Concellaría de Cultura de Ourense

Ourense, abril de 2018.
 

O vindeiro venres, 20 de abril, ás 14,00 horas remata o prazo para participar no XXXIV Premio de Poesía “Cidade de Ourense”, dotado con 6.000 euros e que está aberto a autores e autoras que presenten obras orixinais e inéditas escritas en galego ou portugués, cun mínimo de 600 versos de extensión.  Non poderán participar as persoas que gañaron este premio nas cinco últimas edicións. 
 

Os interesados en concursar deberán entregar os seus traballos no Rexistro do Concello de Ourense (Praza Maior, s/n), directamente ou por correo certificado. As persoas que concorran desde Portugal poderán facer entrega dos seus poemarios nas instalacións da Cámara Municipal de Vila Real, respetando os mesmos prazos e requisitos. 
 

As obras se presentarán baixo lema, nun sobre pechado. Os concurrentes poderán presentar máis dunha obra, sempre e cando cada unha se presente de forma independente. 
 

O Xurado será nomeado pola Concellería de Cultura e estará integrado por personalidades das letras galegas e portuguesas; a persoa gañadora da pasada edición e un representante da Corporación, que exercerá a presidencia. A súa decisión se coñecerá no mes de xuño e será  será inapelable.
 

O premio está dotado con 6.000 euros e a publicación de 150 exemplares do libro. A persoa beneficiaria deste galarón percibirá de forma gratuita 25 exemplares do libro e pasará a formar parte do xurado na vindeira edición.
 

O xornalista e poeta portugués Fernando Fitas, foi o gañador da última convocatoria coa obra “Subversiva liturgia das máos”. O seu poemario foi elexido como o mellor dos 29 que concorreron ao certame. 
 

Nesa ocasión o xurado estivo integrado por Luís González Tosar, poeta e presidente do Pen Club Galicia; Xurxo Alonso, gañador da edición anterior; Edelmiro Vázquez Naval, poeta ourensán; Sara Martiñá, profesora de lingua e literatura galegas; e Mª Hercília Agarez, do Grémio Literário Vila Realense. 

 

Na edición do ano 2016 o gañador fora o consolidado escritor vilagarcián Xurxo Alonso, pola obra “Cartas da fronteira”. O xurado desta edición, á que concorreran 57 traballos, estivo composto por Isabel Alves, Fernando de Castro, Luciano Rodríguez, Amalia Moreiras, e Luís González Tosar.