didáctica, educativa e moi divertida, que se adentra no apaixonante universo do saber, dos grandes descubrimentos e da evolución da escritura e os seus soportes até o día de hoxe, culminando coa aparición do E-book. Chea de retranca, os mellores efectos visuais e sonoros, e grandes doses de humor xestual a cargo Spasmo.
     
    Ademais, desde o xoves, poderase visitar no Museo Municipal a nova proposta artística de Mónica Filgueira: Or@perucita / Taras.
     
    Páxinas: Primeiro ... 2 3 4 5 6 ... Último 

    Concellería de Cultura
    Concello de Ourense
    2017

     

    Rúa da Canle, 1
           32005 Ourense

     

       988 391 290

    Contacto

     

    Accesibilidade

     

    Permisos

    Cultura nas redes:

     

      Facebook

     

      Twitter

     

      Youtube

    Diseñado y programado por ACV Galaica