CONTACTO

  • Outono con apego
  • Ciclo Lírico de Ourense
  • Solodos
  • Apego
  • MMOu
  • EdC
  • Volver

    Ourense, 20 de novembro de 2019.-
     
    A cidade de Ourense converterase un ano máis en referente da danza contemporánea coa 4º edición de SóloDOS en Danza. O certame desenvolverase desde mañá, xoves 21, até o sábado 23 de novembro, cunha chea de actividades que lle achegarán a danza contemporánea a todo tipo depúblicos.
     
    A Sala Valente acolleu esta mañá a presentación do certame “unha plataforma feita desde Ourense e para Ourense, cunha programación exclusiva e pensada para a cidade”, subliñaron en nome da organización Erick Jiménez, e Maruxa Salas, bailaríns e coreógrafos, que participaron na presentación xunto co concelleiro de Cultura, Mario González. O evento contará con compañías de 6 países e 9 comunidades autónomas españolas. Será no Auditorio Municipal de Ourense e estenderá o seu programa de formación ao Laboratorio Escénico Coop da Coruña o día 24.
     
    Esta edición contará con artistas de Galicia, País Vasco, Madrid, Cataluña, Asturias, Valencia, Santander, Zaragoza, Granada, Costa Rica, Ucraína, Chile, Ecuador e Arxentina entre outros. Durante o Festival presentaranse 13 obras de creadores noveles Iberoamericanos.
     
    O 21 e 22 de Novembro pola mañá, máis de 500 nenos e mozos da provincia de Ourense terán un programa exclusivo para eles, compartirán e poderán dialogar cos creadores sobre as súas obras. Eles outorgarán o PREMIO XOVE a unha das 10 obras semifinalistas do certame de creación de dúos e solos. Eles seleccionarán a súa coreografía gañadora, premio que se entregará o día 23 na Final do Certame.
     
    Os días 21 e 22 ás 20.30 horas, terán lugar as Actuacións das dúas Semifinais do Certame. Nestas semifinais se seleccionarán as coreografías que pasarán á final e que actuarán de novo o sábado día 23.
     
    O 23 de Novembro ás 20.30 horas terá lugar a Final do Certame de Creación de Dúos e Solos en Danza Contemporánea onde concursarán as coreografías seleccionadas para a final. A coreografía gañadora será premiada co PREMIO SóLODOS EN DANZA / OURENSE / 2019 con Xira Costa Rica. Ademais se entregarán diferentes premios e bolsas entre os artistas participantes. Un dos premios outorgarao o público asistente ao certame, votará para seleccionar a súa coreografía preferida e entregarase o PREMIO DO PÚBLICO. O Certame Internacional de Coreografía Burgos & Nova York PREMIARÁ unha peza para que pase á semifinal de seu Certame en 2020, será o PREMIO Certamen Internacional de Coreografía Burgos - Nova York 2020. 
     
    Este mesmo día 23 e antes da entrega de premios poderemos gozar das Actuacións das Compañías Convidadas Victoria P Miranda, Milki Lee e Nacho
    Cárcaba, gañador da pasada edición co Premio Sólodos En Danza / Ourense / 2018.
    Outras actividades do Festival:
     
    Mestres distinguidos impartirán clases maxistrais para estudantes de danza e talleres especializados para profesionais e público xeral.
     
    O Festival organiza un Foro profesional, onde estarán presentes proxectos de Danza como Red A Cielo Abierto (Red de Festivales de Calle de España) e Festival Trayectos de Zaragoza.
     
     
    Ourense, novembro de 2019
     
    O concelleiro de Cultura, Mario González, e o técnico Anxo Saborido presentaron esta mañá o IV Ciclo Lírico Ourense 2019, que se desenvolverá os 3 próximos venres (15, 22 e 29 de novembro) ás 20.00 horas no Teatro Principal. Trátase dun “ciclo musical de calidade”, en palabras do concelleiro, que pretende achegar á cidadanía “unha proposta musical diferente á que en xeral non se pode acceder con tanta facilidade coma a outras”, explicou Saborido. O programa, explicaron, combina tres estilos diferentes e complementarios coa finalidade de que o público ourensán teña a oportunidade de tomar contacto coa variedade do xénero lírico.
     
    Comezará o día 20 con lírica galega, da man da soprano Susana de Lorenzo e o pianista Alejo Amoedo, experto na recuperación de repertorio lírico galego.
    Continuará o día 22, con lírica medieval, da man da formación Luz y Norte, formada por Víctor Sordo, tenor, Sara Águeda, arpa histórica e Calia Álvarez, viola de gamba. O programa Veo yo los ojos bellos está formados por tons humanos do barroco español e textos cervantinos.
     
    A última cita, o día 29 será coa lírica internacional máis coñecida, co barítono Josep Ramón Olivé e o pianista Francisco Poyato, que interpretarán composicións de Schubert, Mahler, Strauss ou Tchaikovsy, entre outros autores.
     
    As entradas pódense adquirir a través da páxina web www.ataquilla.com con prezos entre os 5 e os 8 euros, que pretenden facer este espectáculo accesible a todos os públicos.
     
    Esta actividade está organizada pola Concellería de Cultura coa colaboración da Deputación Provincial de Ourense e polo Teatro Principal.

    Programa do Ciclo Lírico de Ourense.
     
     
    Ourense, 9 de novembro de 2019
     
    O Auditorio Municipal de Ourense acollerá o xoves, 14 de novembro, A amnesia de Clío, unha sensacional ópera que agrupa unha escolma de grandes nomes das artes escénicas galegas: A compañía Voadora, a Real Filarmonía de Galicia, o Orfeón Terra Nosa, o compositor santiagués Fernando Buide (no 2018 o autor español vivo máis interpretado polas orquestras de todo o Estado), ou o artista ourensán Fernando Epelde, que asina o libreto. 
     
    Da dirección de escena encárgase a pontevedresa Marta Pazos (que dirixiu este ano unha ópera para o Teatro Real, e que o ano que vén dirixirá para o Teatro Nacional de Košice, en Eslovaquia) e o director musical é Paul Daniel, durante 5 anos director da English National Opera. A soprano é Raquel Lojendio, primeira espada nacional que traballou coa Berliner Philarmoniker, a Seattle Synphony Orquestra ou a BBC Philarmonic. A ópera, que se estreará o domingo, 10 en Santiago de Compostela -con entradas xa esgotadas- representarase en Ourense en formato concerto.
     
    En palabras da compañía, A amnesia de Clío inspírase no lado máis extraño e pintoresco da idea mesma de Historia, e sérvese tamén da parte máis inexplicable da política como ollada do mundo e como ferramenta para entender o lugar que ocupamos neste planeta.
     
    Protagonizada por unha curiosa galería de políticos, moitos deles xa retirados, esta peza envólvese dos protocolos e da excéntrica mecánica do universo político, para ofrecer unha mirada inesperada sobre a perspectiva patriarcal e as forzas e personalidades que converten os pasos en pegadas e as frases en citas. Unha experiencia á que asistimos guiados por unha figura insólita que se nos presenta esta ópera como xeradora dun cambio universal, condutora dun plan internacional para cambiar un paradigma: o da musa e o do artista.
     
    Amnesia de Clío é unha produción de Voadora en coprodución co Centro Dramático Galego co apoio do Consorcio de Santiago, a Consellería de Cultura e Turismo, a Deputación da Coruña, os concellos de Santiago de Compostela e A Coruña, e a Asociación de amigos da ópera de Santiago. Un proxecto realizado coa bolsa Leonardo a Investigadores e Creadores Culturais 2017 da Fundación BBVA. Creado en residencia co apoio do INAEM – Ministerio de Educación, Cultura e Deporte, Fundación SGAE Galicia e Teatro Réplika.

    Entradas en ataquilla.com.
     
     
    Ourense, 7 de novembro de 2019
     
    A formación ourensá Brañas Folk abrirá mañá, venres, 8 de novembro, ás 20.00 h na Praza Maior unha cuádrupla cita coa mellor música galega, organizada polo Concello dentro da programación do Magosto 2019.  O Concello aposta este ano por potenciar a festividade ampliando a súa programación de actividades co obxectivo de animar a cidadanía para participar na festa e converter Ourense nun referente cultural e lúdico. Así, durante 4 días, subirán ao escenario da praza, ademais do grupo ourensán, outros nomes de tanto prestixio como Susane Seivane, Leilía e Os de Abaixo.
     
    O fundador de Brañas Folk, Manuel Brañas, o concelleiro de Cultura, Mario González e o técnico Álex Hermida presentaron o concerto da formación ourensá, un proxecto musical creado en 2002 por Manuel Brañas despois da súa andadura coa famosa agrupación “Arco da Vella”, partícipe xunto aos grandes nomes da música galega do que foi a auxe da música folk en Galicia, aló polos anos oitenta. No concerto de mañá interpretarán temas do seu último traballo, no que ten un marcado protagonismo da cidade: Danza das Burgas, e avanzarán composicións do seu próximo disco. Entre eles, un que está dedicado precisamente ao Magosto: Trullada da castiñeira, que popularizara o Cuco de Vellle.
     
    Ante as previsións de chuvia para os próximos días, o Concello instalará unha carpa na Praza Maior que protexerá o público nos concertos, e outra no Parque do Barbaña para o Magosto do día 11. 
     
    Tras Brañas Folk, esta cita coa música galega continuará o sábado 9, coa actuación de Susana Seivane, unha das máis virtuosas gaiteiras do noso tempo, que despois de 8 anos de silencio discográfico, presentará o seu novo traballo FA, unha obra de introspección no eido da maternidade, os convencionalismos, a familia e a plenitude persoal. O domingo, 10 subirá ao mesmo escenario Leilía agrupación formadas por 6 mulleres que se xuntan para recuperar a tradición oral galega, que celebran o seu trixésimo  aniversario. En Cantan elas botan a vista atrás e conectan as súas orixes coa actualidade. A cuádrupla cita rematará o luns, 11, con Os de Abaixo, grupo que xorde en 2010 co obxectivo de promover e animar festas tradicionais na contorna de Compostela, que ofrecerán unha escolma musical. Todos os concertos serán ás 20.00 h na Praza Maior.
     
    A programación dos Magostos completarase esta fin de semana coma a carpa do Espazo Galaico, en Bispo Cesáreo, a aposta gastronómica na Praza Maior –Sabores de Ourense-, e no Liceo –denominacións de orixe de Ourense– e, como non, o magosto organizado no Parque Barbaña para o luns día 11.
     
    Ourense, 6 de novembro de 2019
     
    Teatro da Ramboia estreará mañá, xoves, 7 de novembro, ás 20.30 h no Auditorio O meu mundo non é deste reino, adaptación teatral da Farsa de Bululú de Manuel María. A obra foi a gañadora do I Certame Manuel María de Proxectos Teatrais convocado pola Fundación e Casa-Museo Manuel María, destinado a compañías profesionais galegas que premia a mellor proposta escénica dunha obra de Manuel María. Dirixida por María Peinado e interpretada por Fran Lareu e Anxo García, iniciará en Ourense unha xira que a levará inicialmente a 26 localidades de toda Galicia.
     
    “Trátase dunha parodia da ditadura -a franquista na obra orixinal- que nós extrapolamos a todos os totalitarismos”, sinalou María Peinado. A directora, xunto cos protagonistas presentaron esta mañá a obra na Sala Valente, xunto con Mario González, concelleiro de Cultura, Manuel Freire, técnico da concellería, Alberte Ansede, presidente da Fundación Manuel María e Begoña Blanco, en representación do Concello de Lalín.
     
    A montaxe combina o teatro de monicreques, as artes plásticas e o teatro actoral. Será presenciada polo público desde o propio escenario da sala principal do Auditorio, proporcionando un novo atractivo á representación.
     
    A historia está protagonizada por dous feirantes que chegan ao que chaman fogar logo dun día de traballo. Son Camilo e Tomás, dous titiriteiros que levan o mesmo espectáculo unha e outra vez polas vilas do país. Carretan ás costas un enorme “tutilimundi”. A disxuntiva de abrilo convérteo nunha caixa de Pandora latente. Contar e dar vida ao que contén supón a única vía de escape dos totalitarismos que os oprimen. Un xeito de sobrevivir nun reino militarizado sen trazas de lóxica humanística. Nun contexto ao que non pertencen, nun reino que non é do seu mundo.
     
    As entradas, desde 3 euros pódense adquirir en www.ataquilla.com, na sala de exposicións Afundación e no despacho de billetes do Auditorio dúas horas antes da función.
     
    Ourense, 5 de novembro de 2019.-
     
    A Concellería de Medio Ambiente aposta por un Magosto de carácter sostible e responsable neste ano 2019. Para iso, desenvolverá unha novidosa campaña coa que busca involucrar os cidadáns de todas as idades a través de dúas accións moi concretas: a reciclaxe de vidro e a educación. O responsable da área, Jorge Pumar, lembrou que “o Magosto é a festa da identidade de Ourense”, dixo. “Queremos que a xente participe, que o pase ben, pero tamén que respecte os espazos comúns, pero o obxectivo desta campaña é chamar a atención sobre o lixo que deixamos no monte e, ao mesmo tempo, traballar cos nenos, o futuro de Ourense, na educación ambiental”.
     
    O Concello de Ourense quere dar un exemplo de civismo e de respecto pola natureza nesta festa, declarada de interese turístico de Galicia, e lanzar unha imaxe de cidade sustentable. Neste sentido, a campaña presentada hoxe en rolda de prensa establece dous obxectivos fundamentais a través dunha alianza cos entes referentes da reciclaxe de España, Ecovidrio, que fai unha forte aposta pola nosa cidade ao involucrarse de forma clara na campaña de Ecomagosto. 
     
    Así, este luns 11, Ecovidrio instalará no Magosto popular do parque do Barbaña dous iglús onde cada ourensán poderá cambiar tres botellas ou tarros por unha árbore, o castiñeiro, en horario de 16:30 a 19:30 horas. Con esta acción, “Ecovidrio pretende trasladar a mensaxe de sustentabilidade ambiental, tanto desde o punto de vista da reciclaxe do vidro como convidando a veciñanza a plantar árbores”, en palabras de Germán Fernández, xerente da asociación sen ánimo de lucro para Galicia e o norte de España.
     
    A segunda acción será o 12 de novembro, co obxectivo de chamar a atención sobre o impacto dos magostos no monte ourensán. Así, 300 nenos -dos centros de Salesianos e Maristas- percorrerán os arredores do Montealegre coa fin de limpar os restos dos efectos dos magostos. “Os nenos son o futuro da cidade de Ourense, é un investimento en educación ambiental para o futuro”, dixo Jorge Pumar, que anunciou ademais obradoiros de reciclaxe e de plantación de árbores no Botánico.
     
    Esta actividade recibiu o recoñecemento do programa Ecólatras, unha iniciativa nacional de fomento para a reciclaxe de residuos, e en particular do vidro, que fomenta accións comunitarias de reciclaxe. Pero non será a única política medio ambiental que ampare a campaña: contarase coa axuda de Ecovidrio; da campaña “Separa con xeito” da Xunta de Galicia e Ecoembes; coa participación da Campaña “Cada lata conta”, programa de educación ambiental financiado pola Unión Europea; e co apoio de Ecourense para os procesos de recollida selectiva. Ademais mención especial para Sustinea, entidade ambiental colaboradora da acción. 
     
    Ourense, 4 de novembro de 2019.-
     
    A cita co Enclave de Cámara adiántase este mes de novembro ao mércores -6 de novembro- para recibir o cuarteto de corda Simply Quartet, que dará inicio a unha semana de intensa actividade na axenda da Concellería de Cultura. 
     
    Mércores, 6 de novembro. Liceo. Ás 20:00 horas. 
    Enclave de Cámara: Simply Quartet. Venda de entradas na billeteira do Liceo ou na páxina web www.ataquilla.com
    Orixinalmente chinés, o Simply Quartet trasládase a Viena en 2012 para estudar co profesor Johannes Meissl (Artis Quartet) no Instituto Joseph Haydn para Música de Cámara na Universidade de Música e Artes Escénicas de Viena. No seu repertorio podemos escoitar obras de Haydn, Shostakovich e Mendelssohn. Centrados nos últimos anos nas raíces do repertorio xermánico e austríaco para cuartetos de corda, teñen acadado éxito no Concurso Haydn en Viena, en 2017, e no Concurso Internacional de Música de Cámara “Schubert e a Música Moderna” de 2018. Actualmente, Simply Quartet é o último gañador do Concurso Internacional de Cuartetos de Corda de Bordeos. 
     
    Simply Quartet son: Danfeng Shen, violín; Antonia Rankersberger, violín; Siang Lyu, viola; e Ivan Valentin Hollup Roald, violonchelo. [Máis información]
     
    Xoves, 7 de novembro. Auditorio Municipal. Sala Principal. 20:30 horas. 
    O meu mundo non é deste reino, de Teatro da Ramboia. Estrea. 80 minutos. Entrada: 3€, en www.ataquilla.com, Sala de Exposicións Afundación e na billeteira do Auditorio dúas horas antes da función.
     
    Obra gañadora da última edición do Premio de Teatro Manuel María. Unha obra dirixida a todos os públicos baseada no texto O meu mundo non é deste reino ou farsa de Bululú, unha parodia sobre a ditadura franquista. María Peinado, Fran Lareu, Anxo García ou Germán Gundín, entre outros, dan vida a un par de trapeiros fan unha parada no seu camiño despois de días de longa viaxe. Traen consigo unha carga enorme de obxectos estraños. Abraiados ante a abundancia de público, dispóñense a situar as súas pertenzas no espazo con ánimo de venderlle algunha aos alí reunidos. Coma os máis experimentados vendedores de fume, deixan o seu ben máis atesourado para o final; un tutilimundi que contén nos seus adentros o condenado reino de Bululú e os seus habitantes. E aí dá comezo a farsa. 
     
    Sábado, 9 de novembro. Auditorio. Sala Principal. 21:00 horas.
    Michael Legend, de Rababiero Promocións Artísticas. 90 minutos. Entradas: desde 18€, en www.ataquilla.com, Sala de Exposicións Afundación e na billeteira do Auditorio dúas horas antes da función.
     
    Considerado como o mellor musical tributo a Michael Jackson na actualidade, é un espectáculo onde poderemos ver o mellor dobre do mundo xunto a unha banda de músicos e a un grande equipo de bailaríns, coristas e artistas convidados. Un espectáculo para todos os públicos sobre a xira de concertos This is it (2009) que ofrece o repertorio máis coñecido do Rei do Pop: Beat it, Billie Jean, Human Nature, Thriller, Man in the Mirror, Smooth Criminal, etc. 
     
    Domingo, 10 de novembro. Auditorio, Sala Azul. 12:00 horas. 
    Os romeiros do caracol, de Fantoches Baj. +6 anos. 60 minutos. Entradas: 3€ en www.ataquilla.com, Sala de Exposicións Afundación e na billeteira do Auditorio dúas horas antes da función.
     
    Os irmáns Quintá percorren o camiño de volta de San Andrés de Teixido logo de cumprir a ofrenda que lle prometeran ao seu defunto avó de levalo en forma de caracol, xa que non fora de vivo. Teatro de monicreques para a cativada.
     
    Domingo, 10 de novembro. Auditorio, Sala Principal. 20:30 horas. 
    Hijo de la luna - Tributo a Mecano, de Green Cow Music. 90 minutos. Entradas: desde 16 €, en www.ataquilla.com, Sala de Exposicións Afundación e na billeteira do Auditorio dúas horas antes da función.
     
    Espectáculo para todos os públicos que recrea a última xira de Mecano, incluíndo novas coreografías, luces e cancións: Me cuesta tanto olvidarte, Maquillaje, Cruz de navajas, La fuerza del destino, Barco a Venus, Mujer contra mujer... Para conmemorar o 25 aniversario da súa última xira, nace este proxecto tributo ao grupo máis importante do pop español. Un concerto que ofrece ao público unha reprodución clonada da mítica xira, rescatando ademais, outros grandes éxitos da banda na voz da cantante Robin Torres.
     
    Ourense, 30 de outubro de 2019
    Nove procesións da Santa Compaña, cun total de 12 grupos participantes, percorrerán mañá, xoves, 31 de outubro, desde as 23.30 horas diferentes rutas pola cidade para celebrar o Samaín 2019. Os percorridos sairán desde a rúa do Paseo, rúa de Santo Domingo, Praza de San Cósmede, Praza das Mercedes, Padre Feijóo, Praza de Saco e Arce, Praza do Correxedor e o barrio da Carballeira, para avanzar cara á Praza Maior, onde se unirán todas as agrupacións participantes. Alí terá lugar á 01.00 h a actuación do grupo vasco Deabru Beltzak que representará o espectáculo de música, pirotecnia e efectos visuais “Os tambores de fogo”. Será o colofón a esta nova proposta que o Concello de Ourense inclúe para fortalecer a programación do Samaín 2019, buscando fomentar a participación de persoas de todas as idades nesta cita festiva. Tamén participará nas actividades a Escola Municipal de Teatro.
     
    Para a cativada, a programación deste ano dálles continuidade a actividades que durante os últimos anos veñen acadando unha grande participación. 
     
    Nenos e nenas poderán participar desde as 17.00 h en media ducia de actividades nas Prazas do centro histórico
     
    - Taller de baleirado de cabazas, na Praza Saco e Arce 
     
    - Microteatro na Praza da Imprenta, cun pequena representación teatral interactiva na que se lles dará a coñecer a orixe do Samaín (3 pases de 15 min).
     
    - Obradoiro Os bosques dos petróglifos, na Praza da Imprenta. Unha zona acoutada onde de maneira libre poderán participar en xogos de puntería, lóxica e de construcións, usando como materiais elementos da natureza propios da festividade do Samaín (landras, troncos, pedras, cabazas, madeira).
     
    - Obradoiro: Os artesáns do castro, na Praza da Imprenta. Un esppzo onde nenos e nenas deseñarán os seus amuletos para pasar unha boa noite de Samaín 
     
    - Obradoiro de maquillaxe e feridas, na Praza Manuel Sueiro.
     
    - Obradoiro de elaboración de chapas, na Praza Manuel Sueiro
     
    Ás 19.00 h será o Desfile de Cabazas, que sairá desde a Praza da Imprenta e avanzará polas rúas de Colón, Bispo Carrascosa e Praza Maior, para rematar con baile e festa nesta praza Uxía Lambona e a Banda Molona!!!
     
     
    Teatro no Auditorio
     
    A programación de actividades da Concellería de Cultura para mañá xoves inclúe tamén a representación teatral, ás 20.30 horas no Auditorio, da obra Bernarda, de Malasombra producións. Esta obra dramática está protagonizada polas actrices galegas Luísa Merelas (gañadora de 2 premios María Casares), Celia González e Esther Aja. Bernarda é unha historia próxima, comprensible e universal. A dunha muller dura e loitadora, produto da vida que lle tocou vivir que educa as súas fillas como mellor sabe, aínda que elas non o vexan así. Este choque xeracional por veces fainos chorar, porque ás veces as situacións vólvense tensas e duras,e por veces fainos rir, porque igual que na vida, ata nas situacións máis extremas xorde a risa como unha necesidade de desafogo e de liberación.
     
    As entradas, desde 3 euros, están á venda en Ataquilla na sala de exposicións Afundación e no despacho de billetes do Auditorio dúas horas antes da función.
     
     
    Páxinas: 1 2 3 4 5 ... Último 

    Concellería de Cultura
    Concello de Ourense
    2017

     

    Rúa da Canle, 1
           32005 Ourense

     

       988 391 290

    Contacto

     

    Accesibilidade

     

    Permisos

    Cultura nas redes:

     

      Facebook

     

      Twitter

     

      Youtube

    Diseñado y programado por ACV Galaica