CONTACTO

  • EdC
  • prem risco
  • Verán cultural
  • Premio poesía
  • Auditorio
  • Concello de Ourense - Cultura - AUDITORIO MUNICIPAL

    Volver

    Ourense, 27 de setembro de 2018.
     
    Ourense será a capital galega do teatro entre o 4 e o 14 de outubro con motivo da XI edición do Festival Internacional de Teatro de Ourense (FITO), que este ano ofrecerá 16 espectáculos de 15 compañías (seis delas dirixidas por mulleres). Nesta edición o teatro tradicional convivirá con novas propostas como teatro de rúa ou danza, da man de compañías chegadas de España, Portugal, Arxentina, Israel e Chile.
     
    “Hoxe é un día grande para Ourense no que vemos os froitos da colaboración institucional e do traballo dos organizadores”, destacou a concelleira de Cultura, Belén Iglesias, durante a presentación do programa de actividades. O acto contou tamén coa presenza de Sabela Gago, directora do FITO; Olga Mojón, directora do Teatro Principal; Aurelio Gómez Villar, asesor de Cultura da Deputación de Ourense e Jacobo Sutil, director da Axencia Galega das Industrias Culturais.
     
    A concelleira de Cultura destacou que a programación permitirá aos ourensáns revisar os textos de autores clásicos, como Virginia Wolf; ou descubrir a voz de novos creadores: como Genma Brió con “Liberto”; Selu Nieto, con “La última Boqueá” ou Mariano Barroso e Alejandro Fernández, con “Todas las mujeres”.
    Ademais recordou que este ano haberá nove estreas e será a oportunidade de “disfrutar da madurez do teatro ‘made in Galicia’, a través da presenza de sete compañías recoñecidas en certames do máis alto nivel”.
     
    Por último incidiu nas actividades paralelas como o IV encontro "Mulleres creando", que reunirá a diferentes creadoras para construír un espazo de intercambio artístico e reivindicar o papel da muller no mundo do teatro.
     
    As representacións terán lugar no Teatro Principal e no Auditorio Municipal, que este ano adaptan os seus horarios para facilitar o acceso ao maior número de público. Así, os domingos as representacións no Teatro Principal serán as 19,00 horas, e as 20,30 horas no Auditorio Municipal. O resto da semana o horario será as 20,00 horas no Teatro Principal e as 22,30 horas no Auditorio Municipal.
     
    O director da Axencia Galega de Industrias Culturais (Agadic), Jacobo Sutil, salientou a “evolución deste certame que supón un magnífico impulso á dinamización da escena en Ourense”.
     
    Pola súa banda, o asesor de Cultura da Deputación, Aurelio Gómez Villar, destacou a diversidade do programa e a colaboración entre institucións como “garantía do éxito deste certame” e a directora do Teatro Principal, Olga Mojón, confirmou que “este ano ampliarase o tempo de cortesía para facilitar a chegada de maior número de espectadores”.
     
    A directora do FITO, Sabela Gago, defendeu ao FITO como “lugar de encontro e proxecto estratéxico para a proxección internacional de Ourense, e para  impulsar aos creadores emerxentes do Teatro”. Tamén recordou que este ano o programa será máis diversificado que nunca con ofertas de “teatro rúa, danza, teatro de autor, teatro contemporáneo e comprometido co tempo que vivimos”.
     
    Para máis información sobre a programación e horarios xa se pode consultar a web fitoourense.com.
     
     

    Está protagonizado por Sheyla Fariña e Guillermo Carbajo baixo a dirección de Alex Sampayo sobre un texto da súa propia autoría compartida con Borja F. Caamaño

    A compañía Redrum Teatro estrea a comedia musical “Contos do Recreo”, o próximo domingo 23 de setembro ás 12.00 h. no Auditorio Municipal de Ourense. Trátase dun proxecto multidisciplinar composto por un espectáculo teatral e un álbum ilustrado co mesmo nome. Está dirixido ao público familiar e conta cun gran contido educativo, xa que trata de concienciar sobre as consecuencias do acoso escolar. Tal e como fixo co seu anterior espectáculo “A Nena Que Quería Navegar”, pero, nesta ocasión, centrándose na figura dunha nena acosadora. Redrum considera que as nenas e nenos que exercen acoso son tamén vítimas, xa que se trata de condutas de imitación e/ou autodefensa, e trata, con este proxecto, de concienciar sobre os seus efectos. Alicia á unha nena que desfruta burlándose das seus compañeiras. No recreo anterior ao exame máis importante do curso aparece nun lugar máxico habitado por Xacobe, a estrafalaria estatua que custodia a porta que coroa o lugar. Para poder saír de alí e chegar en tempo ao exame, Alicia terá que resolver os enigmas e superar as probas que se agochan tras a porta dos recreos pasados presentes e futuros.

    Redrum Teatro es una compañía de teatro compostelá con dez anos de traxectoria e que conta no seu currículo con espectáculos dirixidos a público adulto como “Noiteboa”, “Currículum Vitae” ou “A Canción do Elefante” e tamén dirixidos a público familiar como “Moito Conto”, “Roedores” ou “A Nena Que Quería Navegar”, estes dous últimos nomeados na categoría de Mellor Espectáculo Infantil nos Premios de Teatro María Casares.

     

    O Auditorio Municipal de Ourense acollerá os días 20 e 21 de setembro, ás 21,00 horas, a estrea de “Celebración. A gran noite” a última obra da compañía ourensá Sarabela Teatro, “unha alegoría sobre o totalitarismo e a delimitación de fronteiras entre as clases privilexiadas e as desfavorecidas”. Así o explicou o alcalde de Ourense, Jesús Vázquez, durante a presentación do espectáculo no salón de plenos nun acto que contou coa presenza do director da Axencia Galega de Industrias Culturais (Agadic), Jacobo Sutil; da concelleira de Cultura, Belén Iglesias; do autor da obra, Fernando Dacosta e do director Daniel Salgado.

    O rexedor invitou aos ourensáns a acudir a esta estrea e a deixarse levar polos actores Elena Seijo, Fernando Dacosta, Fina Calleja, Sabela Gago e Nate Borrajo “nun espectáculo que explora a impotencia, o medo e a violencia, así coma os mecanismos de masas que xustifican e lexetiman estas situacións”.

    Pola súa banda o director da Agadic tivo palabras de recoñecemento para Sarabela, compañía á que se referiu como unha das máis activas e prolíficas de Galicia, e explicou que o apoio económico da Consellería de Cultura e Educación a “Celebración. A gran noite” sitúase en de 41.000 euros.

    “Celebración. A gran noite” é unha obra escrita por Fernando Dacosta que se inspira na obra do dramaturgo francés Jean-Luc Lagarce, preocupado por abordar nas súas pezas a exclusión e a necesidade de pertenza. O espectáculo, que fai o número 52 na traxectoria da compañía, discorre entre situacións que explotan a comicidade e o patetismo, para provocar a emoción dos espectadores a través dunha trama argumental de vertixe, desencadeada tralo convite a unha gran festa.

    O prezo das entradas é desde cinco euros. Pódense comprar de forma anticipada na web de ataquilla.com.

     
    Ourense, maio de 2018.
     
    O Auditorio municipal de Ourense acollerá esta semana unha variada programación que aposta polo teatro para adultos e o musical, e que ofrece a  posibilidade de visitar as obras que participaron na Exposición Bienal de Pintura do Eixo Atlántico, que estará aberta até finais do mes de maio. As entradas para as dúas citas programadas pódense adquirir en www.ataquilla.com.
     
    A programación de actividades comezará o xoves, ás 20,30 horas, coa representación da obra teatral “A Leituga”, que aborda en clave de humor o conflito familiar que se produce nunha familia ante a proximidade da morte dos seus membros de maior idade.
     
    Trátase dunha montaxe dirixida por Víctor Duplá e que contará cun elenco de luxo con actores da talla de Antonio Durán “Morris”, Mercedes Castro, María Vázquez, Xosé Barato e Federico Pérez.
     
    As entradas terán un prezo de 5 euros e poderanse mercar na web ataquilla.com.
     
    O domingo, 27 de maio, ás 12,00 horas terá lugar a representación da obra “Fantasía coas palabras” , un espectáculo musical que corre parello á edición dun disco do mesmo nome editado por Sonárboré na primavera de 2017. O espectáculo conta con música en directo e acción teatral a cargo de María Faltri, Jorge Juncal e Juansy Santomé. A duración da obra é de 60 minutos. Entradas en www.ataquilla.com, dende tres euros.
     
    Por outra banda o vestíbulo do Auditorio acollerá até finais de maio a exposición da Bienal de Pintura do Eixo Atlántico, resultado do concurso que cada dous anos organiza o Eixo e que percorre os principais puntos da eurorrexión Galicia-Norte de Portugal.
     
     
    Ourense, 25 de abril de 2018.
    O Auditorio municipal ofrece esta fin de semana unha dobre cita coa danza e co circo dentro da súa programación. O sábado, desde as 20:30 horas na sala principal, o grupo Traspediante interpretará Plastic, unha obra de Rut Balbís interpretada por Paula Quintas.
     
    Desde a antítese ou desde a retórica, Traspediante propón unha recuperación da memoria corporal desde dentro cara a fóra. Como emanan substancias desde o noso interior e podemos trasladalas a un código plástico estético e conservalo? Un traslado emocional pola traxectoria persoal e artística do propio corpo, datas, pegadas, obxectos, estimulación sensorial e cicatrización corporal lévannos ás ideas referenciais da historia da arte, xogos luminosos e transposicións. 
     
    O espectáculo de danza durará 50 minutos e as entradas custan 3 € [en www.ataquilla.com ou na sala de exposicións Afundación] ou 4 € na billeteira do Auditorio, dúas horas antes da función. 
     
    O domingo 29 ás 12:00 horas volve a programación infantil ao Auditorio co espectáculo Erori, de Cair Circo, para todos os públicos. Accións sinxelas e cotiás que derivan en acrobacias mediante golpes e caídas, contrastan con coreografías visuais de danza e malabares. O absurdo, o sinxelo e o universal está presente nas disparatadas rutinas de circo. Unha dramaturxia non lineal que cada espectador vivirá dunha forma única. As entradas, coma no caso anterior, custan 3 € [en www.ataquilla.com ou na sala de exposicións Afundación] ou 4 € na billeteira do Auditorio, dúas horas antes da función. 
     
    O domingo, máis danza
    O Concello de Ourense súmase este domingo á conmemoración do Día Internacional da Danza convertendo os espazos públicos da cidade nun escenario para os alumnos de oito escolas de danza da cidade e no que está previsto que participen máis de 500 persoas, con idades desde os tres anos en adiante. Entre as 10:30 e as 14:00 horas haberá actuacións de baile nos Xardíns do Padre Feijóo, na Praza de San Martiño e no Centro Marcos Valcárcel. A partir das 19:30, será a Praza Maior o escenario do espectáculo principal.
     
    Ourense, abril de 2018.-
     
    A cidade de Ourense será sede, por cuarto ano consecutivo, Festival Xuvenil de Teatro Grecolatino en Galicia, xunto con Lugo. As Concellerías de Educación e de Cultura colaboran para levar a cabo un evento que no que participarán centos de alumnos e de alumnas de Ensino Secundario e que aproveitarán a súa visita para coñecer o Ourense máis románico.
     
    O Festival desenvolverase o luns 9 e o martes 10 de abril, con 4 representacións (ás 12:00 e ás 17:00 horas) ás que asistirán un total de 2.381 alumnos de 39 centros de ensino das 4 provincias galegas e máis de León.
     
    Á primeira das sesións acudirán Belén Iglesias, concelleira de Educación e de Cultura, e Teresa Amado, profesora titular de Filoloxía Grega da USC e coordinadora deste festival desde o ano 2001, para a entrega do terceiro premio Odisea, de cultura clásica . O resto do programa é como segue:
     
    Luns 9:
    12:00 Las Troyanas, de Eurípides (Grupo Noite Bohemia de A Coruña)
    17:00 Anfitrión, de Plauto (Grupo Noite Bohemia de A Coruña)
     
    Martes 10:
    12:00 Electra, de Eurípides (Grupo El Ruiseñor de Culleredo)
    17:00 Gemelos, de Plauto (Grupo El Ruiseñor de Culleredo)
     
    No ano 2015 tivo lugar a primeira edición deste Festival Xuvenil de Teatro Grecolatino obtendo un gran éxito de asistencia e consolidando Ourense como a cidade galega co maior índice de participación.
     
     
    Ourense, 04 de abril de 2018.
     
    Medio milleiro de rapaces e rapazas ourensáns con idades comprendidas entre os oito e os 18 anos converterán esta fin de semana a Ourense na “capital de música e da cultura” con motivo da segunda edición do proxecto Ourencanto, unhas xornadas de participación e convivencia que rematarán o domingo 8 de abril cun grande concerto no Auditorio Municipal de Ourense.
     
    Así o salientou este mércores o alcalde Jesús Vázquez durante a presentación de este evento no salón de plenos do Concello, nun acto no que estivo acompañado pola concelleira de Cultura, Belén Iglesias, polos organizadores, o profesor do Conservatorio Municipal de Música, Carlos Núñez e a directora do coro infantil da Capela Madrigalista Cristina Boado e o vicepresidente da Deputación Rosendo Fernández.
     
    O rexedor destacou que a vindeira fin de semana a cidade das Burgas se converterá nun referente musical pola concorrencia do primeiro encontro das Orquestras Sinfónicas e Coros dos Conservatorios Superiores de Música de Galicia (o venres día 6 ás 20.30 horas no Auditorio Municipal) e a segunda edición de Ourencanto (dende o venres até ao domingo o de abril).
     
    “Trátase dunha iniciativa para achegar as corais aos rapaces entre 8 e 18 anos” para impulsar entre eles “o esforzo do ensaio, e rigor das partituras e a recompensa da actuación en directo”, sinalou Jesús Vázquez.
     
    O alcalde tamén amosou o seu desexo de que esta actividade sirva para acadar “un gran coro infantil” na cidade.
     
    Nesta mesma liña se manifestou a concelleira de Cultura que avogou por que Ourencanto se converta nunha “canteira de voces” na cidade e vaia máis aló do encontro e formación entre rapaces que rematará cun grande concerto no Auditorio Municipal o domingo, as 19,00 horas.
     
    Os organizadores Cristina Boado e Carlos Núñez coincidiron en resaltar o éxito da convocatoria, que este ano contará coa participación de 500 rapaces procedentes de un total de 15 colexios, dous de eles da provincia de Pontevedra.
     
    Pola súa banda Carlos Núñez confirmou que nesta segunda edición haberá “novidades e sorpresas”. Entre elas salientou que o concerto do domingo, 6 de abril, ofrecerá a estrea mundial dunha obra musicada polo compositor vasco Josu Elberdín, a partires do poema “Terra Maina”, do compositor ourensán Albino Núñez Dominguez.
     
    Punto de encontro entre a mocidade e a cultura dos coros
    O II Encontro de Coros Infantís, Xuvenís e Escolares, Ourencanto, é unha actividade para que os rapaces ourensáns coñezan de primeira man en que consiste o traballo nunha coral, e nace coa vocación de que se acheguen a esta actividade cultural. O encontro ábrese o seis de abril no Conservatorio Municipal de Música da cidade, e os rapaces ensaiarán sobre diversas partituras entre os días sete e oito de abril.
     
    O domingo, 8 de abril, ofrecerán un concerto de clausura no Auditorio Municipal da cidade, baixo a dirección artística do compositor e director de orquestra vasco Josu Elberdín.
     
    Esta actividade xorde froito da colaboración entre o Concello de Ourense e a Deputación Provincial, e conta coa colaboración da Xunta de Galicia, o Conservatorio Municipal de Música de Ourense, o Coro de Nenos Cantores da Capela Madrigalista, a Federación Coral Galega, Gadis e Abanca.
     
    Ourense, 03 de abril de 2018.-
     
    Ourense acolle este venres un espectáculo de balde nunca antes visto na cidade: o primeiro encontro das Orquestras Sinfónicas e Coros dos Conservatorios Superiores de Música de Galicia. Terá lugar o día 6 ás 20.30 horas no Auditorio Municipal e que é froito da cooperación institucional entre o Concello e a Xunta de Galicia.
     
    O programa consiste na interpretación íntegra de Carmina Burana. Cantata escénica para orquestra, coro e solistas,de Carl Orff, un compositor xermano recoñecido universalmente pola adaptación destes cantos escritos por monxes e xograres ao longo dos séculos 12 e 13, reunidos nun manuscrito descuberto case 700 anos despois. 
     
    Esta montaxe inclúe tamén pequenos intérpretes, de entre 5 e 7 anos de idade, do coro Mini Gaos, e conta coa actuación do Coro de nenos do Conservatorio Profesional de Música de Ourense, dirixido por Cristina Rodríguez, e do que tamén participa o barítono Borja Quiza
     
    O alcalde, Jesús Vázquez, anima a toda a veciñanza de Ourense a que disfruten “dunha posta en escena espectacular, nunca antes vista na nosa cidade, con máis de 200 intérpretes entre instrumentistas e coristas, executando un programa conxunto no que veñen traballando ao longo dos últimos meses”. 
     
    “A idea desta mini-xira que comeza o venres en Ourense, e seguirá pola Coruña, o sábado, e por Vigo, o domingo, xorde da colaboración entre a Consellería de Cultura e ambos Conservatorios Superiores para facilitar a preparación de obras de grande formato, ao tempo que se favorece o coñecemento e a convivencia do alumnado de ambos centros. Pero tamén o de crear un espazo de convivencia durante case unha semana para o alumnado dos dous centros”, sinalou Vázquez Abad. 
     
    Na presentación desta mañá participaron os directores dos Conservatorios Superiores de Música de Galicia, Julio Mourenza, o da Coruña, e Esteban Valverde, o de Vigo. Tamén asistiu a directora do Conservatorio Superior de Música de Ourense e a xefa territorial de Cultura e Educación na provincia.
     
    Páxinas: 1 2 3 4 5 ... Último 

    Concellería de Cultura
    Concello de Ourense
    2017

     

    Rúa da Canle, 1
           32005 Ourense

     

       988 391 290

    Contacto

     

    Accesibilidade

     

    Permisos

    Cultura nas redes:

     

      Facebook

     

      Twitter

     

      Youtube

    Diseñado y programado por ACV Galaica