Concello de Ourense - Cultura - MUSEO MUNICIPAL

Volver

Ourense, xuño de 2017.

Logo de seis meses pechado para acometer as obras de instalación do ascensor, o Museo Municipal reabre as súas portas con Tempo, da artista alemá afincada en Ourense Isabell Seidel. Unha colección de 91 obras, de grande e medio formato, coa técnica de acuarela en papel sobre lenzo, diarios de viaxe e cadernos de anotacións que percorre os currunchos da nosa cidade. A exposición ocupa as tres plantas do Museo -feito que non ocorría desde hai 30 anos, con Julio Prieto Nespereira-, e permanecerá aberta desde o xoves 22 de xuño até o 30 de setembro.

Ourense só hai unha, mais as súas representacións son moitas, tantas como ollos abertos e mentes sensibles”, dicía o alcalde Jesús Vázquez na presentación de Tempo, “e grazas ás súas acuarelas de Seidel aprendemos a observala desde a mirada da artista, a apreciala na súa beleza e sentila propia nas súas manifestacións”.

Para a artista, Tempo representa a moitos niveis o seu traballo. “É unha mostra 100% ourensán que busca reflectir a nosa cidade a través das árbores, as estacións do ano, o xogo das luces e das sombras e, especialmente, a choiva”, dixo, pero tamén “o grao de humidade exacto, o pigmento que flúe coa auga para modelar a realidade”. Porén, tamén considera que é unha obra “moi persoal”, xa que reflicte o tempo que transcorreu desde que empezou a traballar na exposición até o momento, tempo no que foi nai de dous nenos: “agora todo é máis complexo”, recoñecía, “e acórdome de que Tempo en alemán significa velocidade”.

 

Ourense, 20 de xuño de 2017.-

O Museo Municipal acada a plena accesibilidade coa instalación dun ascensor panorámico que conecta os dous andares e a planta principal. E, o máis importante, de facelo cunha dotación fundamental: un ascensor panorámico que conecta os dous andares e a planta principal.

En resumo, o Museo Municipal, logo dun investimento de 58.000 euros, ten plena accesibilidade.

É preciso lembrar que a planta principal xa estaba adaptada con rampas de acceso, pero faltaba un acceso axeitado aos dous andares superiores do edificio. Coa instalación deste ascensor queda definitivamente subsanada esta eiva.

É un ascensor panorámico, feito de vidro e adaptado non só ás necesidades dos espazo, senón tamén á súa estética. “Hai que agradecerlle ao equipo redactor do proxecto este bo gusto: o ascensor intégrase, daquela, coma unha figura escultórica máis, facendo unha integración funcional e elegante”, destacou o alcalde, Jesús Vázquez, na visita a esta instalación.

Aínda máis: este ascensor eléctrico consume moi pouca enerxía, pois aproveita as inercias, e tamén ten un sistema de seguridade a través dun mecanismo de cintas (segundo explicaron os redactores do proxecto) que avisa antes de que se produza a incidencia.

En calquera caso, unha nova dotación, na liña de seguir traballando e dando pasos para converter Ourense nunha cidade accesible, cómoda e sen barreiras.

 

Ourense, 12 de decembro de 2016.

Os organizadores da exposición 'Prego: 100 anos' abren este mércores a segunda e última fase de catalogación da Obra de Prego de Oliver. Este chamamento, dirixido a todos aqueles propietarios, coleccionistas ou galeristas que posúan obras do autor ourensán e desexen ter a súa obra catalogada.

 

O traballo de recepción das obras realizarase os vindeiros días 14, 15 e 16 de decembro na sala Valente en horario de 11:00 a 13:30 horas e de 18:30 a 21:30 horas co seguinte procedemento: entrega da obra cun rexistro de entrada e devolución da obra, con sinatura de saída. Á xente que veña de fóra de Ourense recibirá o certificado e a obra o mesmo día.

 

Charla didáctica: cambio de data

Por outra banda, hai un cambio de data na última das conferencias divulgativas da súa obra previstas no programa de 'Prego: 100 anos'. Así, O canon da pintura galega desde a Atenas de Galicia: Prego, a cargo do comisario da exposición, Xabier Limia de Gardón, que estaba prevista inicialmente para mañá, terá lugar o vindeiro martes 20 de decembro ás 20:00 horas na propia sala Valente con acceso libre e gratuíto.

 
Ourense, 17 de novembro.-

Esta mañá o primeiro andar do Museo Municipal acollía a presentación de tres novas exposicións dentro do festival Outono Fotográfico 2016. Estas obras permanecerán neste espazo ata o 4 de decembro. Neste acto estiveron a directora de Espazos Expositivos do Concello de Ourense, Eva Torres, Belén Iglesias, concelleira de Cultura, Xosé Lois Vázquez "Che" e Vítor Nieves, director e curador do festival Outono Fotográfico respectivamente.

O título das exposicións son:
 
 
 

Ourense, 26 outubro de 2016

O Museo Municipal acolleu esta mañá a presentación da primeira quenda de exposicións que teñen lugar dentro da programación do Outono Fofográfico, o festival galego de fotografía. Permanecerán abertas ata o día 13 de novembro neste espazo expositivo. Na presentación estiveron o alcalde de Ourense, Jesús Vázquez, a Concelleira de Cultura, Belén Iglesias, a directora do Museo, Eva Torres, acompañados pola artísta Eva Díez e polo curador do festival, Vítor Nieves.

A continuación detállanse as exposicións desta primeira etapa:

  • Sala I: Renacer, de Eva Díez (Premio Galicia de Fotografía Contemporánea).

  • Sala II: O Paraíso, de David Mocha.

  • Sala pequena: SOJI, de Júlia Franco Braga.

 

Esta é a trixésimo cuarta edición do Outono Fotográfico, que reaparece ata o Nadal para facer visible a fotografía. Este festival estará presente en 70 espazos expositivos de toda a xeografía galega, repartidos en 25 localidades, 4 delas en Portugal.

 

Ourense, setembro de 2016.

O salón de plenos do Concello de Ourense vén de acoller a presentación do proxecto expositivo Prego, 100 anos, “un proxecto singular, novidoso e interdisciplinar no que poñer de manifesto o autor por todos coñecido, pero aínda máis: un novo Prego de Oliver nas súas múltiples e integradas facetas de creador, pensador, investigador, teórico, pintor e debuxante”, en palabras do alcalde de Ourense, Jesús Vázquez.

 

Este proxecto foi levado a cabo en integración e colaboración con diferentes institucións que velan pola Cultura e polo coñecemento edificador: o propio Concello de Ourense, a Xunta de Galicia a través da Consellería de Educación, Cultura e Ordenación Universitaria, o patrocinio de Iberdrola e Afundación, sen esquecer a achega incalculable da familia, grande posuidora do legado de Prego de Oliver, museos, institucións, fundacións e particulares que puxeron nas nosas mans as súas obras máis prezadas para a difusión entre os ourensáns e todos os amantes da arte que desde o 15 de setembro até o 8 de xaneiro do vindeiro 2017 queiran disfrutar deste proxecto interdisciplinar.

 

Prego, 100 anos celebrará tres exposicións: “Prego de Oliver, un pintor de ideas e arquetipos. Do boceto á obra gráfica”, a partir deste xoves ás 20:00 horas na sé de Afundación; “O obradoiro: espazo de creación e materialización práctica. A súa obra inédita”, desde o 23 de setembro no Museo Municipal; e “Prego de Oliver e a captación do Eterno. O óleo como materialización da súa plástica”, na Valente a partir do 29 de setembro. Pero ademais haberá obradoiros didácticos, conferencias, publicacións e actos divulgativos que afondarán na figura do pintor e no seu modo de entender a vida a través da arte.

 

A figura do Prego menos coñecido

O secretario xeral de Cultura, Anxo Lorenzo, destacou na presentación da exposición “a necesidade de revisitar, actualizar e poñer luz sobre os nomes deses grandes personaxes que forman parte da Cultura galega”. Natalia Figueiras, comisaria da exposición xunto a Xavier Limia, salientou pola súa banda a metodoloxía de traballo “dos soportes, técnicas pictóricas e iconografía”, analizados desde unha óptica científica para recoñecer a figura como un dos artistas máis importantes da plástica galega do século XX.

 

En total, 1.200 metros cadrados de espazo expositivo albergarán a obra do centenario: 1.200 obras catalogadas e inventariadas, 50 obras de coleccións e de institucións, ademais de 340 debuxos e 130 óleos. Entre todos eles, cómpre destacar polas súas dimensións os murais da Estación Marítima de Vigo, cunhas dimensións de 6x3,4 metros cada un (e que se poderán visitar in situ, xa que na exposición estarán presentes de maneira dixital) ou un óleo de 2x4 metros. Tamén estará no proxecto o mural do antigo Hotel Parque, restaurada por iniciativa da construtora Copasa e que será cedida grazas ás xestións do Concello.

 

O alcalde non quixo esquecer o importante esforzo de divulgación entre público escolar: Primaria, ESO e Bacharelato. “O futuro da sociedade ourensá debe ter cimentos sólidos sobre os personaxes máis senlleiros da súa cidade dixo.

 

Ourense, xullo de 2016.

 

Unha viaxe desde os seus inicios como creadora até a actualidade. É o que nos propón a artista viguesa Nuria Guardiola con Coeur d'armazigh, unha mostra retrospectiva que compila os primeiros cadros, cando se mesturan experiencias persoais con conflitos emocionais, con creacións a partir de elementos industriais extraídos das fábricas de salgado do Morrazo, os faros do Atlántico (que forman parte do inventario municipal), fotomontaxes autobiográficas e, finalmente, a descuberta de Marrocos, onde a autora imparte Maxisterio desde 2011. A mostra estará até o 25 de setembro nas salas I e II do Museo Municipal da rúa Lepanto.

 

Trátase dunha extroversión autobiográfica na que descubrimos novos países, novas cidades e, ao tempo, novas formas e formatos, novas técnicas, e novas cores... se cadra máis cálidas, e de seguro que non son só as das paisaxes, relataba o alcalde, Jesús Vázquez, na inauguración da exposición.


 

Nuria Guardiola traballa cunha perseverancia pigmentaria a partir de figuracións abstractas, múltiples movementos xestuais e perfís de cor que debuxan e moldean os seus diferentes soportes artísticos, cores frías interceptadas en ocasións con atmósferas cálidas que nos elevan a momentos de intensa abstracción cromática.

 

E é que a autora, que ten o seu taller na Abeleda (Beariz), foi recompilando vivencias e novas experiencias sobre diferentes formatos e con diferentes técnicas. A súa formación vénlle do pai, tamén pintor, que a animou a probar con metais, con papel, con fotografías e mesmo cristais. Desde que chegou a Marrocos a dar clase, ademais, descubriu novas paisaxes e novos universos: non son tan diferentes aos nosos, dixo, en referencia ao amor polas singularidades de cada pobo - no Riff semellan moi galegos, polo matriarcado e polo amor á terra - aínda distan moito de parecerse para o bo e para o malo.

 

Ourense, 23 de xuño de 2016.

Cos días de verán chega ao Museo Municipal de Ourense (rúa Lepanto) a exposición Tempo de Luz, do artista vigués Antonio Abad, unha escolla de 24 obras realizadas coa técnica do pastel representativas das paisaxes galegas -ríos, fervenzas, árbores- pero tamén da visión intimista do seu autor. A mostra estará na sala de lectura do Museo, no terceiro andar, até o 31 de agosto.

 

Por este punto do Museo pasan mensualmente moitos nenos”, dixo a concelleira de Cultura, Belén Iglesias, durante a presentación, “un aliciente máis para espallar a cultura a toda a cidadanía”. Foi precisamente ese carácter divulgativo da mostra o que agradeceu o autor vigués, que xa pasara pola Galería Visol de Ourense noutras ocasións. “O pastel estivo moi en auxe en Europa durante os séculos XVIII e XIX, pero despois pasámonos ao figurativo e ao realista”, dixo. Porén, desde os anos vinte do pasado século foron os franceses os que retomaron esta técnica, e hoxe en día estanse a facer “bienales de moito interese en España”, puntualizaba Antonio Abad.

 

As paisaxes galegas o que máis traballa Antonio Abad: “Quero sempre levar Galicia polo mundo adiante”. Non en van, xa nos últimos anos expuxo en Tailandia, San Petersburgo e en diversos lugares de Francia. Porén, tamén ten un lugar para a intimidade, ben en forma do corpo da muller ou en forma de bodegóns. Entre as 24 obras que compoñen Tempo de Luz podemos ver, tamén, seis pequenas abstraccións de formas naturais.

 

A inauguración oficial da exposición será esta tarde ás 19:00 horas.

 
Páxinas: 1 2 3 4 5 ... Último 

Concellería de Cultura
Concello de Ourense
2017

 

Rúa da Canle, 1
       32005 Ourense

 

   988 391 290

Contacto

 

Accesibilidade

 

Permisos

Cultura nas redes:

 

  Facebook

 

  Twitter

 

  Youtube

Diseñado y programado por ACV Galaica