CONTACTO

  • Maios
  • PdoP
  • Prem poesía
  • MMOu
  • EdC
  • Volver

    Ourense, 20 de novembro de 2018.
     
    A terceira edición do festival SÓLODOS EN DANZA, que se celebra no Auditorio os 23 e 24 de novembro, reunirá en Ourense os mellores expoñentes da danza contemporánea internacional. En dous días desfilarán polo espazo municipal artistas de 12 comunidades autónomas españolas, pero tamén de Portugal, México e Costa Rica, entre outros. Porén, o SóLODOS en DANZA quere ser un espazo aberto para a participación de todo o mundo: os profesionais, que contarán con clases maxistrais; a mocidade, que terá un programa exclusivo e outorgará o premio xove; e as persoas maiores de 60 anos, para as que haberá obradoiros de danza.
     
    Maruxa Salas, a metade de SóLODOS, resaltou na presentación a oportunidade que supón este festival para coñecer os novos valores da danza: “o festival acollerá a presentación de 13 obras de creadores noveles iberoamericanos”. Ademais, o venres 23 de Novembro ás 20.30 horas celebrarase a gala SóLODOS EN DANZA cos seguintes artistas e compañías convidadas: Tejido Conectivo (Andrea Amor e Miguel Ángel Punzano); Iron Skulls (Agnés Sales, Héctor Plaza, Diego Garrido, Adrián Vega e Moisés-Moe) e Cía Exire con Alba Fernández Cotelo, gañadora da pasada edición do Certame e protagonista do cartel da presente edición.
     
    O 24 de Novembro ás 20.30 horas terá lugar o Certame de Creación de Dúos e Solos en Danza Contemporánea, onde concursarán 6 coreografías. A coreografía ganadora será premiada co premio Sólodos en Danza, e ademais entregaranse diferentes premios e bolsas entre os artistas participantes. Un dos premios será outorgado polo público asistente ao certame, quen votará para seleccionar a súa coreografía preferida e entregarase o Premio do Público. Este mesmo día e antes da entrega de premios poderemos gozar das actuacións da compañía Iron Skulls e do artista Arnáu Pérez, ganador do Premio Xove na pasada Edición do Festival.
     
    Entre as actividades paralelas do festival, atopamos un Foro profesional, onde estarán presentes proxectos como Espacio Espiral-Laboratorio Escénico y de Artes Afines de Santander, Les Naves de Gijón, Centro de Danza de Zaragoza, Red a Cielo Abierto (Red de Festivales de Calle de España), Festival Trayectos de Zaragoza, Festival ContraDANÇA Festival de Danza e Movimiento Contemporáneo de Covilha en Portugal e Sólodos en Danza (Costa Rica / Ourense): Proxectos culturais que promoven o traballo escénico contemporáneo e favorecen a mobilidade de creadores noveis.
     
    Danza para todas as idades
    A concelleira de Cultura, Belén Iglesias, destacou “a vertente didáctica do certame” na presentación desta mañá. Non en van, o 23 de Novembro pola mañá máis de 400 nenas e nenos da provincia de Ourense teñen un programa exclusivo para eles, no que compartirán e poderán dialogar cos creadores sobre as súas obras. Serán eles, precisamente, quen outorguen o Premio Xove a unha das 6 obras do certame de creación de dúos e solos. Eles seleccionarán, tamén, a súa coreografía gañadora.
     
    Os obradoiros de danza contemporánea para maiores de 60 anos, abertos e gratuítos, son unha das novidades desta edición. Erick Jiménez, a outra metade de SóLODOS, salientaba que “son experiencias que xa funcionaron noutros lugares -con persoas con mobilidade reducida, maiores, nenos en perigo de exclusión...- e que a medio prazo poden dar os seus froitos”. 
     
    Neste sentido, Jiménez confía en que os diferentes diálogos e vocabularios da danza cheguen a canta máis xente mellor a través de o traballo cos diferentes grupos de idade.
     
    Máis info: www.solodos.es
     
    Máis programación no Auditorio, esta semana.
    O domingo, 25, ás 12 horas volverá a programación infantil cunha obra de teatro para cativada desde os 5 anos: Adeshoras, de Berrobambán. Nesta obra, a compañía regresa ao territorio mudo, á linguaxe visual, ao humor sen palabras que lle valeu o recoñecemento internacional, da man de Paula Carballeira e Nuria Sanz. A protagonista do seu conto. Amodo, xogando, recupera o fío que a leva a recoñecerse no espello, grazas a quen a visita por sorpresa, a deshora, rompendo as súas rutinas, facendo que se sinta nena, unha nena perdida que por fin se atopa. As entradas custan 3 euros en venda anticipada e 4 no despacho de billetes.
     
    Tamén o domingo, ás 19 horas, música tradicional galega: “Nurtha, Nord, Norte…Noró”, a cargo de Xabier Díaz e as adufeiras de salitre.
    Di Xabier Díaz acerca deste espectáculo que “o norte é case un estado emocional para min. Gústame o seu frío, a auga, a humidade e a música. No norte hai música en tódalas cousas. É unha música sólida, ancestral e serena. Este disco é como un retrato do meu timeline recente, como unha necesidade de rematar a talla e de mellorar o método”. Participan 10 músicos e as entradas, a partir de 14 euros, pódense adquirir en www.ataquilla.com.
     
    Ata o 30 de novembro, no vestíbulo inferior pódese ver a exposición "Paisaxes e personaxes", homenaxe a María Victoria Moreno”. A Xunta de Galicia réndelle tributo a autora no marco da programación institucional Letras Galegas 2018, cun proxecto expositivo itinerante que visita 11 localidades galegas. A mostra baséase en ilustracións dos principais personaxes e escenarios de oito libros de María Victoria Moreno creadas por Nuria Díaz, Lucía Cobo, Xan López Domínguez, Jacobo F. Serrano, Jacobo Muñiz, Mari Fe Quesada, Bea Lema e Dani Padrón, baixo a coordinación de David Pintor. A exposición pódese visitar, de balde, no horario público do Auditorio: de luns a venres entre as 8.30 h e as 14.30 h.
     
    Ourense, novembro de 2018.
     
    A terceira edición do Ciclo Lírico de Ourense será “unha homenaxe a dúas das mulleres imprescindibles na historia da lírica universal”. Así presentaba o alcalde de Ourense, Jesús Vázquez, a programación deste ciclo de concertos que se abrirá, o venres 23 de novembro, cun concerto a cargo de Monsterrat Martí Caballé e de Cecilia Lavilla Berganza, herdeiras de dúas das voces máis grandes de todos os tempos. Até o 14 de decembro, Teatro Principal e Liceo acollerán o máis amplo abano de estilos relacionados con este xénero musical.
     
    O ciclo quere atraer a atención de todos os públicos e divulgar este tipo de música que, malia contar con moitos adeptos na nosa cidade, aínda é unha grande descoñecida para o grande público. Con ese ánimo, o sábado 24 de novembro haberá, no Liceo, unha conferencia a cargo das sopranos Berganza, Teresa e Cecilia L., aberta ao público. O resto do programa completarase con outros tres concertos que nos suporán “unha oportunidade única de vivir a lírica desde a máis rica das heterodoxias, no referente a estilos e xéneros”, en palabras de Vázquez Abad.
     
    “Ourense está nunha dinámica moi europea”, indicaba o profesor Roberto Relova, do Conservatorio Superior de Música de Vigo, “a de reivindicar a historia e a memoria dos grandes artistas. A cutura en Ourense foi construíndo, pouco a pouco, esta xoia”, en referencia ao programa do ciclo. 
     
    Porén, este ano abrirase o programa aos valores en alza da música galega: nomes coma os do dúo formado polo tenor Pablo García-López e o pianista Aurelio Viribay, o 30 de novembro, ou o de Tamara Lorenzo Gabeiras, pianista formada en Londres, residente en Zúric e actualmente integrante da ópera de Chicago, darán moito do que falar nos anos vindeiros. “Poderemos dicir, con orgullo, que pasaron por Ourense”, adiantaba o rexedor, que tamén agradeceu o apoio da Deputación Provincial e de Abanca, representados na rolda de prensa polo vicepresidente Rosendo Fernández e polo delegado territorial, Rubén Saavedra, respectivamente. 
     
    As entradas pódense adquirir en www.ataquilla.com a un prezo desde 5€.
     
    Ourense, novembro de 2018.
     
    O VI ciclo de Música de Cámara de Ourense "Enclave de Cámara" trae, este mércores 7 ao Teatro Principal Ourense, o dúo formado polo violinista alemán Daniel Röhn e a pianista ucraína Milana Chernyavska. O concerto vén cun poderoso programa, cargado de paixón, musicalidade e virtuosismo e no que interpretarán obras de célebres compositores como Leclair, Debussy ou Mendelssohn, pero tamén de compositores menos coñecidos coma o noruegués Christian Sinding, que deixou un legado de obras excepcionais para seren interpretadas en concertos de cámara.
     
    O concerto comezará ás 20:00 horas, e as entradas oscilan entre os 5 e os 8 €. Entradas online á venda en www.ataquilla.com e na billeteira do teatro dende dúas horas antes do concerto.
     
    Daniel Röhn. Malia a súa xuventude, é un dos máis destacados talentos de hoxe en día. Terceira xeración dunha familia de portentosos músicos, destaca pola súa impresionante técnica  e por recorrer ás tradicións musicais do pasado. Non sorprende, polo tanto, que Ruggiero Ricci, un dos grandes virtuosos do violín do século XX apoie con entusiasmo este novo artista afirmando que “o seu xeito de tocar lembra ao dos vellos Mestres”. 
     
    Ten participado coma solista en prestixiosos festivais e foi convidado por Lorin Maazel, Ricardo Muti e Pekka Salonen para tocar en varias ocasións coa Orquestra Sinfónica de Radio Bavaria e coa SWR Sinfónica de Radio Stuttgart.
     
    Milana Chernyavska é outro dos grandes talentos ao piano hoxe en día. Conta cunha impresionante carreira coma solista que a levou a tocar nas salas máis importantes do mundo. Apaixonada tamén pola música de cámara, tocou xunto a Julia Fischer, Daniel Müller-Chott, o Vogler Quartet entre outros e fundou o Milander Quartet. Actualmente é profesora de Dmytro Choni na University of Music and Performing Arts de Graz (Austria), flamante gañador este ano do Concurso Internacional de piano Santander Paloma O'Shea.
     
    Como dúo, Röhn e Chernyavska tocaron en salas como a Berlin Philharmonie, a Sala da Filharmónica de Múnic, a Festspielhaus Baden-Baden, o Centro Cultural de Lucerna, o Concertgebouw Amsterdam, Cité de la Musique en Paris, Southbank Centre e o Wigmore Hall. Tamén o fixeron nos principais festivais europeos como son o Festival de Rheingau, o Festival Mecklenburg-Vorpormmern, o Festival de Lucerna ou o Festival de Verbier.
     
    Programa do concerto
     
    I PARTE
    Jean-Marie Leclair (1697-1764) | Sonata en Re maior, Op. 9, n.º 3 (11')
    Claude Debussy (1862-1918) | Sonata para violín e piano
    Christian Sinding (1856-1941) | Suite im alten Stil, Op. 10
     
    II PARTE
    Ernest Bloch (1880-1959) | Nigun de Baal Shem, B. 47
    Felix Mendelssohn (1809-1847) | Sonata en fa maior (1838)
     
    Máis información con todas as novidades do ciclo, no espazo web do ciclo, www.enclavedecamara.com, e tamén en facebook, twitter e instagram.
    O Enclave de Cámara está organizado polo Concello de Ourense e conta coa colaboración da Deputación Provincial de Ourense, do Teatro Principal e da Corporación Radio e Televisión de Galicia.
     
     
    Ourense, 31 de outubro de 2018.
     
    O Auditorio de Ourense ofrece, esta fin de semana, dúas obras dirixidas ao público familiar, un musical e unha obra de monicreques para o público infantil.
    Peter Pan, aventura No País De Nunca Xamais, de Animagic.
     
    Sábado 3 de novembro. 18:00 horas. Todos os públicos. Musical. Entradas desde 14€. Menores de 2 anos, se non ocupan asento, non necesitan entrada.
    Sinopse: Peter á un neno orfo que soña con ver de novo a súa nai. Un día, un grupo de piratas secuestran varios nenos para levalos a traballar ao País de Nunca Xamais, pero Peter pronto descubrirá que as cousas suceden por algo e o seu destino está en Neverland. Todo se desenvolve nun brillante mundo de fantasía, cheo de cor, acción, emoción e divertidas cancións en directo, que farán desta unha agradable experiencia para toda a familia.
     
    Fíos, de Baobab teatro. 
    Domingo 4 de novembro. 12:00 horas. Público Infantil máis de 3 anos. Entradas: anticipada 3€ en www.ataquilla.com, despacho de billetes 4€
    Fíos é un espectáculo que fía palabras, tece contos, calceta historias e cose puntada a puntada cada nota de música. Un taller de costura será o responsable de que diferentes historias acariñen os nosos oídos, unha modista que cose e cose recibe visitas esperadas e outras inesperadas pedíndolle axuda, coas súas puntadas descubrirá personaxes que penden de Fíos e queren viaxar,soñar, namorar e contar os seus segredos.
     
    Nominada aos Premios MAX 2013 por "mellor autoría teatral galega".
     
    Ourense, outubro de 2018.
     
    O Concello de Ourense presentou o primeiro pratos do ciclo festivo na cidade: o Samaín, “a tradicional festa de fin do verán que, como xa é costume nos últimos anos, vén cun programa cargado de actividades por e para os máis pequenos, pero da que desfrutamos todos os públicos por igual”, en palabras do alcalde de Ourense, Jesús Vázquez. Celebrarase na tarde do mércores, 31 de outubro cun menú composto polos seguintes ingredientes: 1.000 quilos de cabazas, obradoiros e un desfile polas rúas e prazas do centro histórico da cidade: Saco e Arce, Imprenta, Manuel Sueiro e a praza Maior.
     
    “É unha ocasión, a do Samaín, que nos vai permitir unha das máximas deste goberno municipal, que é a de realizar actividades interxeracionais”, apuntaba o rexedor en rolda de prensa, “porque a saúde dunha cidade está nas súas rúas, e esta festa é realmente indicativa do ben que se vive en Ourense”, dixo.
     
    Baixo o paraugas do cartel elaborado polo deseñador Cristóbal Aguiló, gañador do concurso elaborado pola Concellería de Cultura, o programa de actividades comezará ás 17:30 horas co reparto de cabazas na asociación de veciños da Cidade Vella, na rúa Liberdade. A partir de aí, obradoiros de baleirado de cabazas, de maquillaxe, animación e o desfile cara á praza Maior que, como novidade, albergará un concerto de Dj e terá límite de aforo por motivos de seguridade, como xa se vén facendo nas festas de Ourense, por exemplo.
     
    O programa completo para o día Samaín é o seguinte:
     
    17.30 horas. Praza Saco e Arce. 
    Taller de Baleirado de cabazas.
     
    17.30 horas. Praza da Imprenta. 
    Microteatro, pequena representación teatral interactiva, onde se lles dará a coñecer aos cativos a orixe do Samaín. Tres pases de 15 minutos cada un. 

    17.30 horas. Praza da Imprenta. 
    Obradoiro Os sons na noite. As nenas e nenos terán a oportunidade de facer un amuleto que produce son e que empregarán no desfile para espantar os malos espíritos.

    17.30 horas. Praza Manuel Sueiro. 
    Obradoiro de maquillaxe para espantar os malos espíritos.

    17.30 horas. Praza Manuel Sueiro.
    Obradoiro de elaboración de chapas.

    19.00 horas. Desfile de Cabazas. 
    Apágase a luz das rúas e comezará o desfile terrorífico animado musicalmente pola AOFT Gomes Mouro. Percorrido: praza da Imprenta, rúa Colón, Bispo Carrascosa e Praza Maior. Ao rematar baile e festa na Praza Maior con Uxía Lambona e a Banda Molona. 
    --
     
    00.00 horas. Praza Maior. 
    Pinchada Samaín, especial Terror. Actividade dirixida ao público maior de idade. Até as 3:00 horas. 
    As carpas dos obradoiros e a Praza Maior estarán decoradas para darlle un ambiente máis terrorífico á Festa do Samaín. 
     
    Ourense, outubro de 2018
     
    O Museo Municipal de Ourense acolle a exposición Píxel, de Omar Pérez. Unha colección na que o caricaturista, ilustrador e deseñador nado en Arxentina e radicado en Ourense vai 20 anos, realiza unha crítica social e do momento que se vive na actualidade. A mostra reúne case 50 ilustracións en formato pequeno e mediano, nas que Omar propón unha viaxe ao redor do mundo visitando exposicións, mostras, certames, campañas solidarias, homenaxes, con temas recorrentes como a contaminación, o cambio climático, a migración, Europa, a paz, Trump, ou as redes sociais… Mais tamén denuncia situacións non tan presentes na nosa axenda: as vodas de nenas, os abusos e a violencia, a pobreza, ou a explotación infantil, que debuxados nas súas viñetas van directas ao corazón do espectador. A exposición permanecerá aberta ao público, na sala 3, ate o día 9 de decembro.
     
    Omar Pérez (Villa María, Córdoba. Arxentina (1956), é licenciado en Belas Artes,  humorista gráfico, caricaturista, ilustrador e deseñador gráfico.
    En 1980 publica os seus primeiros traballos en Hortensia. Colabora en diversas publicacións arxentinas: Noticias, El Diario, Diario Puntal, El País, Río Revuelto, El Garrotazo, Impulso... Desde 1989 radica en Ourense, e publica practicamente en toda a prensa galega: La Voz de Galicia, Orense Diario, Xornal Diario, Diario 16, La Región, Mundiario.com. Tamén é ben coñecido na cidade por ter liderado, xunto a Benito Losada, a Bienal de caricatura que durante moitos anos se celebrou no Museo Municipal.
     
    Asistiu e participou en exposicións e mostras logrando premios e distincións por todo o mundo. Realiza exposicións individuais en Arxentina, España, Portugal, Francia, Italia. Rei do Humor en Italia 2011. Xurado internacional en España, Portugal, Turquía, Chipre.., representante para España de UWC (Unión de debuxantes do mundo).
     
    Ourense, outubro de 2018.
     
    O Auditorio de Ourense acolle, esta fin de semana, dous espectáculos con acento portugués: o sábado 27, ás 20:30 horas, a CTB - Companhía de Teatro de Braga escenifica A Antiga Mulher, unha exploración de universos de luz e dos máis sombríos das nosas identidades, alí onde se confunden o equilibrio do feminino e do masculino nunha confrontación esencial cos nosos valores e as nosas aspiracións máis profundas. 
     
    A compañía lusa presenta, no centro do espectáculo, unha historia tan antiga como a da propia humanidade e, daquela, dunha modernidade constantemente renovada: Romy, antiga amante de Frank -casado vai dúas décadas con Claudia- bate na porta do apartamento do matrimonio. Ela quere encontrar o seu primeiro amor, o home que lle prometera 24 anos atrás que a amaría para sempre. É a historia da intimidade dun matrimonio e da problemática das relacións familiares, un retrato dunha sociedade contemporánea en sufrimento.
     
    Sala principal. + 14 anos. Idioma: portugués. Duración: 90 minutos. Entradas, 5€ en www.ataquilla.com e 6€ na billeteira, dúas horas antes da función.
    A CTB é unha estrutura profesional de produción teatral. Fundada en 1980 no Porto, está radicada en Braga desde 1984 no ámbito dun proxecto artístico que cruza as novas dramaturxias coa experimentación sobre o gran legado dramatúrxico da humanidade: os clásicos. A Antiga Mulher, estreada o 12 de outubro en Braga, é a nova montaxe da formación portuguesa, con 38 anos de traxectoria e 129 montaxes no currículo. A obra é orixinal de Roland Schimmelpfenning, un dos autores máis representados na actualidade.
     
    A CTB desenvolve tamén con regularidade accións de formación de públicos, no ámbito do teatro, así como accións de sensibilización e creación de novos públicos, especialmente da mocidade. A representación do sábado forma parte dun intercambio cultural coa cidade de Braga, pola que a compañía ourensá il Maquinario Teatro representará Resaca no Theatro Circo, un dos maiores escenarios do país.
     
    Martiña soñadora
    O domingo 28, na habitual cita co teatro infantil ás 12:00 horas, o Auditorio seguirá con acento portugués grazas ás cancións de “Martiña soñadora”, un musical para toda a familia con letras en galego e ritmos brasileiros, portugueses, do rock & roll e mesmo do blues. 
     
    Martiña Soñadora está interpretada por Sabela King (voz e ukelele) e por Carlos Gil Fandiño (piano e voz), desprende grandes doses de optimismo e anima a que todo o público, novos e adultos, bailen e canten desde as súas localidades.
     
    Sala principal. Todos os públicos. Duración 55 minutos. 
     
    Entradas, 3€ anticipada (www.ataquilla.com) e 4€ na billeteira, dúas horas antes da función.
     
    · O premio do concurso para o deseño do cartel dos Magostos estará dotado con 800 €, e o de Samaín con 600 €.
    · Os orixinais, en formato electrónico ou impreso sobre cartón pluma de tamaño 50x70 cm, irán acompañados dunha declaración de responsabilidade da súa autoría e do seu carácter inédito.
    · O xurado valorará o conxunto de debuxos presentados tendo en conta a adecuación á temática, a orixinalidade e a calidade artística. A decisión do xurado será inapelable.
    · Bases completas.
     
    Ourense, outubro de 2018.
     
    A Concellería de Cultura abre o prazo de presentación dos carteis anunciadores para as festividades de Samaín - Festa de Todos os Santos, 31 de outubro -, e a dos Magostos – 11 de novembro -. Poderá concursar toda persoa física ou xurídica, excepto as persoas gañadoras da anterior edición no caso de que aceptaren formar parte do xurado. O premio do concurso para o deseño do cartel dos Magostos estará dotado con 800 €, e o de Samaín con 600 €. O prazo de presentación de orixinais permanecerá aberto até o venres 19 de outubro.
     
    Os traballos serán entregados no Rexistro Xeral do Concello nun sobre, onde figurará “Concurso carteis Samaín 2018” e “Concurso carteis Magosto 2018”, acompañados dunha declaración de responsabilidade da súa autoría e do seu carácter inédito, e debaixo un pseudónimo ou lema, así coma cos datos de identificación, enderezo e teléfono. Só se abrirán os sobres das obras que resulten seleccionadas. O xurado valorará o conxunto de debuxos presentados tendo en conta a adecuación á temática, a orixinalidade e a calidade artística. A decisión do xurado será inapelable.
     
    Os deseños presentados quedarán en poder do Concello de Ourense, mentres que os deseños gañadores serán empregados como imaxe das festividades de Samaín e dos Magostos. Os restantes poderán ser recollidos nos 30 días seguintes á finalización do concurso, deberán achegar o xustificante que reciben en rexistro. 
     
    Características
    Os carteis deberán de incluír obrigatoriamente os seguintes textos: “Samaín: Mércores, 31 de outubro 2018” e “Magostos: Domingo, 11 de novembro de 2018, Ourense. Festa de interese turístico”. Os orixinais, que deberán ser inéditos, serán presentados en dous tipos de soporte: Gravados en alta resolución nun CD (lexible en PC), en formato editable (Adobe Photoshop, Illustrator ou Freehand). Ou impresos e pegados sobre cartón pluma debidamente protexido de tamaño 50x70 cm. adoptando forma vertical.
     
    Ademais, terán un espazo libre igual ou superior a 5 centímetros de alto no seu borde inferior para que, con carácter anterior á impresión, a Concellería de Cultura poida incorporar os logotipos e lendas que considere oportunos. O cartel elixido será utilizado tamén como imaxe gráfica integrante dos anuncios na prensa escrita, carteis, mobiliario urbano publicitario, e outros elementos divulgativos que editará o Concello para promocionar o programa de actividades destas festas. 
     
    As persoas participantes, polo feito de concursar, aceptan todos os puntos contidos nas bases (que se publicarán na páxina web ourense.gal e en ourensecultura.com).
     
    Páxinas: Primeiro ... 3 4 5 6 7 ... Último 

    Concellería de Cultura
    Concello de Ourense
    2017

     

    Rúa da Canle, 1
           32005 Ourense

     

       988 391 290

    Contacto

     

    Accesibilidade

     

    Permisos

    Cultura nas redes:

     

      Facebook

     

      Twitter

     

      Youtube

    Diseñado y programado por ACV Galaica