CONTACTO

  • San Lázaro
  • Auditorio abril
  • MdoC
  • Maios
  • Prem poesía
  • MMOu
  • EdC
  • Concello de Ourense - Cultura - AUDITORIO MUNICIPAL

    Volver

    Ourense, 21 de abril de 2019.
     
    O Auditorio de Ourense programa esta semana tres actividades tan dispares como atraentes: danza, música coral a cargo das futuras xeracións de músicos, e un que leva décadas no máis alto, Pablo Milanés. As entradas para o espectáculo de danza de Daniel Abreu e para o concerto do cantautor cubano pódense adquirir en ataquilla.com ou dúas horas antes da función na billeteira do Auditorio; a gala final de Ourencanto é gratuíta até completar aforo.
     
    Xoves 25 de abril, 20:30 horas. LA DESNUDEZ, de Daniel Abreu 
     
    Danza, público adulto. Duración: 60 min. Entradas 5€.
    Unha proposta poética sobre o saber quererse. Dúas figuras en escena, apuntando unha idea de polaridade e de viaxe desde a morte ao amor. A nudez responde a ese lugar de intimidade, onde xa non existen as preguntas. A beleza na nudez, ás veces o sublime dunha man que toca e intercambia calor e suor, e ás veces o mal querer. Podería lerse a obra de atrás cara adiante, onde aparece a viaxe e o sentido dunha unión sentimental. A obra vai do negro ao branco, dun espazo cuberto a un espazo aberto.
     
    Sábado 26 de abril, 21:00 horas. PABLO MILANÉS – Esencia 2019
     
    Todos os públicos. Entradas a partir de 45€
    Pablo Milanés, un dos principais expoñentes da canción de autor en español, recala en Ourense coa xira “Esencia”, coa que percorre escenarios de América e Europa. Nesta xira Pablo retomará temas esenciais na súa obra, clásicos reclamados sempre polo seu público –Para vivir, Ya ves, Yolanda, Si ella me falta alguna vez ou El breve espacio en que no está, e outros...– xunto con temas máis recentes que revelan a constante capacidade de crear deste artista en máis de cinco décadas de carreira.
     
    A súa versatilidade musical e a influencia da tradición cubana e americana convertérono nun artista capaz de expresarse en diversos xéneros: o bolero, o jazz, a rumba, o son, e a súa trova. Coa súa esencial condición de cantor segue cantando ao amor como sentimento primordial e temas de contido social, asuntos sempre presentes nos seus textos e que Pablo Milanés presentará nun formato máis íntimo pero non menos sorprendente.
     
    Domingo 28 de abril, 19:00 horas- Clausura III Festival Ourencanto 
     
    Todos os públicos. Acceso de balde até completar aforo. +Info.
    Ourencanto é un proxecto pioneiro en Galicia. Naceu fai xa tres anos, grazas ao apoio do Concello, da Deputación de Ourense e da Consellería de Educación da Xunta de Galicia, co obxecto de fomentar e difundir o canto coral entre os nenos e os mozos de 8 a 18 anos de Ourense e da súa provincia. A primeira edición tivo lugar en febreiro de 2017 e superou todas as 
     
     
    Ourense, 8 de abril de 2019
     
    O Auditorio Municipal de Ourense acollerá este venres, día 12 de abril, ás 20.30 horas o concerto “De Ruada entre amigos”, no que a coral ourensá celebrará o centenario do seu nacemento. As persoas interesadas en desfrutar do espectáculo poderán recoller as entradas desde mañá ate o propio venres, de 9 a 14 horas, na recepción do Auditorio. Son gratuítas, cun máximo de 2 localidades por persoa. En caso de que quedaran entradas dispoñibles, poderíanse retirar tamén o propio venres pola tarde no despacho de billetes. 
     
    O concerto, organizado polo Concello, a través da Concellería de Cultura e a Coral de Ruada, contará coa participación de agrupacións de música tradicional tan senlleiras como Rebulir, Gomez Mouro, Os Melidaos, Treixadura e Luar na Lubre, que quixeron sumarse a esta celebración, na que colaboran tamén a Deputación de Ourense, o Consello da Cultura Galega, a Consellería de Cultura e Turismo da Xunta de Galicia, a Obra Social “la Caixa”, Anpian, Cabú, Bodegas Arnoya e Estrella Galicia.
     
     
    Todas as entradas poden adquirirse en www.ataquilla.com ou unha hora (no Teatro Principal) ou dúas horas (no Auditorio) antes da función nos respectivos despachos de billetes.
     
    Durante o sábado 6 e domingo 7 de abril estarán instalados arredor do Parque de San Lázaro os tradicionais postos de rosquillas, lambetadas, abelás e produtos típicos das festas. A tradicional Queima das Madamitas será o domingo ás 13:00 horas.
     
    Ourense, 02 de abril de 2019.
    Música, teatro e actividades infantís son os eixos sobre os que pivota a oferta cultural do Concello de Ourense para esta semana. As actividades comezan este mesmo xoves con tripla convocatoria: Enclave de Cámara, Festival de Jazz e teatro para adultos. O venres, dobre ración de música (Música do Camiño e Bustamante) e teatro para bebés. E o domingo, día da Romaría do San Lázaro, haberá teatro infantil no Auditorio pola mañá, e actuación de Luis Piedrahita pola tarde.
     
    Trío Arriaga – Enclave de Cámara
    Xoves 4 de abril. 20:00 horas. Teatro Principal. Entradas: de 5 € a 8 €.
    Volve o ciclo Enclave de Cámara coa música do Trío Arriaga (Juan Luis Gallego, violín, David Apellániz, violonchelo, e Daniel Ligorio, piano), o lugar de encontro de tres músicos de recoñecido prestixio e alí onde converxen as súas traxectorias solísticas. Con concertos nos mellores festivais europeos, os seus proxectos discográficos en solitario (máis de 25 álbums), e os múltiples galardóns conseguidos en concursos nacionais e internacionais de interpretación aválannos como un trío de referencia da súa xeración. Poderemos escoitar por ver primeira en Galicia a obra dun compositor galego vivo, Eduardo Soutullo (Le sourire de Isabelle H), cuxa presenza está confirmada. [Máis info]
     
    “Invisibles”, de Redrum
    Xoves 4 de abril. 20:30 horas. Auditorio Municipal. Entradas: desde 5€.
    Un espectáculo de creación colectiva a partir da novela homónima de Monste Fajardo, que presenta ante o público diversas historias cun fío común entre elas: a violencia de xénero. O seu interese reside na exposición de historias reais protagonizadas por mulleres galegas, historias sobre malos tratos, algunhas delas xa coñecidas polo público pola súa repercusión mediática. Dirixida por Marián Bañobre e protagonizada polas recoñecidas actrices Mela Casal, Sheyla Fariña e Nieves Rodríguez, foi a gran trunfadora dos Premios de Teatro María Casares deste ano logrando as estatuíñas de Mellor Dirección, Mellor Adaptación e Mellor Iluminación. [Máis info]
     
    Diego Amador Trio - Festival de Jazz Primavera 2019
    Xoves 4 de abril. 23:00 horas. Café Latino. Entrada sen consumición: 15 euros.
    Diego Amador (piano), Rafa Díaz (baixo), Diego Amador Jr (batería e percusión). Free jazz en estado puro. En 1994 publica o seu primeiro disco, Patita Negra. En 2009 compartiu escenario con Pat Metheny, durante o Festival de Jazz de Vitoria. Ao ano seguinte xirou por Andalucía co contrabaixista Charlie Haden. Soy de las 3000, editado en 2016 coa participación de Alejandro Sanz e Óscar de León é o seu disco máis biográfico. 
     
    “Nube, nube, sol”. Teatro ao Cubo - Apego
    Venres 5 de abril. 18:00 + 19:00 horas. Auditorio. Entrada: 3€ (crianzas gratis)
    As nubes chegan. Chove. Sae o sol. A natureza esperta para encherse de cores. Ao amparo dos paraugas atoparemos agocho, bailaremos, cantaremos, e acompañados de pintorescos animais seremos parte da mesma paisaxe. A través do corpo, a xestualidade, o canto e a música, Teatro ao cubo achega á primeira infancia a maxia dos ciclos da natureza e a importancia da choiva para que todo medre. Recomendada de 0 a 4 anos
     
    Senhora del Mundo, de Camerata Piú Bassa - Música do Camiño
    Venres 5 de abril. 20:30 horas. Igrexa de Santa Eufemia. De balde.
    Música profana e relixiosa do Renacemento. Francisco Luengo e Patricia Rivero (violas de gamba), Esperanza Mara (voz) e Eneas Freire (guitarra) son Camerata Più Bassa, un grupo de xente nova cunhas ideas claras e respectuosas coa interpretación con criterios historicistas. De balde até completar aforo, no marco do ciclo Música do Camiño.
     
    David Bustamante
    Venres 5 de abril. 21:30 horas. Auditorio Municipal. Entradas: desde 25'50 €
    Co Tour Héroes está a percorrer toda España interpretando todos os éxitos da súa carreira e presentando “Héroes en tiempos de guerra”, cuxo primeiro single “Héroes” entrou directamente ao nº 1 en Itunes e roza co videoclip o millón de visitas no Youtube. Supón o regreso do Bustamante máis melódico e carismático, cun álbum no que se confirma unha vez máis como un dos artistas máis mediáticos do noso país. 
     
    Romaría do San Lázaro
    Domingo 7 de abril, horario de mañá.
    Durante o sábado 6 e domingo 7 de abril estarán instalados arredor do Parque de San Lázaro os tradicionais postos de rosquillas, lambetadas, abelás e produtos típicos destas festas. O domingo ás 11:45 horas haberá alborada cos gaiteiros Gomes Mouro e cabezudos polas rúas do Paseo, Santo Domingo e parque San Lázaro. Ás 13.00 horas será a Queima de Madamitas a cargo da Pirotecnia Josman.
     
    “Ummm!”, de Avento Teratro. Teatro infantil.
    Domingo 7 de abril. 12:00 horas. Auditorio Municipal (Sala Azul). Entradas: 3€
    Unha comedia musical para chuchar os dedos. A pastelaría de dona Remedios ten cada vez menos clientes porque a súa dependenta, Ana, só sabe facer boliños de crema. Para facer fronte a este problema, dona Remedios decide contratar un novo axudante con novas ideas para os doces que a xente está a demandar nestes días. Recomendado: de 3 a 8 anos.
     
    “Las amígdalas de mis amígdalas...” Luis Piedrahita
    Domingo 7 de abril. 19:00 horas. Auditorio Municipal. Entradas: desde 15€
    Un show de Luís Piedrahita pensado para xente esixente, aseada e con sentido do humor. Deste espectáculo díxose que é unha das obras máis enxeñosas, brillantes e poéticas do século XXI. Per se cadra foi o propio Piedrahita quen o dixo...
     
     
    Ourense, 20 de marzo de 2019.
     
    Velaquí a programación de actividades do Auditorio Municipal para os vindeiros días. A maiores, a axenda cultural inclúe os concertos do Festival Internacional de Música Pórtico do Paraíso: o venres 22 ás 20:30 horas na Igrexa das Caldas, Apollo5 (Reino Unido); o sábado 23 ás 19:30 horas na igrexa de Santa Mariña de Augas Santas de Allariz, LaReverdie (Italia), e o domingo 24 ás 19:00 horas no Teatro Principal de Ourense, peche desta duodécima edición con Vienna Clarinet Connection (Austria).
     
     
    •TANATORIUM, de Félix Albo.
     
    Xoves 21, 20:30 horas. Público adulto. Entradas 5 €.
     
     
    Un home entra no portal dun velorio xusto no momento no que marcha a luz. A escuridade, o forzado silencio e a incómoda humidade que se respira na entrada evócalle un soliloquio co que percorre trazos de distintas vidas ata chegar á súa propia. Espectáculo cheo de risos, emoción e tamén preguntas ás que ninguén ten obriga de contestar. Sobre o escenario bailan a vida e a morte ao ritmo das gargalladas do público.
     
     
    •Encontro orquestral e coral dos CSM de Galicia 
     
    Venres 22, 20:30 horas. Entrada de balde. 
     
     
    O Encontro reunirá 150 intérpretes con idades comprendidas entre os 18 e os 23 anos que conformarán unha grande Banda Sinfónica con Coro, conducidos polo profesor Juan Carlos Díaz.
     
     
    •STEPS, de Silvia Alonso
     
    Sábado 23, 20:30 horas. Entradas 8 €. 
     
     
    “Steps” é o terceiro espectáculo da artista ourensá e representa o resultado dunha evolución , e o seu propio nome responde ao dobre significado de “ pasos” ou “escaleira”, como reflexo dun labor de procura de novos campos vocais. Revisión de temas dos anos 70 e 80, que coinciden coa etapa final brillo do funk, o nacemento da música disco, e o rock sinfónico. Exitos de autores e intérpretes como Steve Wonder, Police, Queen ou Michael Jackson, serán revisados cunha óptica nova e matices propios, fuxindo da réplica dos orixinais, arranxos musicais, orixinais e exclusivos. 
     
    Durante o concerto presentarase o vídeoclip autobiográfico que presenta a transformación vital de Silvia Alonso, a partir do seu encontro coa música.
     
     
    •COUSAS DE NENOS, de Ian & Elisa
     
    Domingo 24, 12:00 horas. Sala Azul. Familiar. 45 minutos. Entradas 3 €
     
     
    Espectáculo indicado para toda a familia. Tanto nenos como non tan nenos desfrutarán deste espectáculo cheo de colorido e ilusión. Cunha mestura de maxia e sombras chinesas Ian e Elisa farán que o público se somerxa nun mundo imaxinario onde nada é imposible.
     
     
    •CYRANO DE BERGERAC
     
    Domingo 24, 20:00 horas. Todos os públicos. Entradas 16 €.
     
     
    Premio á Mellor Interpretación Masculina (José Luis Gil) e á Mellor Dirección Escénica (Alberto Castrillo-Ferrer) nos XXVI Premios Teatro Rojas. O Cyrano de Bergerac teno todo: aventura, paixón, tensión, humor, beleza, amor e desamor. É un clásico entre os clásicos e un moderno entre os modernos. Cyrano é moito máis que unha obra ou unha personaxe. É o emblema nacional galo. O home valente ata o infinito pero acovardado ante a muller que ama, o "negro" do guapo da historia, Christian, ao que escribe versos en segredo para a súa amada Roxanne. É unha oda ao enxeño e ao amor, é a forza do seu verso, o seu descaro e sutileza, un verso bisbeado ou lanzado como un dardo, un verso áxil e profundo, popular e erudito, descarado e vital, teno todo.
     
    Esta obra converterase nun símbolo do teatro francés e universal, nun novo Quíxote dramatúrxico representado polo mundo enteiro, unha mostra do poder da palabra tanto na vida como na escena. A obra, escrita polo novo e ousado poeta Edmond Rostand coñeceu un éxito sen precedentes que se estende ata os nosos días.
     
    Nesta ocasión o televisivo actor José Luis Gil ponse na pel de Cyrano, acompañado de Ana Ruiz, Álex Gadea, Nacho Rubio, Ricardo Joven, Rocío Calvo e Joaquín Murillo. Dirección: Alberto Castrillo-Ferrer. Máis info sobre a obra.
     
     
    Ourense, 20 de marzo de 2019.
     
    Un total de 150 intérpretes de entre 18 e 23 anos subirán, este venres ás 20:30 horas, ao escenario do Auditorio Municipal. Todos estudantes dos Conservatorios Superiores de Música de Vigo e da Coruña, que se reúnen desde hoxe en Ourense para preparar un encontro orquestral e coral que se plasmará na realización de tres concertos, o primeiro deles na nosa cidade, antes de partir cara á Coruña, onde actuarán o sábado 23, e a Vigo, o domingo 24. “Será unha oportunidade para aprender e para gozar da música”, declarou o alcalde de Ourense, Jesús Vázquez Abad na presentación. “Dúas caras da mesma moeda, a cultura, que sempre nos ofrece un valor engadido”, dixo.
     
    O encontro, baixo o amparo da Consellería de Educación, Universidade e Formación Profesional a través das súas direccións xerais, ofreceralles aos ourensáns a posibilidade de gozar “dunha espectacular montaxe, instrumental e coral”, en palabras de Esteban Valverde Corrales, director do Conservatorio Superior de Música de Vigo, pero tamén servirá para que os futuros músicos intercambien experiencias a través dunha intensa convivencia e o encontro fronte á fronte co público, que pasa por ser “unha das maiores motivacións dos estudantes”, dixo Valverde Corrales.
     
    O Encontro reunirá a aproximadamente a 150 intérpretes que conformarán unha grande Banda Sinfónica con Coro, conducidos polo profesor Juan Carlos Díaz. A entrada é de balde -o despacho de billetes do Auditorio estará aberto desde dúas horas antes do concerto- até completar aforo.
     
    Programa: 
    Sinfonía No. 3 - Circus Maximus, de John Corigliano (n.1938) 35'
    I. Introitus 
    II. Screen/Siren 
    III. Channel Surfing 
    IV. Night Music I 
    V. Night Music II 
    VI. Circus Maximus 
    VII. Prayer 
    VIII. Coda: Veritas 
     
    Five Hebrew Love Songs, de Eric Whitacre (n.1970) 10:30'
    I. Temuna (A Picture)
    II. Kala Kalla (Light Bride)
    III. Larov (Mostly) "Mostly,"
    IV. Eyze Shelleg! (What Snow!) 
    V. Rakut (Tenderness)
     
    Sinfonía No. 4 en Mim Op. 16 (IV. Movemento) de Joly Braga Santos (1924-1988) 20:00' 
     
    Orixinal para Orquestra e Coro. Transcrición para Banda de Fernando De Sousa Alves.
     
     
    Ourense, marzo de 2019.
     
    O espectáculo de danza Entresoños, da compañía de Fran Sieira, iniciará pasado mañá, xoves, unha fin de semana cargada de cultura que inclúe o inicio da edición número 12 do Festival Internacional de Música de Ourense Pórtico do Paraíso, a estrea de Mariana, de Palmyra Teatro, no marco das actividades co gallo do Día Internacional das Mulleres, e unha nova cita co teatro infantil con E-book: As idades do libro.
     
    EntreSoños (14 de marzo, 20.30h, Auditorio) é unha obra de baile e música tradicional galega de 70 min de duración, cun elenco artístico de 3 bailadores/cantadores: Fran Sieira, Aida Tarrío e Xisco Feijoó, ao son da música do compositor e músico multidisciplinar Anxo Pintos, e dende unha visión contemporánea a través dos ollos do director artístico David Vilariño, bailarín contemporáneo e coreógrafo.
     
    Ao día seguinte estrearase a obra de teatro Mariana, orixinal de José Ramón Fernández e dirixida por David Ojeda, a cargo da Compañía Teatral Palmyra. Na obra, dentro da programación de actividades que organiza o Concello para celebrar o Día Internacional das Mulleres 2019, a actriz ourensá Lucía Álvarez meterase na pel de Mariana Pineda, a muller que se enfrontou ao rei Fernando VII. Será o venres, 15, ás 20:30 horas con entrada é libre até completar o aforo.
     
    Ese mesmo día, o grupo vocal italiano Odhecaton abrirá a XII edición do Festival Internacional de Música de Ourense Pórtico do Paraíso cun concerto na Catedral de Ourense, ás 21:00 horas. Será o primeiro dos sete concertos que nos levarán ao Mosteiro de San Clodio, de Leiro, á igrexa de Santa Mariña de Augas Santas, en Allariz, á de Santiago das Caldas, na propia cidade, e que finalizarán coa actuación do cuarteto austríaco Vienna Clarinet Connection, o día 24 no Teatro Principal.
     
    Completará a semana a nova cita coa programación familiar do Auditorio dos domingos ás 12:00 horas, con E-book. As idades do libro, de Spasmo Teatro. A obra ofrece a máis fascinante e disparatada historia do libro e os seus protagonistas. Un espectáculo con vocación didáctica, educativa e moi divertida, que se adentra no apaixonante universo do saber, dos grandes descubrimentos e da evolución da escritura e os seus soportes até o día de hoxe, culminando coa aparición do E-book. Chea de retranca, os mellores efectos visuais e sonoros, e grandes doses de humor xestual a cargo Spasmo.
     
    Ademais, desde o xoves, poderase visitar no Museo Municipal a nova proposta artística de Mónica Filgueira: Or@perucita / Taras.
     
    Ourense, 25 de febreiro de 2019.
     
    O Auditorio de Ourense acollerá, até o vindeiro 25 de marzo, a nova colección de cadros do ourensán (de Punxín) Antón Barros. Lembrando momentos é unha colección traballada entre os anos 2016 e 2017, recuperando escenas naturais que foron creados sobre diferentes temáticas, ben imaxinadas ou que lle chamaron a atención no momento da xestación artística. Á presentación acudiron a concelleira de Cultura, Belén Iglesias, e a responsable de Espazos expositivos do Concello de Ourense, Eva Torres.
     
    Lembrando momentos é unha colección de lenzos de medio formato (50x60 na súa maioría) que, como el mesmo afirma, “está inspirada na vida cotiá”. Neste sentido, son numerosas as referencias á cidade, tanto literal como figuradamente a través de moitos dos seus personaxes.
     
    Antón Barros é unha persoa ligada intimamente ao debuxo: tanto na vida profesional -é debuxante técnico- coma na artística: Desde o 2012 adícase plenamente ao óleo, e xa expuxo a súa obra en diferentes lugares da provincia de Ourense.
     
     
    Ourense, 19 de febreiro de 2019.
    O teatro invade o Auditorio de Ourense esta semana, con ata catro representacións de diferentes compañías galegas: Ítaca Teatro, a ourensá A quinta do cuadrante, e Entremáns. Pechará a semana o musical Rosalía Pequeniña, unha montaxe musical para festexar o Día de Rosalía (a poeta), con Uxía Senlle, Sergio Tannus e Héctor Lorenzo sobre o escenario. A oferta cultural complétase con senllas exposicións no Museo Municipal e outra, dedicada ao escultor Antón Faílde, na sala Valente. Porén, a cultura da cidade celebra, a partir deste xoves, unha das celebracións máis senlleiras do noso ciclo festivo: o Entroido.
     
    Cinco minutos sen respirar, de Ítaca Teatro. 
    Xoves 21 de febreiro. 20:30 horas. Duración: 80'. Entradas 3€. Público adulto
    Retrata os anhelos, o medo e a escuridade que pode albergar unha persoa a través de dous personaxes: Margarita, unha (ex)empregada de banca, e Víctor, supervisor nun supermercado. Unha proposta baseada no traballo de interpretación e cunha dirección escénica que incide nos delirios e nas dualidades propias do mundo de hoxe. Cinco minutos sen respirar fala da vida, dos abusos bancarios, do amor, da explotación laboral, do suicidio, da familia, da violencia... e de tantas outras cousas, que non dá tempo a resumilas en cinco minutos. “A poesía é a única proba concreta da existencia do home”
     
    O empapelado amarelo, de A quinta do cuadrante [avance]
    Sábado 23 de febreiro. 20:00 horas. Entradas:5 €. Público: + 15 anos.
    Dramaturxia de Tito Asorey e de Melania Cruz. O empapelado amarelo é un espectáculo teatral unipersoal baseado no relato autobiográfico homónimo publicado no século XIX pola autora norteamericana Charlotte Perkins Gilman, un referente feminista de gran importancia na historia da literatura universal. A proposta escénica busca dialogar coas palabras da escritora desde a nosa contemporaneidade a través da palabra, o ritmo e as atmosferas visuais e sonoras nunha viaxe sensorial liberadora cara aos territorios da loucura e a lucidez. Aforo máximo: 100 persoas.
     
    GAIA, de Entremáns
    Domingo 24 de febreiro. 12:00 horas. Público infantil e familiar (+3 anos)
    Entremáns presenta o seu segundo espectáculo infantil, logo da boa acollida que tivo a nivel nacional o seu anterior espectáculo XOGA. Gaia é un espectáculo onde a voz e a danza nos achegan coñecementos dende unha óptica visual e imaxinativa. É unha historia en movemento na que a pintura, a música e o audiovisual nos axudan a descubrir a intensidade, o poder e a beleza das características do noso planeta e dos seus tesouros naturais. É un encontro didáctico co que entender a importancia da interacción entre as persoas e o medio ambiente.
     
    Rosalía Pequeniña, concerto
    Domingo 24 de febreiro. 18:00 horas. Espectáculo familiar gratuíto.
    O 24 de febreiro, data do aniversario de nacemento de Rosalía de Castro, o  Concello de Ourense celébrao con música, un dos mellores vehículos para descubrir e gozar da poesía. Uxía Senlle, acompañada de Sergio Tannus e Héctor Lorenzo, déixanos un feixe de cancións para retratar esa muller que uns chamaron tola e outros santa: a verdadeira Rosalía. Pirata, poeta, aventureira ou fada. Rosalía pequeniña para cantar, para rir, para gozar ou bailar.
     
    Espazos expositivos
    O Museo Municipal mantén dúas exposicións: 'O paraíso nesta esquina', unha colectiva dos artistas Belén Padrón e Xosé Carlos Seoane que ocupará as salas 1 e 2 até o 17 de marzo, e 'Metauniversos Coditianos', da fotógrafa coruñesa Loly Villoch, organizada en colaboración da Fundación Cum Laude. O Museo Municipal está aberto de martes a domingo no seguinte horario: de martes a sábados, de 11:00 a 13:30 e de 18:30 a 21:30 horas, e os domingos de 11:00 a 13:30 horas. 
    Ademais, e até o 31 de marzo, a sala Valente acolle 'Antón Faílde e a natureza recoñecida', de martes a sábado de 11 h a 13.30 h e de 18.30 h a 21.30 h e os domingos de 11 h a 13.30 h. A entrada é gratuíta.
     
    Páxinas: 1 2 3 4 5 ... Último 

    Concellería de Cultura
    Concello de Ourense
    2017

     

    Rúa da Canle, 1
           32005 Ourense

     

       988 391 290

    Contacto

     

    Accesibilidade

     

    Permisos

    Cultura nas redes:

     

      Facebook

     

      Twitter

     

      Youtube

    Diseñado y programado por ACV Galaica