CONTACTO

  • banner feb1
  • bases belens
  • MMOu
  • EdC
  • Volver

    Ourense, 13 de xaneiro de 2020.-
     
    Se ben a axenda cultural municipal comeza este mércores 15 ás 20:00h, co concerto do Brentano Quartet no Teatro Principal dentro do ciclo Enclave de Cámara, o Auditorio celebra unha intensa fin de semana con até catro funcións repartidas entre Fariña e Metallica.
     
    Fariña, o espectáculo teatral
    Auditorio Municipal. Venres 17 de xaneiro ás 20:30h, e sábado 18 de xaneiro ás 18:00h e ás 20:30h. Entradas en ataquilla.com, no teléfono 902 504 500, na sede de Afundación (Praza Maior, 4) e na billeteira do Auditorio 2 horas antes.
     
    Nacho Carretero e Xosé A. Touriñán levan ao teatro Fariña, unha adaptación da exitosa obra de Carretero sobre a historia do narcotráfico en Galicia nas últimas décadas do pasado século. Dirixida por Tito Asorey, conta no seu elenco con Marcos Pereiro, María Vázquez, Sergio Zearreta e Cristina Iglesias, ademais do propio Touriñán. 
     
    Unha obra que non lle permite ao espectador nin acomodarse na butaca. A unha impoñente descarga suceden conversas entre rapaces e veciños das vilas falando, mercando, consumindo e manexando con soltura o famoso Winston de batea. Todo cabe sobre un escenario que recolle un percorrido fiel por este escuro capítulo da historia de Galicia desde un punto de vista único. Unha viaxe no tempo desde unha óptica próxima, real e familiar.
     
    Concerto Family Session, descubrindo a Metallica
    Auditorio Municipal. Domingo 19 ás 12:00 horas. Entradas en ataquilla.com, no teléfono 902 504 500, na sede de Afundación (Praza Maior, 4) e na billeteira do Auditorio 2 horas antes.
     
    Metalmania é o máis veterano tributo a Metallica da península, co privilexio de ser, ademais, a única banda no país recoñecida polos mesmos artistas aos que homenaxea. Xurdidos en 2001, cando o concepto “tributo” apenas se coñecía no noso país, atesouran xa case 20 anos de experiencia sobre os escenarios cos seus máis de 600 concertos ao longo de toda a península, desde salas e recintos pechados a festivais coma o Viña-Rock, Extremusika ou EnVivo. 
     
    Pero alén do “tributo”, é unha banda enfocada ao directo cun espectáculo de dúas horas de duración e unha grande posta en escena: proxeccións en vídeo sincronizadas, escenografía e atrezzo de escenario, globos, confeti...
     
    Exposicións. Até o 16 de febreiro...
    Sala Valente: Retrospectiva, de Carmucha Vázquez Prats.
    Museo Municipal: Fragmentos de existencia, de Francisco Ramos.
    Museo Municipal: Inquietudes, de Fernando Prieto.
     
    Ourense, 12 de xaneiro de 2020.-
     
    O Enclave de Cámara presenta, este mércores 15 desde as 20.00 horas no Teatro Principal, o prestixioso cuarteto de corda Brentano Quartet. Formado por Mark Steinberg, Serena Canin (violíns), Misha Amory (viola) e Nina Lee (violonchelo), é a formación residente na Yale School of Music, onde sucederon o Cuarteto de Corda de Toquio.
     
    Ademais de en Estados Unidos, onde residen, actúan en diferentes escenarios de Europa, Canadá, Xapón e Australia. O seu  eclecticismo e desexo de ir máis aló das fronteiras dos clásicos repertorios de cuarteto de corda levounos a interpretar tanto renacentistas como primitivas pezas de música, madrigais de Monteverdi e Gesualdo, fantasías de Purcell e traballos seculares de Josquin des Prós. No campo contemporáneo, Brentano colabora regularmente con compositores coetáneos como Elliot Carter e György Kurtág, e interpreta traballos por encargo de Milton Babbitt, Chou Wen-Chung, Charles Wuorinen, Bruce Adolphe, Steven Mackey e Jonathan Dawe. Entre os acompañantes do Brentano estiveron Joyce di Donato, Vijay Iyer, Ignat Solzhenitsyn e Jonathan Biss.
     
    Este cuarteto actuou, desde 2009, no Salón de Columnas do Palacio Real de Madrid, tendo a honra de tocar cos instrumentos da Colección Palatina de Stradivarius. Tamén participou en ciclos como Ibermúsica no Auditorio Nacional de Madrid, Palau de la Música de València, Sociedade Filharmónica de Bilbao, Auditorio de Barcelona, Auditorio de Tenerife, Auditorio Víctor Villegas de Murcia, a Sociedade de Concertos Alacant ou, con anterioridade, no propio Enclave de Cámara de Ourense.
     
    Programa
    Blossoming Variations / Variacións florecentes
     
    I Parte
    Wolfang Amadeus Mozart (1756-1791) | Cuarteto en La maior n.º 18, K464 [37’]
    Allegro | Menuetto e trio | Andante | Allegro ma non troppo
    Ludwing van Beethoven (1782-1827) | Cuarteto en La maior, Op. 18 n.º 5 [28’]
    Allegro | Menuetto | Andante cantabile | Allegro
     
    II Parte
    Ludwing van Beethoven (1782-1827) | Cuarteto en Mi bemol maior, Op. 127 [38’]
    Maestoso- allegro | Adagio, ma non troppo e molto cantabile | Scherzando vivace | Allegro
     
    Máis información na páxina do enclave de cámara.
     
    Ourense, 7 de xaneiro de 2020
     
    Os humoristas Dani Mateo, Manuel Manquiña e David Perdomo e o cantante Bertín Osborne subirán esta semana ao escenario do Auditorio Municipal de Ourense. A primeira das propostas é Noites de Retranca, espectáculo de humor que no seu especial décimo aniversario chegará a Ourense o venres, 10 de xaneiro, ás 22:30 horas. 
     
    En palabras da compañía, “cumprir dez anos levando humor e risas por Galicia adiante merecen festexalo. Por primeira vez nestes dez anos, abrimos o noso espectáculo a artistas de "fóra" e, para facelo contaremos cun artista retranqueiro coma nós... Dani Mateo!!!” Un show con música en directo, a dos Fabulosos Weekend, e as actuacions de Manquiña, David Perdomo e Dani Mateo.
     
    O sábado, 11, ás 20:00 horas, será o turno de Bertín Osborne, que chega a Ourense na xira de presentación do seu último traballo discrográfico: Yo debí enamorarme de tu madre, un espectáculo sorprendente de cen minutos e duración, acompañado dos seus músicos e os seus mariachis. Un show moi coidado e divertido onde o cantante andaluz repasará todos os seus éxitos musicais e as anécdotas máis graciosas da súa carreira.
     
    As entradas, desde 16 euros para Noites de Retranca, e desde 45 euros para Bertín Osborne, pódense adquirir en www.ataquilla.com, no teléfono 902 504 500, na Sede de Afundación (Praza Maior, 4) e na billeteira do Auditorio dúas horas antes da función.
     
     
    Ourense, 3 de xaneiro de 2020.-
     
    As súas maxestades os Reis Magos de Oriente, percorrerán as rúas de Ourense este domingo para a ledicia da rapazada. A cabalgata sairá desde a Avenida das Caldas ás 18:00 horas, e desfilará repartindo 3.000 quilos de caramelos até a Praza Maior, emprazamento da fin de festa das 26 carrozas participantes. A temática elixida pola Concellería de Cultura serán os animais do mundo.
     
    A cabalgata contará a historia da viaxe dos tres reis magos polo mundo ata chegar á cidade de Ourense. No seu periplo, foron atopándose animais fantásticos e marabillosos que decidiron acompañalos para coñecer as nenas e os nenos de Ourense. Unha narrativa construída a través das imaxes oníricas propostas nos espectáculos e animacións coas representacións de diversos animais, utilizando atractivas técnicas de construción escenográfica para representar o mundo animal.
     
    Os elementos que compoñen esta cabalgata están deseñados para a constante interacción co público, de forma que as nenas e os nenos aperten, toquen e palpen estes marabillosos seres. A través deste espectáculo, o Concello quere achegarlles o mundo animal ás cativas e aos cativos de Ourense dunha maneira sá, ecolóxica e respectuosa co medio ambiente.
     
    Máis de 300 persoas participarán activamente na Cabalgata facendo figuración. Ademais, técnicos municipais encargaranse de acompañar o desfile durante o percorrido, ademais de persoal de Protección Civil e Policía Local.
    A cabalgata retransmitirase en directo a través dunha pantalla na Praza Maior, e da pantalla publicitaria instalada na praza do Bispo Cesáreo.
     
    A entrada do público será libre, e o aforo estará será limitado por motivos de seguridade. As vías de evacuación estarán debidamente indicadas. A comitiva sairá pola Rúa Colón. Desmontaxe das animacións teatrais e bailarinas, na rúa da Barreira despois de saír pola Rúa Colón. Desmontaxe de charangas, na Praza da Imprenta.
     
    As carrozas marcharán cara ao Xardín do Posío.


    A CABALGATA 2020
     
    Chegada e colocación - Avenida de Marín, 16.00h.
     
    Percorrido: 
    Avenida das Caldas >
    Ponte Romana >
    Progreso > 
    Praza Maior.
     
    Integrantes:
    1. Banda Deputación.
    2. Bombeiros.
    3. Tren Nº 1.
    4. Aperta.
    5. Animación 1, Osos Polares
    6. Carro 1 Son.
    7. Grupo de bailarinas con paraugas.
    8. Animación 2, Cisnes.
    9. Charanga Támega.
    10. Comitiva Carteiro Real.
    11. Carro Son 2.
    12. Grupo de bailarinas con cartas.
    13. Carroza do Carteiro Real
    14. Animación 3, Cebras.
    15. A Mekánika Rolling Band
    15. Carro Son 3.
    16. Comitiva Rei Melchor: bailarinas con aros iluminados.
    17. Carroza Rei MELCHOR
    18. Carro  Son 4
    19. Comitiva Rei Gaspar: bailarinas con bastóns iluminados).
    20. Carroza Rei GASPAR
    21. Animación 4:  Flamingos
    22. Percusión: Trópico de Grelos
    23. Comitiva Rei Baltasar.
    24. Carroza Rei BALTASAR
    25. Carroza con agasallos
    26. Tren Nº 2.
     
    Na Praza Maior (19:30h aprox)
     
    Ourense, 30 de decembro de 2019.
     
    O XXIV Concurso de Beléns Públicos do Concello de Ourense xa coñece os gañadores dos mellores nacementos expostos ao público na cidade durante as datas de Nadal en tres modalidades: entidades, familiares e escolares. O xurado valorou os materiais empregados e os efectos de luz, auga e outras creacións, tendo en conta o seu valor artístico, histórico e relixioso, e repartiu os 2.000 euros en premios da seguinte maneira:
    Na categoría de Entidades, aberta a asociacións sen ánimo de lucro e establecementos comerciais debidamente acreditados, os premios foron: primeiro premio de 400 euros, para a Residencia Nosa Señora da Esperanza, por segundo ano consecutivo; e un segundo de 300 euros para a Residencia As Flores. 
     
    Na categoría Familiares, para os mellores beléns instalados en domicilios particulares: primeiro premio para a familia Corral, 300 euros, e segundo para a familia de América Vázquez, 200 euros.
     
    Na categoría Escolar, para alumnos e alumnas de ensino non universitario: primeiro premio para o CPR Plurilingüe Divino Maestro, 300 euros, o segundo para o Colexio Plurilingüe Divina Pastora, 200 euros. 
     
    O premio especial de 300 euros á creatividade e singularidade nos materiais e no deseño xeral da montaxe do Belén, foi este ano para a Comunidade das Clarisas Reparadoras.
     
    Os beléns deben estar á vista ou abertos ao público en escaparates, vitrinas, mostradores, recunchos, etc. En lugares como en centros de ensino, residencias ou casas particulares, a apertura ao público foi de dúas horas ao día, como mínimo, dentro do horario comercial, e sinalizados cun cartel no exterior do edificio.
     
     
    Ourense, decembro de 2019
     
    O espectáculo de benvida ao Nadal previsto para pasado mañá, venres, 20 de decembro, na Praza Maior aprázase ao domingo, día 29, a causa das previsións meteorolóxicas. O Concello toma esta decisión xa que a chuvia que se prevé para esa xornada desluciría o desenvolvemento desta actividade, a cargo da compañía Kull d´Sac que fusiona lume, música, pirotecnia e circo aéreo. O espectáculo terá lugar o día 29, á mesma hora, as 20.00 h, na Praza Maior
     
     
     
    Ourense, 16 de decembro de 2019
     
    O Auditorio de Ourense acollerá este xoves, 19 de decembro (20:30 horas) a representación de “Commedia”, obra gañadora do Premio de Teatro María Casares 2019 ao mellor espectáculo do ano. Dirixida por Cándido Pazó, a montaxe de Contraproducións revisita, 25 anos despois, a obra “COMMEDIA un xoguete para Goldoni”, que tras estrearse en 1993 na Mostra Internacional de Teatro de Ribadavia (MIT) acabou sendo un dos fitos do teatro galego, con máis de 200 funcións en xira por España, Portugal y Francia.
     
    Arlecchino atopa unha carta de amor no mandil da súa muller e, erradamente, pois a carta non era para ela, pensa que ela o engana. Desesperado, quere matarse. Pero deteno unha misteriosa voz que vén de ningures e que lle dá un anel máxico que ten a extraordinaria propiedade de facer perder a memoria a quen o pon. Arlecchino esquéceo todo. Pero, como dano colateral, esquece tamén a noción das convencións sociais. A partir deste arranque argumental sucédense unha serie de divertidos equívocos e enxeñosos enredos nos que participan algunhas das principais figuras da “commedia dell ́arte”: o cutre taberneiro Brighella, o pedante Dottore, o avaro Pantalone, o fanfarrón Capitano, a encantadora Arxentina...
     
    As entradas, desde 3 euros, pódense adquirir en ataquilla.com, na sala Afundación na Praza Maior ou no despacho de billetes do Auditorio dúas horas antes da función.
     
    A programación cultural da semana inclúe tamén a inauguración da exposición de Carmucha Vázquez Prats, o xoves, ás 20.00 horas, na Sala Valente. No Museo Municipal tamén está abertas ao público dúas exposicións: Fragmentos de existencia, de Francisco Ramos e Inquietudes, de Fernando Prieto
     
     
     
    Ourense, 9 de decembro de 2019
     
    O Ballet Nacional Ruso será esta semana o protagonista da programación de actividades que desenvolve o Concello no Auditorio Municipal, cunha dobre sesión que lle permitirá ao público ourensán desfrutar das adaptacións de dúas obras clásicas con partitura de Tchaikovshy: O Quebranoces e A bela dormente, o mércores, 11, e o xoves, 12, respectivamente, ambas ás 20.30 h.
     
    O Crebanoces é un ballet de dous actos, orixinalmente coreografiado por Marius Petipa e Lev Ivanov cunha partitura de Piotr Ilyich Tchaikovsky. O libreto é unha adaptación do conto de Hoffmann O Crebanoces e o Rey Rato. Estreouse no Teatro Mariinsky de San Petersburgo, o 18 de decembro de 1892, en sesión dobre coa ópera de Tchaikovsky, Iolanta.
     
    A bela dormente é un espectáculo con prólogo e catro actos (o bautizo, o feitizo, a visión e a voda), con música do mesmo autor, libreto de Charles Perrault, versión dos Irmáns Grimm, e coreografía de Marius Petipa
     
    Tamén esta semana teremos unha nova cita no Enclave de Cámara, o xoves, ás 20.00 h no Teatro Principal. Será co último gañador do concurso de piano de Santander, o ucraíno Dmytro Choni, un virtuoso do instrumento, que ofrecerá un programa que inclúe obras de clásicos como Brahms, Schumann ou Liszt, para rematar a segunda parte co compositor por excelencia de obras para piano solo, Rachmaninov.
     
    O Auditorio tamén acollerá o venres, ás 20.30 horas a clausura dos cursos do programa de actividades formativas Universidade Popular 2019, coa entrega de diplomas ás persoas que participaron nas actividades ao longo de todo o curso. Na entrada haberá unha  mostra dos traballos que realizou o alumnado dos obradoiros artísticos.
     
    A fin de semana traerá dúas citas coa programación infantil no Auditorio. O venres, 13, ás  18.00 h e 19.30 h, Lixo, de O Baúl da tía Lola, para bebés, e o domingo, 15, ás 12.00 h, Mai Mai, para rapazada a partir de 5 anos. Unha obra que conta a historia do último oso panda do planeta e a súa loita por sobrevivir, xa que a falta de comida e os problemas ocasionados polo quentamento global fan difícil a supervivencia desta especie. 
     
    Páxinas: 1 2 3 4 5 ... Último 

    Concellería de Cultura
    Concello de Ourense
    2017

     

    Rúa da Canle, 1
           32005 Ourense

     

       988 391 290

    Contacto

     

    Accesibilidade

     

    Permisos

    Cultura nas redes:

     

      Facebook

     

      Twitter

     

      Youtube

    Diseñado y programado por ACV Galaica