CONTACTO

  • Ciclo Lírico
  • Expo La Caixa
  • EdC
  • Auditorio
  • Volver

    Ourense, maio de 2018.
     
    O Parque Botánico de Montealegre acollerá os días 1, 2 e 3 de xuño, ás 19,00 horas, a representación da obra de danza contemporánea “Corps Sonore”. Trátase dunha iniciativa da compañía SóLODOS en coprodución co Centro Coreográfico Galego, que conta coa colaboración da Axencia Galega de Industrias Culturais, Agadic, e do Concello de Ourense.
     
    O alcalde Jesús Vázquez salientou durante a presentación desta actividade que se trata dunha “experiencia artística inédita, fusión de danza e de natureza nun espazo único da cidade”  e invitou a todos os ourensáns “que se acheguen a danza como unha forma de expresión e de Arte única que reivindica o seu espazo”.
     
    “Imos respirar arte polos catro costados con artistas que farán realidade aquela cita da bailarina e coreógrafa estadounidense Agnes de Mille que aseguraba que “as expresións máis auténticas da xente están no seu baile a na súa música, porque o corpo nunca mente”, dixo o rexedor.
     
    O alcalde invitou aos ourensáns a acudir os días 1, 2 e 3 de xuño ao Parque Botánico de Montealegre “que nos últimos meses viviu un incremento de visitantes e é un espazo que debe ser coñecido por toda a cidadanía porque é o mellor balcón da cidade”.
     
    A presentación contou coa presencia do director da Agadic, Jacobo Sutil, e dos responsables da compañía artística Erick Jiménez (dirección artística) e Maruxa Salas (coreografía).
     
    Os responsables da actividade animaron aos cidadáns a “acudir con calzado deportivo” a Montealegre porque “a actividade percorrerá durante hora e media distintos puntos do Parque”.
     
    Pola súa banda o director do Agadic, Jacobo Sutil, salientou a “especial colaboración do Concello de Ourense á hora de impulsar actividades culturais que teñen que ver coa danza”.
     
     
    O espectáculo Corps Sonore
     
    Corps Sonore é o primeiro dos tres proxectos seleccionados para coprodución co Centro Coreográfico Galego en ser estreado, os días 1, 2 e 3 de xuño ás 19 horas no Parque Botánico Montealegre.
     
    Corps Sonore preséntase como un itinerario no Parque Botánico Montealegre de Ourense definido por intervencións de danza de Erick Jiménez, esculturas sonoras de Will Menter, accións de Jane Norbury e música de François Merville no espazo e na paisaxe ao longo do itinerario proposto para transitar. Todas as intervencións están creadas in situ e o seu marco natural forma parte do espectáculo.
     
    Ourense, maio de 2018.
     
    O Auditorio municipal de Ourense acollerá esta semana unha variada programación que aposta polo teatro para adultos e o musical, e que ofrece a  posibilidade de visitar as obras que participaron na Exposición Bienal de Pintura do Eixo Atlántico, que estará aberta até finais do mes de maio. As entradas para as dúas citas programadas pódense adquirir en www.ataquilla.com.
     
    A programación de actividades comezará o xoves, ás 20,30 horas, coa representación da obra teatral “A Leituga”, que aborda en clave de humor o conflito familiar que se produce nunha familia ante a proximidade da morte dos seus membros de maior idade.
     
    Trátase dunha montaxe dirixida por Víctor Duplá e que contará cun elenco de luxo con actores da talla de Antonio Durán “Morris”, Mercedes Castro, María Vázquez, Xosé Barato e Federico Pérez.
     
    As entradas terán un prezo de 5 euros e poderanse mercar na web ataquilla.com.
     
    O domingo, 27 de maio, ás 12,00 horas terá lugar a representación da obra “Fantasía coas palabras” , un espectáculo musical que corre parello á edición dun disco do mesmo nome editado por Sonárboré na primavera de 2017. O espectáculo conta con música en directo e acción teatral a cargo de María Faltri, Jorge Juncal e Juansy Santomé. A duración da obra é de 60 minutos. Entradas en www.ataquilla.com, dende tres euros.
     
    Por outra banda o vestíbulo do Auditorio acollerá até finais de maio a exposición da Bienal de Pintura do Eixo Atlántico, resultado do concurso que cada dous anos organiza o Eixo e que percorre os principais puntos da eurorrexión Galicia-Norte de Portugal.
     
     
    Ourense, maio de 2018.
     
    A concelleira de Cultura, Belén Iglesias, vén de anunciar en rolda de prensa os primeiros nomes do cartel das Festas de Ourense 2018, que se abrirán co pregón da polifacética artista ourensá Cristina Pato, e no que pasearán grupos de música pensados para satisfacer os gustos “de todas as idades e sensibilidades”, en palabras da titular de Cultura. Porque “o obxectivo”, dixo, “é pasalo ben e desfrutar das festas”. 
     
    As actuacións da Praza Maior serán ás 22:30 horas, gratuítas e co aforo reducido por motivos de seguridade. Polo de agora (a concelleira anunciou “máis sorpresas”), os confirmados son: 
     
    Sábado 23 de xuño, Andrés Suárez. Músico de Ferrol que pasou de tocar no Metro de Madrid a encher estadios coma O WiZink Center da capital e a converterse nun dos artistas máis queridos polo público amante da música. Desde una ventana (2017) é o seu sexto e último disco até o momento, un álbum cociñado a fogo lento no que se dan cita o rock, o folk e mesmo o fado.
     
    Domingo 24 de xuño, Antonio José. Con só 23 anos pero unha intensa e traballada carreira artística, perfílase coma unha das novas promesas do panorama musical. En menos de 3 anos converteuse no artista emerxente pop máis importante do país e acumula xa 4 discos de platino e un Disco de Ouro, 8 semanas Nº1 en listas de venda oficiais, continuos Nº1 en itunes e unha interminable xira de máis de 200 concertos con máis de 250mil persoas víronlle en directo. 
     
    Martes 26 de xuño. Los Secretos. A banda española liderada polos irmáns Urquijo segue, 40 anos despois da publicación do seu primeiro álbum, interpretando sobre os escenarios as súas cancións, convertidas xa en himnos para varias xeracións. Posiblemente, as letras máis catadas sobre o desamor en lingua castelá.
     
    Xoves 28 de xuño. Xestreu e Treixadura. Logo de actuaren nos actos do Día da Muller, as cinco cantareiras de Xestreu voltan para amosarnos sobre as táboas a fusión das cinco formas diferentes de pensar, de sentir e de interpretar as músicas da nosa terra. Partindo da recollida, adaptación e interpretación das cantigas dos diferentes pobos do mundo, Xestreu farannos viaxar polo mundo sen saír da Praza Maior. 
     
    Treixadura, pola súa banda, leva sendo referencia da música tradicional galega desde 1992. O grupo redondelán vén de celebrar os seus 25 anos en activo con Vendimia Tarda (2015), gravado en directo no Teatro García Barbón de Vigo. Con seis discos no mercado e un estilo propio baseado nos ritmos, nas cantigas e nos instrumentos tradicionais galegos, Treixadura ten participado, entre outros, con Rodrigo Romaní, Leilía, Tanxarina ou Quico Cadaval.
     
    Sábado 30 de maio. Guadi Galego e Ramón Mirabet. O mundo está parado (Fol Música 2016) é o último traballo desta polifacética artista, unha das voces máis recoñecidas e recoñecibles da música galega. Gaita e voz principal con Berrogüetto, participou noutros proxectos colectivos coma Nordestin@s, Espido ou aCadaCanto. Sons con arrecendo pop que garante un potente directo acompañada dunha banda de moitos quilates: Isaac Palacín (batería e percusión), Guillerme Fernández (guitarra), paco Charlíon (baixo) e Carlos Abal (guitarra). 
     
    A carreira de Ramón Mirabet, nado no seo dunha familia de músicos e artistas de circo, comezou aos tres anos compoñendo as súas primeiras melodías. A súa traxectoria pasa das beiras do Sena, en París, ao talent show 'Nouvelle Star' da televisión e de aí ao teatro Olympia. Instalado na bohemia do bario de Montmartre, edita o seu primeiro álbum, Happy Days (Warner 2013).  Pero o seu camiño está máis ligado á procura: atoparémolo en Brighton (Inglaterra), e tamén nas Highlands de Escocia, pero sen esquecer as rúas e os bares da súa Barcelona natal. Home Is Where the Heart Is (Warner 2016) é o seu último traballo, presentado nunha xira de máis de 90 concertos e que foi vista por máis de 140mil persoas, entre as que cómpre destacar as máis de 20mil que asistiron á praia do Bogatell nas festas da Mercé. As melodías positivas e o ritmo das cancións converterano nunha das revelacións das festas de Ourense.
     
    Máis confirmacións: Ademais destas, tamén se avanzaron outros nomes coma os de Rosendo Mercado e Dvicio, que actuarán no xardín do Posío (entradas, 5€ anticipada e 7€ en billeteira), e a nómina de orquestras (na rúa do Progreso, de balde): Combo Dominicano, o xoves 28 de xuño ás 01:00 horas; Panorama, o venres 29 ás 01:00 horas; Olympus, sábado 30 de xuño ás 01:00 horas; e París de Noia, o domingo 1 de xullo ás 21:00 horas.
     
    Ourense, maio de 2018.-
    O Museo acolle máis de medio centear de  óleos, moitos deles de grande formato, entre os que podemos atopar retratos, paisaxes, figuracións abstractas e mesmo interpretacións en clave colorista de cadros de Picasso ou Velázquez. Un percorrido pola psicodelia e unha viaxe introspectiva no particular universo de Alva. 
    Ata o vindeiro día 10 de xuño podemos ver a obra deste caricaturista, ilustrador, pintor, retratista e muralista. Todas as facetas de Alva recollidas nesta nova exposición na que atoparemos moitos dos elementos da cultura pop, pero tamén claras reminiscencias da cultura máis popular, recollida no subconsciente colectivo desta cidade. (Máis información no seguinte enlace)
     
    Ourense, maio de 2018.-

    Logo de avaliar os 40 maios presentados e de escoitar as Coplas, o xurado dos Maios 2018 procedeu á votación dos traballos, resultando premiados os seguintes:
     
    PREMIO MAIO ARTÍSTICO: "As meigas feiticeiras", de Óscar González López (500€)
     
    PREMIO MAIO ENXEBRE: "O maio en pé", de A Galleira (300€)
     
    PREMIO MAIO CREATIVO: "Contra as invasoras", da Asociación Grupo Scout  (200€)
     
    PREMIO MAIO INFANTIL: "Maio Vistahermosa", do CEIP Vistahermosa (300€)
     
    PREMIO MELLORES COPLAS: "A ronda da Auriense", da Ronda da Auriense (200€)
     
    PREMIO MELLORES COPLAS INFANTÍS: "Nós e pingadas", da ANPA Pía da Casca (200€)
     
    O xurado quixo agradecer a ampla participación e destacar a calidade e orixinalidade dos maios e coplas. Ademáis, quixo deixar constancia da alta implicación dos cativos nesta festa tan tradicional, recomendando a ampliación dos premios, tanto nas modalidades como no número de premios por cada unha delas.
     
    Ourense, 29 de abril de 2018.
     
    O barroco volve a Ourense co sempre innovador Ensemble Praeteritum e a súa versión “senza fine” das Catro Estacións de Vivaldi. O conxunto instrumental, formado por sete músicos e creado polo violinista Pablo Suárez Calero en 2011, destaca pola busca da novidade no xeito de afrontar a música. Mediante fortes contrastes dinámicos e expresivos, improvisacións, cadencias, recitativos e unha procura constante de cores no son, o Ensemble interpreta a partitura creando unha beleza especial e persoal destinada ao goce do público. 
     
    A Ourense chegan coa versión “senza fine” das Catro Estacións de Vivaldi. Unha das obras que maior percorrido tivo na música e que serviu para que, mediado o século XX, grupos de cámara comezasen a difundir as músicas do barroco. Na versión que propoñen para Ourense, e acorde coas praxes interpretativas da época de Vivaldi, cada estación e movemento están ligados entre si con cadencias ao violín ou á tiorba, resultando unha obra sen interrupción. Foi esta versión precisamente a obra escollida para a publicación do seu primeiro traballo discográfico no ano 2014 co selo QTV Classics. 
     
    En 2015 crearon o seu primeiro festival na cidade de Alcalá de Henares: o “Festival de Música Praeteritum”. Na tempada seguinte, o Ensemble inaugurou o ciclo “Música en domingo & Concertos de mediodía” na Fundación Juan March e actuou nos principais festivais do estado español, así como nas sociedades filharmónicas de Lugo e Pontevedra. 
     
    Escorba o xingro!*
    Antes do concerto, ás 16.00 h, os músicos do Ensemble Pablo Suárez Calero (concertino violín), Laura Delgado (violín) e Paula García (viola), participarán no que será o último encontro da tempada con estudantes do Conservatorio Profesional de Música de Ourense. Ao longo deste ano de colaboración co Conservatorio, referentes da música de cámara como Cristina Pato, Nicholas Cords ou o Dúo Cassadó debateron e compartiron a súa experiencia profesional con estudantes, profesores e público xeral. 
     
    (*) No barallete dos músicos, “Escoita o músico!”

    PROGRAMA DO CONCERTO Vivaldi Senza Fine
    Duración: 60 min. Sen pausa. Antonio Vivaldi (1678-1741) 
     
    Overtura, Concerto di Parigi Sol menor 
    I Allegro | Cadence
    A primavera, Violín Concerto Mi maior RV269 
    I Allegro | II Largo | III Danza Pastorale | Cadence* | Adagio Spiccato 
    Verán, Violín Concerto Sol menor RV 315 
    I Allegro non molto | Cadence* | II Adagio e piano- Presto e forte | III Presto | Arpeggiata antec autummus** 
    Outono, Violín Concerto Fa maior RV 293 
    I Allegro | II Adagio molto | Cadence* | III Allegro | Cadence* 
    Inverno, Violín Concerto Fa menor RV 297 
    I Allegro non molto | II Largo | III Allegro 
     
    Máis información
    www.enclavedecamara.com
    ensemblepraeteritum.org 
     
    O Enclave de Cámara está organizado polo Concello de Ourense e conta coa colaboración da Deputación Provincial.
     
    Ourense, 28 de abril de 2018.-
     
    A deseñadora Mayka Gómez Ruiz gañou, con Maia bona dea -na mitoloxía romana, a deusa da fertilidade-, o concurso de carteis para ilustrar a festa dos Maios, dotado con 800€ de premio en metálico. O xurado, composto por cinco integrantes (dous deseñadores gráficos independientes, dous técnicos da área de Cultura e un da de Comunicación) elixiu por unanimidade a proposta gañadora de entre os 20 traballos presentados a concurso.
     
    Técnicos municipais analizaron de xeito pormenorizado, desde a tarde de onte, as bases do concurso despois de ter coñecemento de que a imaxe gañadora tiña un gran parecido cunha obra de 2009 dunha ilustradora norteamericana. Logo desa análise, os técnicos municipais concluíron que o cartel gañador é unha “interpretación creativa” e, polo tanto, un traballo inédito amparado pola lexislación vixente.
     
    A figura da “interpretación creativa” consiste en utilizar unha imaxe xa existente (e moitas veces icónica, como por exemplo A Gioconda ou As Meninas) para adaptala ao contexto de dita interpretación. Neste caso, esa adaptación veu da man da coroa como elemento artístico e representativo dos Maios en Ourense. Tanto por esta adaptación, como por tratarse dun debuxo a man sen emprego de medios dixitais, está garantido o carácter inédito da obra, que é o criterio básico do concurso de carteis convocado neste ano.
     
    Non obstante, desde a Concellería de Cultura anúnciase que os criterios fixados nas vindeiras bases que regulen concursos de carteis serán máis estrictos co fin de garantir e blindar a absoluta orixinalidade dos traballos que concurran.
     
     
    Ourense, 27 de abril de 2018.
     
    A deseñadora ourensá Mayka Gómez Ruiz gañou, con Maia bona dea -na mitoloxía romana, a deusa da fertilidade-, o concurso de carteis para ilustrar a festa dos Maios, dotado con 800€ de premio en metálico. O xurado, composto por cinco integrantes (dous deseñadores gráficos, dous técnicos da área de Cultura e un da de Comunicación) elixiu por unanimidade a proposta gañadora de entre os 20 traballos presentados a concurso. 
     
    Salientou o xurado o soporte elixido para a presentación, un debuxo a man sen emprego de medios dixitais, pero tamén a reivindicación da coroa como elemento artístico e representativo dos Maios en Ourense, a figura feminina e que rompese coa liña dos traballos presentados nos últimos anos.
     
    Porén, o xurado quere facer unha mención especial ao traballo artístico e á execución plástica de moitos dos traballos presentados para esta convocatoria, pois presentáronse propostas de moita calidade artística.
     
    Páxinas: Primeiro ... 3 4 5 6 7 ... Último 

    Concellería de Cultura
    Concello de Ourense
    2017

     

    Rúa da Canle, 1
           32005 Ourense

     

       988 391 290

    Contacto

     

    Accesibilidade

     

    Permisos

    Cultura nas redes:

     

      Facebook

     

      Twitter

     

      Youtube

    Diseñado y programado por ACV Galaica