CONTACTO

  • banner feb1
  • bases belens
  • MMOu
  • EdC
  • Concello de Ourense - Cultura - AUDITORIO MUNICIPAL

    Volver

    Ourense, 13 de xaneiro de 2020.-
     
    Se ben a axenda cultural municipal comeza este mércores 15 ás 20:00h, co concerto do Brentano Quartet no Teatro Principal dentro do ciclo Enclave de Cámara, o Auditorio celebra unha intensa fin de semana con até catro funcións repartidas entre Fariña e Metallica.
     
    Fariña, o espectáculo teatral
    Auditorio Municipal. Venres 17 de xaneiro ás 20:30h, e sábado 18 de xaneiro ás 18:00h e ás 20:30h. Entradas en ataquilla.com, no teléfono 902 504 500, na sede de Afundación (Praza Maior, 4) e na billeteira do Auditorio 2 horas antes.
     
    Nacho Carretero e Xosé A. Touriñán levan ao teatro Fariña, unha adaptación da exitosa obra de Carretero sobre a historia do narcotráfico en Galicia nas últimas décadas do pasado século. Dirixida por Tito Asorey, conta no seu elenco con Marcos Pereiro, María Vázquez, Sergio Zearreta e Cristina Iglesias, ademais do propio Touriñán. 
     
    Unha obra que non lle permite ao espectador nin acomodarse na butaca. A unha impoñente descarga suceden conversas entre rapaces e veciños das vilas falando, mercando, consumindo e manexando con soltura o famoso Winston de batea. Todo cabe sobre un escenario que recolle un percorrido fiel por este escuro capítulo da historia de Galicia desde un punto de vista único. Unha viaxe no tempo desde unha óptica próxima, real e familiar.
     
    Concerto Family Session, descubrindo a Metallica
    Auditorio Municipal. Domingo 19 ás 12:00 horas. Entradas en ataquilla.com, no teléfono 902 504 500, na sede de Afundación (Praza Maior, 4) e na billeteira do Auditorio 2 horas antes.
     
    Metalmania é o máis veterano tributo a Metallica da península, co privilexio de ser, ademais, a única banda no país recoñecida polos mesmos artistas aos que homenaxea. Xurdidos en 2001, cando o concepto “tributo” apenas se coñecía no noso país, atesouran xa case 20 anos de experiencia sobre os escenarios cos seus máis de 600 concertos ao longo de toda a península, desde salas e recintos pechados a festivais coma o Viña-Rock, Extremusika ou EnVivo. 
     
    Pero alén do “tributo”, é unha banda enfocada ao directo cun espectáculo de dúas horas de duración e unha grande posta en escena: proxeccións en vídeo sincronizadas, escenografía e atrezzo de escenario, globos, confeti...
     
    Exposicións. Até o 16 de febreiro...
    Sala Valente: Retrospectiva, de Carmucha Vázquez Prats.
    Museo Municipal: Fragmentos de existencia, de Francisco Ramos.
    Museo Municipal: Inquietudes, de Fernando Prieto.
     
    Ourense, 7 de xaneiro de 2020
     
    Os humoristas Dani Mateo, Manuel Manquiña e David Perdomo e o cantante Bertín Osborne subirán esta semana ao escenario do Auditorio Municipal de Ourense. A primeira das propostas é Noites de Retranca, espectáculo de humor que no seu especial décimo aniversario chegará a Ourense o venres, 10 de xaneiro, ás 22:30 horas. 
     
    En palabras da compañía, “cumprir dez anos levando humor e risas por Galicia adiante merecen festexalo. Por primeira vez nestes dez anos, abrimos o noso espectáculo a artistas de "fóra" e, para facelo contaremos cun artista retranqueiro coma nós... Dani Mateo!!!” Un show con música en directo, a dos Fabulosos Weekend, e as actuacions de Manquiña, David Perdomo e Dani Mateo.
     
    O sábado, 11, ás 20:00 horas, será o turno de Bertín Osborne, que chega a Ourense na xira de presentación do seu último traballo discrográfico: Yo debí enamorarme de tu madre, un espectáculo sorprendente de cen minutos e duración, acompañado dos seus músicos e os seus mariachis. Un show moi coidado e divertido onde o cantante andaluz repasará todos os seus éxitos musicais e as anécdotas máis graciosas da súa carreira.
     
    As entradas, desde 16 euros para Noites de Retranca, e desde 45 euros para Bertín Osborne, pódense adquirir en www.ataquilla.com, no teléfono 902 504 500, na Sede de Afundación (Praza Maior, 4) e na billeteira do Auditorio dúas horas antes da función.
     
     
    Ourense, 16 de decembro de 2019
     
    O Auditorio de Ourense acollerá este xoves, 19 de decembro (20:30 horas) a representación de “Commedia”, obra gañadora do Premio de Teatro María Casares 2019 ao mellor espectáculo do ano. Dirixida por Cándido Pazó, a montaxe de Contraproducións revisita, 25 anos despois, a obra “COMMEDIA un xoguete para Goldoni”, que tras estrearse en 1993 na Mostra Internacional de Teatro de Ribadavia (MIT) acabou sendo un dos fitos do teatro galego, con máis de 200 funcións en xira por España, Portugal y Francia.
     
    Arlecchino atopa unha carta de amor no mandil da súa muller e, erradamente, pois a carta non era para ela, pensa que ela o engana. Desesperado, quere matarse. Pero deteno unha misteriosa voz que vén de ningures e que lle dá un anel máxico que ten a extraordinaria propiedade de facer perder a memoria a quen o pon. Arlecchino esquéceo todo. Pero, como dano colateral, esquece tamén a noción das convencións sociais. A partir deste arranque argumental sucédense unha serie de divertidos equívocos e enxeñosos enredos nos que participan algunhas das principais figuras da “commedia dell ́arte”: o cutre taberneiro Brighella, o pedante Dottore, o avaro Pantalone, o fanfarrón Capitano, a encantadora Arxentina...
     
    As entradas, desde 3 euros, pódense adquirir en ataquilla.com, na sala Afundación na Praza Maior ou no despacho de billetes do Auditorio dúas horas antes da función.
     
    A programación cultural da semana inclúe tamén a inauguración da exposición de Carmucha Vázquez Prats, o xoves, ás 20.00 horas, na Sala Valente. No Museo Municipal tamén está abertas ao público dúas exposicións: Fragmentos de existencia, de Francisco Ramos e Inquietudes, de Fernando Prieto
     
     
     
    Ourense, 9 de decembro de 2019
     
    O Ballet Nacional Ruso será esta semana o protagonista da programación de actividades que desenvolve o Concello no Auditorio Municipal, cunha dobre sesión que lle permitirá ao público ourensán desfrutar das adaptacións de dúas obras clásicas con partitura de Tchaikovshy: O Quebranoces e A bela dormente, o mércores, 11, e o xoves, 12, respectivamente, ambas ás 20.30 h.
     
    O Crebanoces é un ballet de dous actos, orixinalmente coreografiado por Marius Petipa e Lev Ivanov cunha partitura de Piotr Ilyich Tchaikovsky. O libreto é unha adaptación do conto de Hoffmann O Crebanoces e o Rey Rato. Estreouse no Teatro Mariinsky de San Petersburgo, o 18 de decembro de 1892, en sesión dobre coa ópera de Tchaikovsky, Iolanta.
     
    A bela dormente é un espectáculo con prólogo e catro actos (o bautizo, o feitizo, a visión e a voda), con música do mesmo autor, libreto de Charles Perrault, versión dos Irmáns Grimm, e coreografía de Marius Petipa
     
    Tamén esta semana teremos unha nova cita no Enclave de Cámara, o xoves, ás 20.00 h no Teatro Principal. Será co último gañador do concurso de piano de Santander, o ucraíno Dmytro Choni, un virtuoso do instrumento, que ofrecerá un programa que inclúe obras de clásicos como Brahms, Schumann ou Liszt, para rematar a segunda parte co compositor por excelencia de obras para piano solo, Rachmaninov.
     
    O Auditorio tamén acollerá o venres, ás 20.30 horas a clausura dos cursos do programa de actividades formativas Universidade Popular 2019, coa entrega de diplomas ás persoas que participaron nas actividades ao longo de todo o curso. Na entrada haberá unha  mostra dos traballos que realizou o alumnado dos obradoiros artísticos.
     
    A fin de semana traerá dúas citas coa programación infantil no Auditorio. O venres, 13, ás  18.00 h e 19.30 h, Lixo, de O Baúl da tía Lola, para bebés, e o domingo, 15, ás 12.00 h, Mai Mai, para rapazada a partir de 5 anos. Unha obra que conta a historia do último oso panda do planeta e a súa loita por sobrevivir, xa que a falta de comida e os problemas ocasionados polo quentamento global fan difícil a supervivencia desta especie. 
     
    Ourense, 2 de decembro de 2019
     
    A xenial bailaora e coreógrafa Sara Baras é a aposta da programación cultural do Concello para esta semana. O sábado, 7 de decembro, ás 21.00 h subirá ao escenario do Auditorio para presentar Sombras, o espectáculo co que vén de triunfar en cidades como Nova York, Londres, París ou Barcelona. A artista gaditana leva máis de 30 anos sobre os escenarios, acadando éxito tras éxito a nivel internacional e reunindo millóns de espectadores. A programación cultural do Concello para esta semana complétase coa programación infantil do Auditorio, o domingo, ás 12.00 h, coa obra Duncan de Palleiro e as exposicións de Xavier Cuiñas Liña de flotación na Sala Valente, e as de Francisco Ramos Fragmentos de existencia e Fernando Prieto Inquietudes no Museo Municipal.
     
    Sara Baras toma de novo o ceo por asalto apoiándose no seu baile, desde o feitizo inconfundible duns pes únicos e co peso e a firmeza de ter descuberto que non hai metas imposibles cando se avanza polos camiños da evolución constante; cunha nova coreografía e unha posta en escena máxica e única para poñer os nosos sentimentos a flor de pel. Sara Baras propón esta vez unha viaxe a través do tempo, das cores, do silencio e do bulicio, da multitude e da soidade, da luz e das sombras. Esas sombras que nos perseguen ou nos acompañan no deixarán de asombrarnos, de sorprendernos. 
     
    A artista gaditana leva máis de 30 anos percorrendo os escenarios de todo o mundo. Desde hai 21 ten a súa propia compañía, Ballet Flamenco Sara Baras, con 13 espectáculos coreografiados por ela, e máis de 4.000 representacións que a levaron aos mellores teatros do mundo. Sara Baras é hoxe unha das máis recoñecidas embaixadoras da cultura española, e leva recibido innumerables premios e recoñecementos á súa traxectoria. Proba do seu éxito é que permaneceu durante longas tempadas en cartel en cidades como Barcelona, Londres ou París. De feito, é  a artista que máis veces actuou nos 102 anos de historia do teatro dos Campos Elíseos, con máis de 200 funcións e máis de medio millón de espectadores. En Madrid presentou os seus espectáculos en 10 temporadas sumando un millón de espectadores
     
    Programación infantil
     
    O Auditorio proponnos este domingo unha nova cita coa programación infantil e familiar, ás 12.00 horas con Duncan de Palleiro. A obra cóntanos como transcorre un día na vida dun can, pero non dun can calquera. Trátase dun can moi especial que pertence a esa raza mítica, lendaria e con máis prestixio, a de Palleiro. Este can é Duncan de Palleiro o príncipe das corredoiras. 
     
    Duncan leva unha vida sinxela a carón do seu amo Aurelio e dos seus amigos, de sempre, nunha vila pequeniña e fermosa no medio das montañas chamada Óubidos, da cal se sinte moi fachendoso. Amizade, amor e liberdade son as palabras que máis lle gustan a Duncan de Palleiro.
     
    Aas entradas para os dous espectáculos pódense adquirir en www.ataquilla.com, no teléfono 902 504 500, na Sede de Afundación (Praza Maior, 4) e no despacho de billetes do Auditorio dúas horas antes da función.
     
     
    Ourense, 25 de novembro de 2019.-
     
    A Concellería de Cultura do Concello de Ourense organiza, durante toda esta semana, as seguintes actividades.
     
    Mércores 27, ás 18.00 horas. Auditorio Municipal. Outono con Apego 
    Estas xornadas teñen como obxectivo achegarlles ás familias recursos que axuden a mellorar e enriquecer a lingua que falan na casa cos seus descendentes. Gloria Mosquera e Diego Maceiras, aprenderannos a transmitir o gusto pola música cun obradoiro de arrolos.
     
    Xoves 28, ás 20.30 horas. Auditorio Municipal. Chola a it girl
    Chola, mecánica de coches, blogueira e youtubeira galega, é contratada por un teatro para presentar o seu monólogo ó máis puro estilo de show escénico youtubeiro. A través da presenza no escenario do seu coche Opel Calibra do 2000 transmitirá, con exemplos prácticos e didácticos, estratexias para poder descubrir quen somos, que nos gusta, que nos divirte... e sobre todo, saber recoñecer de onde vimos.
    Enlace ás entradas.
     
    Venres 29, ás 20.00 horas. Teatro Principal. IV Ciclo Lírico de Ourense.
    Josep-Ramon Olivé é na actualidade un dos mozos barítonos españois con maior proxección internacional, afianzada polas súas colaboracións con orquestras como Les Arts Florissants e Hespérion XXI e o seu recente debut no Gran Teatre del Liceu e o Festival de Peralada.
     
    Domingo 1, ás 17.00 horas. Auditorio. Hansel e Gretel, o musical.
    A fermosa pero terrible versión dos Irmáns Grimm converteuse nun musical, que sen perder de vista a triste historia dos dous irmáns, está chea de humor e tenrura que se desprende da relación de Hansel e Gretel, a música, as cancións e as belas coreografías.
    Enlace ás entradas.
     
    Exposicións. Ademais, proseguen, até o mes de decembro, as seguintes exposicións: Fragmentos de existencia, de Francisco Ramos, e Inquietudes, de Fernando Prieto, no Museo Municipal; e Liña de Flotación, de Xavier Cuiñas, na Sala Valente. Pódense visitar en de martes a sábados de 11.00 13.30 horas e de 18.30 a 21.30 horas, e os domingos  de 11.00 13.30 horas.
     
    O Claustro de San Francisco e o Belén de Baltar son outros dos espazos culturais xestionados pola Concellería de Cultura abertos para a cidadanía.
     
    Ourense, 20 de novembro de 2019.-
     
    A cidade de Ourense converterase un ano máis en referente da danza contemporánea coa 4º edición de SóloDOS en Danza. O certame desenvolverase desde mañá, xoves 21, até o sábado 23 de novembro, cunha chea de actividades que lle achegarán a danza contemporánea a todo tipo depúblicos.
     
    A Sala Valente acolleu esta mañá a presentación do certame “unha plataforma feita desde Ourense e para Ourense, cunha programación exclusiva e pensada para a cidade”, subliñaron en nome da organización Erick Jiménez, e Maruxa Salas, bailaríns e coreógrafos, que participaron na presentación xunto co concelleiro de Cultura, Mario González. O evento contará con compañías de 6 países e 9 comunidades autónomas españolas. Será no Auditorio Municipal de Ourense e estenderá o seu programa de formación ao Laboratorio Escénico Coop da Coruña o día 24.
     
    Esta edición contará con artistas de Galicia, País Vasco, Madrid, Cataluña, Asturias, Valencia, Santander, Zaragoza, Granada, Costa Rica, Ucraína, Chile, Ecuador e Arxentina entre outros. Durante o Festival presentaranse 13 obras de creadores noveles Iberoamericanos.
     
    O 21 e 22 de Novembro pola mañá, máis de 500 nenos e mozos da provincia de Ourense terán un programa exclusivo para eles, compartirán e poderán dialogar cos creadores sobre as súas obras. Eles outorgarán o PREMIO XOVE a unha das 10 obras semifinalistas do certame de creación de dúos e solos. Eles seleccionarán a súa coreografía gañadora, premio que se entregará o día 23 na Final do Certame.
     
    Os días 21 e 22 ás 20.30 horas, terán lugar as Actuacións das dúas Semifinais do Certame. Nestas semifinais se seleccionarán as coreografías que pasarán á final e que actuarán de novo o sábado día 23.
     
    O 23 de Novembro ás 20.30 horas terá lugar a Final do Certame de Creación de Dúos e Solos en Danza Contemporánea onde concursarán as coreografías seleccionadas para a final. A coreografía gañadora será premiada co PREMIO SóLODOS EN DANZA / OURENSE / 2019 con Xira Costa Rica. Ademais se entregarán diferentes premios e bolsas entre os artistas participantes. Un dos premios outorgarao o público asistente ao certame, votará para seleccionar a súa coreografía preferida e entregarase o PREMIO DO PÚBLICO. O Certame Internacional de Coreografía Burgos & Nova York PREMIARÁ unha peza para que pase á semifinal de seu Certame en 2020, será o PREMIO Certamen Internacional de Coreografía Burgos - Nova York 2020. 
     
    Este mesmo día 23 e antes da entrega de premios poderemos gozar das Actuacións das Compañías Convidadas Victoria P Miranda, Milki Lee e Nacho
    Cárcaba, gañador da pasada edición co Premio Sólodos En Danza / Ourense / 2018.
    Outras actividades do Festival:
     
    Mestres distinguidos impartirán clases maxistrais para estudantes de danza e talleres especializados para profesionais e público xeral.
     
    O Festival organiza un Foro profesional, onde estarán presentes proxectos de Danza como Red A Cielo Abierto (Red de Festivales de Calle de España) e Festival Trayectos de Zaragoza.
     
     
    Ourense, 9 de novembro de 2019
     
    O Auditorio Municipal de Ourense acollerá o xoves, 14 de novembro, A amnesia de Clío, unha sensacional ópera que agrupa unha escolma de grandes nomes das artes escénicas galegas: A compañía Voadora, a Real Filarmonía de Galicia, o Orfeón Terra Nosa, o compositor santiagués Fernando Buide (no 2018 o autor español vivo máis interpretado polas orquestras de todo o Estado), ou o artista ourensán Fernando Epelde, que asina o libreto. 
     
    Da dirección de escena encárgase a pontevedresa Marta Pazos (que dirixiu este ano unha ópera para o Teatro Real, e que o ano que vén dirixirá para o Teatro Nacional de Košice, en Eslovaquia) e o director musical é Paul Daniel, durante 5 anos director da English National Opera. A soprano é Raquel Lojendio, primeira espada nacional que traballou coa Berliner Philarmoniker, a Seattle Synphony Orquestra ou a BBC Philarmonic. A ópera, que se estreará o domingo, 10 en Santiago de Compostela -con entradas xa esgotadas- representarase en Ourense en formato concerto.
     
    En palabras da compañía, A amnesia de Clío inspírase no lado máis extraño e pintoresco da idea mesma de Historia, e sérvese tamén da parte máis inexplicable da política como ollada do mundo e como ferramenta para entender o lugar que ocupamos neste planeta.
     
    Protagonizada por unha curiosa galería de políticos, moitos deles xa retirados, esta peza envólvese dos protocolos e da excéntrica mecánica do universo político, para ofrecer unha mirada inesperada sobre a perspectiva patriarcal e as forzas e personalidades que converten os pasos en pegadas e as frases en citas. Unha experiencia á que asistimos guiados por unha figura insólita que se nos presenta esta ópera como xeradora dun cambio universal, condutora dun plan internacional para cambiar un paradigma: o da musa e o do artista.
     
    Amnesia de Clío é unha produción de Voadora en coprodución co Centro Dramático Galego co apoio do Consorcio de Santiago, a Consellería de Cultura e Turismo, a Deputación da Coruña, os concellos de Santiago de Compostela e A Coruña, e a Asociación de amigos da ópera de Santiago. Un proxecto realizado coa bolsa Leonardo a Investigadores e Creadores Culturais 2017 da Fundación BBVA. Creado en residencia co apoio do INAEM – Ministerio de Educación, Cultura e Deporte, Fundación SGAE Galicia e Teatro Réplika.

    Entradas en ataquilla.com.
     
     
    Páxinas: 1 2 3 4 5 ... Último 

    Concellería de Cultura
    Concello de Ourense
    2017

     

    Rúa da Canle, 1
           32005 Ourense

     

       988 391 290

    Contacto

     

    Accesibilidade

     

    Permisos

    Cultura nas redes:

     

      Facebook

     

      Twitter

     

      Youtube

    Diseñado y programado por ACV Galaica